Хакасияда тӧреен фестиваль аймах чирлернi аптапча
14.10.2026
Хабарлар
«Ах чарыхты ӱгреніп» марығның араласчыларын сыйыхтапчатхан туста
Культура. 12 чарыста Ағбандағы «Победа» культура кiнiнде «Кӱн чахайағы» чоннар аразындағы олған-чииттер паза сӧбiре кинозы фестиваль пайрамни азылған
Хакасияда танығлығ фестиваль iкiнҷi хати иртче. Пӱӱл ол улам алғыдылған. Хандых айында фестивальның мероприятиелерi Хызылчар крайының Дивногорск городында ирткеннер. Пу кӱннерде хонҷых Тува Республиканың чуртағҷылары чарых ӱлӱкӱнде араласханнар. Амды «Кӱн чахайағы» фестивальны Хакасия удурлапча. Ол пiстiң республикада чарыс айының 16-ҷы кӱнiне теере парар. Отыс азыра киноны Ағбан, Харатас, Саяногорск городтарда, Ағбан пилтiрi, Алтай паза Пии аймахтарында кӧзiдерлер. Чуртағҷылар комедиялар, узун паза хысха фильмнер, тун кӧзiдiглер, анимациялар кӧрiп аларлар.
Фестиваль пайрамни азылчатханына аарлығ аалҷылар кил парғаннар: «Лунтик», «Дракоша Тоша», «Монсики» мультфильмнернiң, «Улица Сезам» ойын сериалларының сценаризi Наталья Степанова; «Девчата 2.0», «Любовь сквозь время» сериалларның, «Зоя» паза «Врач» фильмнернiң режиссёры паза продюсерi, «Русь» продюсер кiнiнiң ӧӧн директоры Ирина Вегера; кинопродюсер Екатерина Зюзляева; «Глухарь», «Ясмин» сериалларның, «Камень» фильмнiң режиссёры паза сценаризi Вячеслав Каминский; режиссёр, сценарист, «Хакасфильм» киностудияның директоры, Хакасия культуразының саблығ тоғынҷызы Юрий Курочка.
Кӧрiгҷiлер залында чыылысхан чонзар «Кӱн чахайағы» фестивальның ӧӧн продюсерi Анна Пендраковская айланған:
– Пiрсiнде миннең фестивальда хайдағ тоғыстар апарчатханымны сурғаннар. Ипчi кiзi iҷе пол парза, аның иңнiне улуғ нандырығ артылча. Ол пала хайдағ даа чолҷа парза, аның пастағы хаалағлары ӱчӱн сӧбiре нандырча. Пiстiң фестиваль сӧбiре кинозына чарыдылча. Ол сынап мағаа палам осхас пiлдiрче. Харын, аны кӱстiг кӧстегҷiлер апарчалар. Фестиваль, пылтыр Хакасияның ӧӧн городында тӧстелiп, пӱӱл аймах регионнарны аптап парча. Ағбанның тании кӱн чахайағы полча, аннаңар мин фестивальны «Кӱн чахайағы» адап салғам. Часкалығ iҷе-пабалар иркеҷектерiнең хада кӱн чахайағы ӧсчеткен ачыхта ойнасчатханын кӧрерге ӧкерсiнiстiг нооза. Фестивальны чуртасха кирерге полысхан ӱчӱн Хакасияның культура министрi Светлана Анатольевна Окольниковаа улуғ алғызым читiрчем. Пӱӱл пiске Хакасияның пала праволарынҷа уполномоченнай Ирина Евгеньевна Ауль чахсы полысхан. Мин хазнаның регионнарынҷа кӧп чӧрчем. Хакасияда палаларға чахсы хайығ салылчатханын сизiнчем, – теен Анна Васильевна.
Пӱӱл фестивальда «Кинолаборатория» проект пастағызын на чуртасха кирiлдi. Чарыс айының 11-ҷі кӱнiнде «Фрегат» ӧзiс школазында улуғ опыттығ кӧстегҷiлернiң, «Кӱн чахайағы» фестиваль эксперттерiнiң паза чиит авторларның тоғызы «хайнап» пастаан тирге чарир. Чайаачы мастер-класстарда Ағбан паза Саяногорск городтарның, Ағбан пилтiрi посёлоктың, Тастып аймааның чиит сценаристтерi араласчалар. Мындағ тоғазығларны апарарға Хакасияның пала праволарынҷа уполномоченнай Ирина Ауль чӧп пирген.
– Прай ниме тиктең полбиндыр. «Кӱн чахайағы» чоннар аразындағы iкiнҷi кинофестиваль тузында иртiрiлче. Ноғадаңар? Пiстiң республика «Кичiг» сынағлығ федеральнай проектке кiрiп алған. Ол чуртастың сидiк оңдайларына урун парған саарбахтарға полызарына кӧрiлче. Кинофестивальда тоғынғаны палаларға чуртастың чахсы кӧзiдiмнерiн аларға полызар. «Кинолаборатория» проектте олғаннар улуғларның сурығларына нандырығлар табарлар, постары тоғас парған ол-пу сидiксiнiстернi пӧгерге кӱстенерлер. Пiс Хакасияның культура министерствозынаң, хада-пiрге тоғынып, палаларға полызарға тимдебiс, – теен Ирина Евгеньевна.
Iдӧк фестивальға удур «Ах чарыхты ӱгренiп» тиксi Россия синiндегi литература-хоос марии кибiрли иртче. Ол кiчiг паза чиит хоосчыларның паза кибелiсчiлернiң чайаачы марии полча. Чайғы тооза олғаннар «Хоос чайаачы» номинацияҷа чир-чайаанны, хайадағы хоостарны паза кӱн чахайахтарын пасханнар. Фестивальда танығлығ сыйыхтарны алғаннарның санында Ағбандағы Н.Г.Булакиннiң адынаң лицейнiң 9-ҷы класс ӱгренҷiзi Ирина Домогашева полған.
– Мин креатив индустриялары школазының «Дизайн» студиязынзар чӧрчем. Анда пу марығдаңар ӱгретчiм Евгения Владимировна Курченко чоохтап пирген. Мин анда аралазарға чарадыбысхам. Iди cуғ хазында кӱн чахайахтары аразында турчатхан хакас ибiҷектi хоостап салғам, – чарытхан ӧткiн хызыҷах.
Олғаннар, литература мариинҷа кибелiстер, нымахтар, кип-чоохтар пазып, «Поэзия» паза «Проза» чардыхтарға чарылғаннар. Иң турыстығларына iдӧк танығлығ сыйыхтар читiрiлген.
Пылтыр «Хакасфильм» киностудияның директоры Юрий Курочка «Ах чарыхты ӱгренiп» марығның чиңiсчiзi Вероника Васильеваның чооғына хын парған. Анаң ол аны хоостыра «Минiң нанҷым – Парыс» хысха фильмнi ах чарыхха сығарыбысхан. Пӱӱл пазох наа тоғыс режиссёрның кӧңнiне кiр парды. Анзын Юрий Викторович чазытта тутча, че килчеткен чылда наа фильм полар тiп iзендiрче.
Фестиваль азылған кӱнде «Победа» культура кiнiнiң улуғ залында чыылысхан чон, кӧбiзi олғаннар, «Минiң нанҷым – Парыс» фильмнiң тун кӧзiдиин кӧрген. Анда А.М.Топановтың адынаң Хакас драма театрының артизi Юлия Чепашева-Тиникова паза Асхыстағы М.И.Чебодаевтiң адынаң лицейнiң 3-ҷi класс ӱгренҷiзi Идегел Мамышева ӧӧн матыр полчалар.
Сом Дмитрий Сунчугаше
Автор :
Татьяна Тютюбеева
| Пн | Вт | Ср | Чт | Пт | Сб | Вс |
| 24 | 25 | 26 | 27 | 28 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
