Школаа – 55 чыл
16.10.2026
Хабарлар
Асхыстағы школа-интернаттың директоры Олег Топоев Хакасияның ӱгредіг паза наука министрі Анатолий Бутенконаң хада
Танығлығ кӱн. 9 чарыста Асхыстағы школа-интернаттың пайрамы ирткен
Школаның тоғызы 1971 чылда пасталған. Ол чыллардаң сығара кӧп тус ирт парды. Школа пайрамына аалҷылар, ӱгренҷiлер, ӱгретчiлер, ӱгредiг ветераннары, хабарҷылар толдыра килгеннер.
Иң пурун чоох пирiлген ааллап килген улуғ пастыхтарға. Чон алнынзар сыххан Хакасияның Ӧӧркi Чӧп кнезi Cергей Сокол. Ол прай ӱгретчiлернi мындағ улуғ пайрамнаң алғыстаан, наа чидiглерге чидерiне iзенiзiн читiрген, улуғ кӱс салчатханнарға морсынып хосхан. «Мағаа илiг пис, сiрерге iдӧк 55 чыл», – хормачыланған ол халғанҷызында. Iдӧк Cергей Михайлович пӧзiк чидiглерге читкен ӱгретчiлерге сыйыхтар читiрген. Аның соонаң школаны алғыстирға сыххан Хакасияның ӱгредiг паза наука министрi Анатолий Бутенко. Ол Хакасия пазы – Хакасия правительствозының кнезi Валентин Коноваловтың паза позының адынаң ӱгретчiлернi чылығ сӧстернең алғыстаан. Паза Анатолий Алексеевич сидiк, аар тоғыстаңар чоохтаан, хайзын толдырчалар кӱлӱк, сыдамах ӱгретчiлер. Мында хазии уйан палалар ӱгренчелер нооза. Оларнаң пiр тiл алызып аларға оой ла нимес. Аннаңар пу школаның ӱгретчiлерi палаларны тоғыс, спорт пастыра алнынзар кӧдiрчелер. Министр кӧп ӱгретчее сыйыхтар читiрген.
Хакасияның Улуғлар чӧбi кнезiнiң орынҷызы Андрей Асочаков iдӧк кӧп чылығ сӧс тапхан школаның ӱгретчiлерiне, олғаннарға, ветераннарға. Чоохтаан, хайди кiчiг туста школа-интернаттың ӱгренҷiлерiнең хада ойнаҷаң. Пу школадаң сыххан саблығ кӱресчi, Сеулдағы олимпиаданың призеры Сергей Карамчаков. Ам даа саблығ ӱгренҷiлер пар сiрернiң школаңарда тiп хосхан ол. Андрей Серафимович «Род поғдархазы» орденнең иң кӱcтiг, кӱлӱк ӱгретчiлернi таныхтаан, хайзы позының родын тиксi чонға сабландырча. Андағларға морсынарға ла кирек! Олар ӱгретчi ле тоғызын нимес, пасха даа улуғ тоғыстарны апарчалар...
Анаң чон алнынзар Асхыс аймаа пазының орынҷызы Галина Новикова сыххан. Ол теен: «Пiстiң Асхыс аймаандағы ӱгретчiлер Хакас чирiнде иң чахсылар. Пасха город-аймахтар пiске тарынмазыннар». Iдӧк ол Асхыстағы школа-интернаттың ӱгретчiлерiне психолог, iҷе поларға кирек тiп хосхан. Школа-интернат палаларға iкiнҷi ибi полча нооза. Галина Викторовна iдӧк кӱстенҷiк ӱгретчiлернi, воспитательлернi, пол чуғҷаңнарны сыйыхтарнаң таныхтаан. Школазар ӧрчiлiг, ачых-чарых килчедерге алғаан.
Iдӧк школа-интернатты Асхыс аймааның ӱгредiг устанызының пастығы Ирина Петровна Кучугешева алғыстаан: «Сiрерге 55 час, ол – iкi пис. Сiрерге iдӧк писке ле тоғынарға кирек, палаларға чоллар азарға, чӱректерiн чылыдарға». Школа директоры Олег Асапович Топоевтi алғыстаан. Прай тоғыс пастыхтаң пасталча теен ол хоза.
Iдӧк чылығ сӧстер тапхан Асхыс аал чӧбiнiң пазы Марина Анжиганова. «Мында минiң ӱгренҷiлерiм, арғыстарым тоғынчалар, – теен ол. – Школаның ӧмезi кӱстiг, олғаннары спорт марығларында удаа араласчалар. Россия синiнде сыйыхтығ орыннар алчалар, пiрееде утып таа алчалар». Марина Алексеевна Роберт Рождественскийнiң кибелiзiн чоохтап пирген, хайзы ӱгретчiлерге чарыдылча. Аның соонаң Асхыстағы школа-интернаттың ӧмезiн алғыстирға сыхханнар хонҷых школаның устағҷылары. Олар кӧп сiлiг, чылығ сӧс тапханнар.
Ағбандағы Хакас книга издательствозының устағҷызы Андрей Иптышев школаның ӧмезiн хакас сӧстерiнең ӧтiг алғыстаан, оларға книгалар сыйлаан. Соонаң ээзi кiзее чоох пирiлген. Олег Асапович прай школаның ветераннарын, мының алнындағы школа устағҷыларын прай чӱреенең алғыстаан. Оларға тiрiг чахайахтар сыйлалған.
Чыылысхан чонға школа чуртазынаңар кино кӧзiдiлген. Школа ӧмезi аалҷыларға улуғ нимес концерт кӧзiткен. Кiчiг палаҷахтар теелбектенгеннер, улуғлары ӱгретчiлерiнең хада вальс салғаннар. Музыка школазының араласчылары оркестр хоостыра кӧглер чайғаннар. Миннең хада Ағбандағы ӱгретчiлер институдын тоосхан Нина Николаевна Топоева «Школаҷаам» сарынны толдыр пирген. «Хайди чахсы сарнабыстың, Нина!!!» – хормачыланыбысхам мин. «Мин школадаң сығара «Кӱн чахайағында» сарнап ла чӧргем, – теен ол. – Пу «Школаҷаам» сарын Ағбандағы Хакас национальнай гимназияның гимнi полча нооза. Чазыда чӧрчетсем, хулаамда пу сарын истiлче».
Школаның пайрамы тоозылчатханда, ӱгретчiлер ӧмезi хорнаң ӱгредiгдеңер чахсы сарын ырлабысхан. Олег Асапович Топоев, сарнап ала, дирижировать полған. Халғанҷызын школа ӧмезi аалҷыларны стол кистiнзер хығырған. Тосханҷа хакас iзiг чиизiнең азырааннар. Ӧңнен, кӱстен, алнынзар пар, Асхыстағы школа-интернат!
Сом Асхыс аймаа устағ-пастааның пресс-службазыни
Автор :
Радион Топоев
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 1 |
Кӱн таңмазы
Хакасияда
Россияда
Тилекейде
