Олар хайдағ даа сидiк тустарда, посха айабин, турғызылған пӧгiннернi толдырчалар
14.10.2026
Хабарлар
Михаил Побызаков ОМОН тоғынҷызына Хакасия пазының алғыстазын читірче
Сыйыхтас. Росгвардияның Хакасияҷа устааның ОМОН-ының базазында ОМОН-ның паза СОБР-ның тоғынҷыларын профессия ӱлӱкӱннерiнде чеестееннер. Пайрамнығ мероприятиеде Хакасия пазының орынҷызы Михаил Побызаков араласхан
Пу мероприятие ОМОН-ның тӧстелген кӱнiне (3 чарыста), СОБР-ның тӧстелген кӱнiне (8 чарыста) паза Россияның национальнай гвардия войсколары тӧстелгеннiң 10 чылына чарыдылған. Аны хоостыра Росгвардияның Хакасияҷа устааның ОМОН паза СОБР тоғынҷылары плацта стройға турыбысханнар. Прайзының сырайлары чабых, харахтары ла кӧрiнче. «Равняйсь, смирно!» команда пирiлген соонда Россияның гимнi толдырылған, флагштокча Россия флагы кӧдiрiлген.
Анаң спецназ тоғынҷыларынзар алғыстас сӧcтерiнең Хакасия пазының орынҷызы Михаил Побызаков айланған:
– Сiрернiң алынҷа кӧстеглiг под- разделениелерiң сыбыра арачыланыс киректерiнде пастағы линияда полча- лар паза правопорядокты iзестiг хадарчалар. Киректер сидiк полыбысса, сiрер ол олаңай нимес тоғысты постарыңа алчазар. 1990 чылларда хазна изел сыхханда, сiрер, постарыңа айабин, Чир-суубыстың суверенитедiн арачылап ал халғазар. Чоннар аразындағы террористтернi чох идерiне, Россия президентi Владимир Путиннiң чахығларын толдырып, спецназ отрядтары улуғ хозым иткеннер. Ниме ле полбаан ол тустарда, тӧстелген спецназ отрядтары чонға, хазнаа уғаа киректер, ciрернiң службаңар хорғыстарнаң сыбыра палғалыстығ, пiс сiрернең поғдархапчабыс. Мин сiрерге Хакасия правительствозы адынаң алғыс читiрчем, службада наа, пӧзiк чидiглер алғапчам!
Чооғын тоозып, Михаил Анатольевич cайбағларны тохтадарынҷа, хорғыстарны чох идерiнҷе ӧнетiн пӧгiннернi чалтырама толдырчатхан ӱчӱн, ол санда ӧнетiн чаа операциязы зоназында, «Сапсан» СОБР-ның паза «Монолит» ОМОН-ның тоғынҷыларына Хакасия пазының – Хакасияның правительствозы кнезiнiң алғыстазын читiрген.
Профессия ӱлӱкӱнiнең спецназ тоғынҷыларын iдӧк алғыстаан МВДның ветераны, полицияның отставкадағы подполковнигi Виктор Поленецкий.
Аннаң андар Росгвардияның Хакасияҷа устаа пастығының тоғызын толдырчатхан полиция полковнигi Владислав Харламов СОБР-ның паза ОМОН-ның сигiс тоғынҷызына геральдика танығларын читiрген. Андағ танығ беретке хазалча. Андағ II степеньнiг береттi кис чӧрер право пирiлче кӧрiл парған прай сыныхтағларны маңнаныстығ иртiбiскен тоғынҷыларға. Геральдика тании 2023 чылда тӧстелген, ол Росгвардияның спецназ тоғынҷызының махачы тудынызын, пӧзiк профессионализмiн таныхтапча.
Хайди мероприятиеде искiрiлген, Росгвардияның Хакасияҷа устааның СОБР-ында паза ОМОН-ында II степеньнiг геральдика таниин (кӱмӱc танығ) алған 35 тоғынҷы служба иртче. Амды олар прайзы I степеньнiг танығны (алтын танығ) алар сыныхтағлар иртерге позыдылғаннар. Алтын танығ краповай беретке тиңнелче, ол тоғынҷының иң пӧзiк тимненiзiн, сыдамағын паза махачызын киречiлепче.
Мындағ танығлар читiрiлген соонда СОБР-ның паза ОМОН-ның он тоғынҷызы службаны чахсы апарчатхан ӱчӱн Росгвардияның Хакасияҷа устаа пастығының алғыстас пiчiктерiн алған, iдӧк илееде тоғынҷы ахчалығ сыйыхтарға турысхан.
Ідӧк таныхтирға сағынчам, мының алнында пу ӧнетiн подразделениелерде хакас ооллар чох таа полғаннар, ам, тiзең, сыйыхтар алғаннар санында нинҷе-де хакас оол полған. Оларның ады-солаларын адирға чарадылбинча нооза. Iди, кӧзiдiмге, таныхтирға чарир «Монолит» ОМОН-ның тоғынҷызы, полицияның прапорщигi, хакас оол Артёмны, солазы «Топор». Ол iкi сыйых алған – Хакасия пазының алғыстазын паза II степеньнiг геральдика таниин (кӱмӱc танығ береттi). Анзы пiстiң ооллар спецназ подразделениелерiнде кӧптелчеткенiн кӧзiтче.
Мероприятие тоозылчатханда, Михаил Побызаковнаң хоза чоох алысхабыс.
– Пiстiң ооллар спецназ отрядта- рында тоғынчалар. Олар чапчаңнар, кӱстiглер, оларның тоғыстары уғаа кирек, 90 чыллардаң cығара хазна кӱзi тӱс парғанда, аймах хомай нимелер кӧп полғаннар, бандитизм дее полған. Мындағ отрядтар пiске амыр чуртас пирчелер, оларның тоғыстары сидiк, че олар ӧткiннер, кӱстiглер, пiстi хайраллапчалар. Аннаңар оларны пӱӱн алғыстапчам ӱлӱкӱннерiнең, службалары ниик парзын, турғызылған пӧгiннернi чахсы толдыр турзыннар, – теен Михаил Анатольевич.
Сом Дмитрий Сунчугашевти
Автор :
Николай Султреков
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 1 |
Кӱн таңмазы
Хакасияда
Россияда
Тилекейде
