Часхаа тимненic пӱӱн пасталча
16.10.2026
Хабарлар
Селекторҷа чыылығ. Киҷее Хакасия пазы Валентин Коновалов муниципальнай пӱдiстер пастарынаң паза кӧстеглiг министерство-ведомстволар устағҷыларынаң чылығ пирҷең паза ӧрт сығызарынаң хорғыстығ тусты иртерiне чарыдылған теестегi чыылығны иртiрген
Хакасияның чурт-коммунальнай хоных паза энергетика министрi Максим Виноградовтың таниинаң, республикабыста чылығ пирҷең тус кӧрiлген оңдайҷа иртче.
Регионыбыста чарытхы пирчеткен тӧрт предприятие тоғынча. Оларның подстанцияларында тимненiс 92%-ке тиңнелче, сетьтердегi тимненiс – iдӧк 92 %-ке.
Коммунальнай объекттер тимненiзiнiң тиксi кӧзiдии 99,6 %-ке тиңнелче: чурт чыындызының – 99,6%, котельнайларның – 99,4%, чылығ пирҷең сетьтернiң – 99,7%, суғ пирҷең сетьтернiң – 99,8%.
Чыылығда ӧӧн хайығ тимненiс паспорттарын аларына айландырылған. Пӱӱнгi кӱнге суғ, чылығ, газ, чарытхы пирчеткен организацияларға паспортизацияны иртерiне тимдедеңер 23 акт пирiл парған, алты акт чардыхти тимде полчатханнаңар пирiлген. Оларда тыхтағ тоғыстары читiре толдырылғалахтар, сыныхтағ тоғыстары толдыразынаң апарылғалахтар паза тоғынҷылар саны читкiҷе нимес тiп таныхталған. Тоғыс организацияа «тимде нимес» тiп акт пирiлген: Асхыс аймаандағы Асхыс, Пилтiр, Ӧӧк пилтiрi аал чӧптерiндегi, Боград аймааның Тадар Тис, Знаменка аал чӧптерiндегi, Орджоникидзе аймааның Ӱӱс аал чӧбiндегi, Ағбан пилтiрi аймааның Тазоба пилтiрi аал чӧбiндегi, Сыра аймааның Жемчужнай поселок чӧбiндегi паза Тустығ кӧл аал чӧбiндегi. Организацияларға читпестернi хысха тус аразына тӱзедерге чахығ пирiлген.
Iдӧк муниципальнай пӱдiстер тимненiс акттарын алар тоғысты узаратчалар. Киҷеегi кӱнге андағ акттарны Алтай аймааның муниципальнай пӱдiстерi алғаннар. Пизi «тимде» актты алған, оларның санында Аршаннар, Ызых, Чынай, Новороссийскай, Очыр аал чӧптерi. Iкi аал чӧбiне – Хубачар паза Кӧк хайа аал чӧптерiне, «чардыхти тимде» акт пирiлген. Оларның, читпестернi тӱзедiп, «тимде» актты алып алар оңдайлары пар.
Iкi муниципальнай пӱдiстiң «тимде нимес» тiп акты алып аларларынаң чочыныс пар. Андар Орджоникидзе аймааның Ӱӱс аал чӧбi паза Ағбан пилтiрi поселок чӧбi кiрчелер. Муниципалитеттер читпестернi чох идер тоғысты апарчалар. Iдӧк iкi муниципалитет Ростехнадзорзар кирек пiчiктернi ыспаан тiп таныхталған – ол Асхыс аймаандағы Кызлас паза Ағбан пилтiрiндегi Тазоба пилтiрi аал чӧптерi. Тастып аймаа ысхан пiчiктернi позы нандыра айландырған.
Валентин Коновалов министрнiң искiриинде адалған аймахтар устағ-пастаана читпестернi тӱзедерiне улуғ хайығ айландырарға чахаан. Iдӧк Ростехнадзорның Кимдегi устанызының Хакасияҷа энергонадзор пӧлиинiң пастығы Сергей Терещенко ирткен чылның соонзар административнай сайбағлардаңар кодекссер алызығ кирiлгенiне чыылығ араласчыларының хайиин айландырған.
Аны хоостыра муниципальнай пӱдiстер пастары паза суғ, чылығ, газ, чарытхы пирчеткен организацияларның устағҷылары, iлезiне сығарылған читпестернi тӱзетпеен ӱчӱн, административнай нандырыға тартыларлар тiп таныхтаан ол.
Хара тас чыындызынаңар чоохтаза, республикада аның синi 59 муң тоннаа тиңнелче. Анзы нормативтерде кӧрiлген кирексiнiстiң 293 %-i. Ағбандағы ТЭЦ-тың хара тас чыындызы 100 %-тең асча.
Че 10 суткаа чидер хара тас чыындызын тӧстебеен организациялар парох тiп искiрген Максим Виноградов. Iди Сыра аймааның Жемчужнай аалындағы «Жемчужненское ЖКХ» МКП-ның хара тазы алты суткаа ла чидер тiп кӧрiлче, Коммунар аалдағы «Коммунаровский Коммунальщик» МКП-ның – пiр суткаа. Муниципалитеттер пастарына хара тастың синминчеткен чыындызын тӧстирiне улуғ хайығ айландырарға чахылған.
15 ӱртӱннең 14 чарысха теере Хакасияның чурт-коммунальнай хоных объекттерiнде 14 сайбағ таныхталған, ол санда пис саайлығ кирек. Ирткен чылның пуох тузына тӧрт сайбағ, ол санда пір саайлығ кирек, таныхталған полтыр. Iкi сайбағ, ол санда пiр саайлығ кирек, чылығ пирҷең системада таныхталған, 11 сайбағ, ол санда тӧрт саайлығ кирек, соох суғ пирҷең системада, пір сайбағ – чарытхы пирерiнде, мында саайлығ киректер таныхталбааннар.
Хакасияның ЖКХ паза энергетика министерствозында «iзiг» линия тоғынча. Чылығ паза iзiг-соох суғ чахсы пирiлбинчеткенi хоостыра +79130504923 телефонҷа сығдырадарға чарир.
Ӧрт сығызарынаң хорғыстығ тусха тимненiстеңер Хакасияның ГО, ЧС паза ПБ хазна комитедiнiң кнезi Владимир Карамашев чоохтаан. Аның сӧстерiнең, чыл пасталарынаң республикада 1227 ӧрт ӱзiрiлген, ол санда 280 чир-чайаандағы ӧрт, 22 кiзi ӱреен. Тиксi алза, Хакасияда ӧрт сығысчатханынаң палғалыстығ кирек пiр синде тудылча.
Ӧрт сығызарынаң хорғыстығ тусха тимненер пӧгiннең республиканың пос устаныс органнары аймах объекттерде паза аал-городтарда кирек мероприятиелернi иртiрчелер. Ол санда минерализованнай полосалар тимнелчелер паза нааҷылалчалар, ибiркi чирлер хуруғ оттаң, сӧп-саптаң арығлалчалар. Хазна комитедi пу тоғыстар толдырылчатханын тӧремiл хайығда тутча тiп таныхтаан Владимир Васильевич. 15 чарысха пу тоғыстар 281 аал-городтың санынаң 234-iнде толдырыл парғаннар, ол 83 %-ке тиңнелче. Пӱӱнгi кӱнге тоғыстар прай городтарда паза Алтай, Тастып аймахтарында тооза толдырыл парғаннар. Халған 47 аалда минерализованнай полосаларны нааҷылиры паза ибiркiнi сӧп-саптаң арығлиры чарыс айының 23-ҷi кӱнiне теере толдырыл парарға кирек. Владимир Карамашев ӧрт сығызарынаң хорғысты чох идер тоғыстарны уйан толдырчатханнар санында Сыра паза Ағбан пилтiрi аймахтарын адаан.
МЧС-тың Хакасияҷа ГУ пастығының орынҷызы Алексей Максименко Хакасия Россия МЧС-ының ӧӧн аппарадында алынҷа хайыға алылған тiп таныхтаан. Пӱӱл, ирткен чылдағы пуох тусха кӧзiдiглернең тиңнестiрзе, 5 %-ке ӧрт сығысханы ӧс партыр (58 ӧртке кӧп), оларда ӱреен кiзiлер саны 100 %-ке хозыл партыр (11 кiзее кӧп). Аның сылтаанда республикада чарыдығлығ паза профилактика тоғызын хоза апарар план тимнелче тiп таныхтаан Алексей Геннадьевич. Тимнел парза, ол муниципалитеттерзер ызылар. Аймахтар паза городтар пастарына пу сурыға iдӧк хайығ айландырарға чӧп пирiлген. Мероприятиелер планы толдырылчатханы хатығ сыныхталар теен А.Г.Максименко.
Чыылығны тоосчадып, Валентин Коновалов пӱӱнгi кӱнде ӧрт сығызарынаң хорғыстығ тусха тимненiс тоғыстарын хайди толдырарбыс, кӧрiк, хосхар айларын, сiлкер айының пастағы кӱннерiн iдӧк иртербiс тiп таныхтаан. Ол прайзынзар пу сурыға уғаа нандырығлығ хайарға тiп айланған.
Сомнар r-19.ru сайттаң
Автор :
Татьяна Кыштымова
| Пн | Вт | Ср | Чт | Пт | Сб | Вс |
| 25 | 26 | 27 | 28 | 29 | 30 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
