«Хакас чирі» тоғынҷылары чиңісчілер санында
14.10.2026
Хабарлар
«Хакас чирі» газетаның сыйыхтығ орынға турысхан тоғынҷылары Алёна Тодозакова паза Виктория Арчимаева
Пірге диктант-2026. Хакасиядағы Н.Г.Доможаковтың адынаң национальнай библиотекада «Тӧреен тілім – хакас тілім!» пірге диктанттың салтарлары иділген
Хакас тілінҷе пірге диктант кибірли, Хакас тілі кӱніне чарыдылып, 4 ӱртӱнде республиканың ӧӧн библиотеказында ирткен. Республиканың пірге диктантын пазарында Хакасия школаларының, Н.Ф.Катановтың адынаң национальнай гимназияның ӱгренҷілері, оларның іҷе-пабалары, ӱгретчілері паза пасха даа кізілер араласханнар. Тиксі 67 кізі. Ідӧк 159 кізі онлайн пазар оңдайнаң тузаланған.
Пӱӱл саблығ хакас писатель, ученай, хазна паза халых деятельі Николай Георгиевич Доможаковха 110 час толарҷых. Пу танығлығ кирек хоостыра республикада аймах-пасха мероприятиелер кӧп иртчелер, 2026 чылның ікінҷі чарым чылында ӧӧн мероприятиелернің пірсі «Тӧреен тілім – хакас тілім!» пірге диктант полған. Ол ідӧк саблығ хакас писательнің 110 чазына чарыдылған. Хакас тілінҷе пірге диктантты пазарын «Н.Г.Доможаковтың адынаң национальнай библиотека» ХР ГБУК-зы тимнеп иртірген. Диктантха Николай Георгиевич Доможаковтың «Ыраххы аалда» романынҷа пазылған статьяның ӱзігi алылған. Аның авторлары – ХакНИИЯЛИ-ның ученайлары Нина Майнагашева паза Лариса Челтыгмашева.
Ӱр ниместе, 12 чарыста, республиканың пірге диктантының салтарлары иділген – чиңісчілер адалған паза сыйыхтар читірілген. Пайрамнығ сыйыхтас республиканың ӧӧн библиотеказында ирткен.
Хайди искір пирген піске Н.Г.Доможаковтың адынаң национальнай библиотеканың ӧӧн библиотекарьы Эльвира Торокова, пірге диктант пазарының салтарларынҷа чиңісчілер пол парғаннар:
паcтағы орын – Елена Сагатаева, Н.Ф.Катановтың адынаң Хакас национальнай гимназияның хакас тілі ӱгретчізі;
ікінҷі орын – Виктория Арчимаева, «Хакас чирі» газетаның корректоры;
ӱзінҷі орын – Алёна Тодозакова, «Хакас чирі» газетаның корректоры паза Матвей Доможаков, Н.Ф.Катановтың адынаң Хакас национальнай гимназияның ӱгренҷізі.
Таныхтирға кирек, «Хакас чирі» газетаның тоғынҷылары хакас тілінҷе пірге диктантты пазарында чыл сай араласчалар паза сыйыхтығ орыннарға турысчалар. Пӱӱл пістің ікі дее тоғынҷыбыс чиңісчілер санында пол парған. Хада тоғынчатхан арғыстарыбысты чиңіснең алғыстапчабыс!
Сом Дмитрий Сунчугашевти
Автор :
Альберт Толмашов
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
