Ӧсчеткен тӧлге турыстығ орыннар
21.10.2026
Хабарлар
Улуғ Сииде олған-узах ачыхтың азыларын чидікпин сахтаан
«Чонға кирек иң артых проект». Тастып аймаанда соон сӱрiстiре iкi ачых пайрамни азыл парды
Пастағызы Улуғ Сии аалда орныхча. Олғаннарға паза чииттерге кӧрiлген спорт ачығы Хакасияның национальнай паза территориальнай политика министерствозының «Чонға кирек иң артых проект» марииның номинациязында ӱзiнҷi орынны холға кирген сылтаанда тимге сығарыл парған. Аал чӧбi хаҷаннаң хуруғ турчатхан чирде – Культура паза аал чӧбi туралары хыринда – кiчiг футболнаң паза волейболнаң айғазар ачых тимнебiскен. 13 чарыста аны азарға кӧп кiзi чыылыс парған – аал чуртағҷылары, школа ӱгренҷiлерi. Аарластығ аалҷылар санында республиканың национальнай паза территориальнай политика министрi Галина Адыгаева, Тастып аймаа пазының пастағы орынҷызы Елена Алексеенко полғаннар. Пастағы сӧс Улуғ Сии аал чӧбi пазы Тамара Толтаеваа пирiлген.
– Пу проектті чуртасха киріп алар ӱчӱн піс прай кӱзібіс салғабыс. Хакасияның национальнай паза территориальнай политика министерствозының мариинда ӱзінҷі орын утып алған сылтаанда піске 750 муң салковай пирiлген, Тастып аймаа 90 муң салковайнаң хабасхан, спонсорлар полызии 5 муң салковайға тиңнелген. Пасхазын аал чӧбi позы хосхан. Тиксi 1,1 миллион салковайға чағын ахча хорадылған. Піс мында футбол, волейбол ойнирбыс. Кӧрчезер, хайдағ кӧп одырчых, кӧрігҷілерге дее орыннар пар. Министр Галина Владимировна Адыгаеваа паза Тастып аймаандағы «Земля Таштыпская» газетаның редакторы, пiстiң аалдағы спорт ачығы проектiнiң авторы Наталья Владимировна Ковалеваа улуғ алғызыбыс читірчебіс. Iдӧк алғызымны пістің Культура туразының паза аал чӧбінiң тоғынҷыларына читірерге сағынчам. Паза олғаннардаң сурынчам – субботниктерде полыс турарға, спорт ачығын сӧп-саптаң арығлап турарға, анаң постарыңа даа мында ойнирға истіг полар нооза, – теен Тамара Владимировна.
Анаң Хакасияның национальнай паза территориальнай политика министрi чоох тутхан, ӧӧнінде олғаннарзар айланып:
– Мин сағынчам, пу сіліг спорт ачығында хаҷан даа сірернің кӧгліг табыстарың истіл турар, мында сірер аймах-пасха ойыннар ойнирзар, хомай нимее тартылбин, спортнаң айғас турарзар.
Тастып аймаа устағ-пастааның алғыстас сӧстерінең Елена Алексеенко чон алнынзар сыххан.
– Улуғ Сии аалның аарлығ чуртағҷылары! Пазох пір хаалағ иділ парды, чуртасты пос холына алып, чахсы саринзар кӧстеп одырарында, спортха тартылып, хазыхты пиктирiнде. Палалар хазии, тiзең, иң аарлығ. Аның ӱчӱн пiс прай кӱзiбiс саларға кирекпiс, – теен Елена Геннадьевна.
Мындағ алғыстас-сыйыхтас соонда хызыл лента хыплалған. Пу аарластығ киректе Хакасияның национальнай паза территориальнай политика министрi Галина Адыгаева, Тастып аймаа пазының пастағы орынҷызы Елена Алексеенко паза Улуғ Сии аалдағы школаның физкультура ӱгретчiзi Игорь Федянин араласханнар. Анаң оолах-хызыҷахтар, кӧглiг суулазып ала, спорт ачығынзар кӱрелізе халғаннар.
Улуғ Сии аалда чон чуртазы тилiпчеткенi харахха сах андох тасталған – наа туралар пӱдiрiлчелер, аал хонии техниказы асхынах нимес. Аннаңар пу спорт ачығы тикке пӱдiрiлбеен, аал аннаң андар ӧзер паза ӧңненер тiп сағынчабыс.
Тастып аймаа кiнiнде, тiзең, «Ада чир-суғ арачылағҷыларына» ачых 14 чарыста азылған. Ол iдӧк Хакасияның национальнай паза территориальнай политика министерствозының «Чонға кирек иң артых проект» мариинда сыйыхтығ орынға турызып, чуртасха кирiлген. Чаа-патриот кӧстеглiг орын ӱс чара пӧлiл парған. Олар Россияның Тирiглiг кӱстері войсколарының родтарына – Кии-десант войсколарына, Чаа-талай флодына паза Сухопутнай войсколарға – чарыдылчалар.
Хызыл лентаны сигіс частығ Лев Костяков паза Тастып аал чӧбінiң пазы Рустам Салимов хыплааннар.
Тастыптағы пастағы школаның кадет клазының ӱс ӱгренҷізі Россияның паза Хакасияның флагтарын ағылғаннар. Анаң хазнабыстың паза республикабыстың гимннерi ойнааннар. Соонаң Тастып аал чӧбінiң пазы чоох тутхан.
– Пастағы алғыстас сӧстерін Хакасия пазы – Хакасия правительствозының кнезi Валентин Олегович Коноваловха читірерге сағынчам. Мындағ марығлар иртірілчеткен сылтаанда ахча пирілче, амғы туста чонға сынап тың кирек проекттер кирілче. Алғызым читірчем республиканың национальнай паза территориальнай политика министерствозына, Тастып аал чӧбінің тоғынҷыларына, андағ улуғ паза кирек ниме иділ парған ӱчӱн. Алынҷа алғызым орындағы идінҷек Дмитрий Евгеньевич Круговыхха читірчем. Хайдағ даа мероприятиее, сурынысха прай кӱзін салып полысча. Пу ачых, хайзы пістің чаада чат халған чааҷыларыбысха чарыдылған, хаҷан даа пістiң, палаларыбыстың сағызында паза чӱреенде халар, – теен Рустам Салимов.
Чылығ сӧстернең чыыл парған улуссар iдӧк Хакасияның национальнай паза территориальнай политика министрі Галина Адыгаева айланған:
– Аарлығ чир-суғҷыларым, пӱӱн айдас паза морсымнығ ачых асчабыс. Ол палаларны чаа-патриот кӧңнiлiг ӧскірерге полызар. Аннаңар Рустам Хайраддиновичке алғызым читірчем, пістің ӧбекелерібістің кибірлерін тастабин, аннаң андар чуртасха киріп одырчатхан ӱчӱн. Патриотизм – пістің ханда. Президент Владимир Путин 2026 чылны Россияның чоннары пiрiкчеткен чыл тiп чарлаан. Республикабыстың устағ-пастаа чоннарның чуртазын чарых паза истіг идеріне кӧп кӱс салча, ол санда мындағ проекттерге ахчанаң полысханы полча. Сағынчам паза алғапчам піди ле кӱстеніп, чоннаң хада пірігіп, морсымнығ проекттернi аннаң андар чуртасха киріп одырарға.
Министр Галина Адыгаева идінҷек Дмитрий Круговыхха алғыстас пічиин читірген
«Ада чир-суғ арачылағҷыларына» ачыхта, тынанып одырарынаң пасха, патриотическай мероприятиелер иртiрiл турарлар, ол санда ветераннарнаң паза чааҷыларнаң тоғазығлар. Ӱгренҷiлерге паза чииттерге анда Россияның Тирiглiг кӱстерi пӱдiзiнеңер паза кибiрлерiнеңер пiлiп ал турарға чарир.
Хорадығлардаңар чоохтаза, пу ачыхты тӧстирiне республика бюджедiнең 850 муң салковай пирiлген, Тастыптың пу проектi марығда iкiнҷi орынға турысхан, аал чӧбi 200 муң салковайға чағын позытхан, аймах бюджедiнең – 50 муң салковай, спонсорлар полызии – 100 муң салковай.
Пу чыл тоозылғанҷа Хакасияда тиксi 24 проект чуртасха кирiл парарға кирек.
Сомнар авторни
Автор :
Евгения Табурчинова
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
