Иң артыхтары полыбысханнар
21.10.2026
Хабарлар
«Чонның поғдархазы» премияның чиңіcчілері
Сыйыхтас. 16 чарыста Новосибирскте Россия чоннарының ассамблеязы «Чонның поғдархазы-2026» VII тиксі Россия халых премиязының регионнар аразындағы чардығында сыйыхтығ орынға сыххан араласчыларға сыйыхтар читірген
Таныхтирға кирек, премияның эксперттерінің санына «Россия чоннарының ассамблеязы» халых хазна организациязының республикадағы пӧлиинің кнезі Любовь Аёшина кірче. Эксперттер читі номинацияҷа прай араласчыларның аразынаң 21 кізіні иң артыхтарның артыхтарына таллап алғаннар. Чоохтирға кирек, Сибирьдегі федеральнай округ синіндегі марығда 10 регионнаң тиксі 227 кізі араласхан.
«Россия чоннарының тӧреен тіллері» номинацияда Хакасиядағы ӱгредіг киреен тилiтчең паза ӱгретчілернің квалификациязын кӧдірҷең институттың тоғынҷылары Надежда Яковлевна Толмачёва, Наталья Николаевна Трунова паза Ағбандағы «Золотой ключик» олған садының воспитательі Тарика Альбертовна Албычакова лауреаттар полыбысханнар. Оларның «Мин хакас тілінең чоохтасчам: Хакас Республиканың олған садтарында паза тиксі пасталығ ӱгредігде хакас тіліне хабазары» проекті пӧзік паалалған. Надежда Яковлевна ол проекттің авторы полча. Наталья Николаевна паза Тарика Альбертовна, соавторлар полып, проектті чуртасха кирерінде ӧткін араласханнар.
Проектте кӧріл парған оңдайлар олғаннарға паза іҷе-пабаларына чуртаста хакас тілінең ӧткін тузаланарға чахсы полысчалар. Авторлар ӱгредіг киреене 50 азыра ӱгредіг-методическай материал кир салғаннар. Ідӧк 30 азыра статья чарыхха сығар салғаннар паза пасха ӱгретчілерге пілістерін тилiдер курстар иртіргеннер. Ағаа хоза, Хакасияның ӱгредіг паза наука министерствозының, республиканың Улуғлар чӧбінің хабазиинаң «Пала тілі» сайт чуртасха киріл парған. Сайтта тіл ӱгренерінҷе іҷе-пабаларға, олғаннарға, воспитательлерге паза ӱгретчілерге кӧп тузалығ материал пирілче.
Таныхтирға кирек, чиңісчілернің проекті хакас тілінең чоохтасчатхан кізілернің санын хозарына паза ӱгретчілернің пілістерін кӧдіреріне кӧстегліг полча. Аның авторлары «Чонның поғдархазы» тиксі Россия халых премиязының регионнар аразындағы чардығында сыйыхтығ орынға сыхханы пӱӱнгі кӱнде хазнабыста тӧреен тіллерге улуғ хайығ салылчатханнаңар чоохтапча.
Сом «Россия чоннары ассамблеязының» региондағы пӧлиини
Автор :
Тимнеен Ольга Томочакова
| Пн | Вт | Ср | Чт | Пт | Сб | Вс |
| 28 | 29 | 30 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
