Пірге тоғынарын ӱзӱргеннер
14.10.2026
Хабарлар
Хазна Думазының депутады Александр Штыгашев
Тоғазығ. Хакасия пазы Валентин Коновалов Россияның Хазна Думазының наа табылған депутады Александр Штыгашевнең тоғазығ иртірген
Александр Штыгашев чағынғы пис чылда Россия парламентінің алтындағы палатазында республиканың паза аның чуртағҷыларының кирексіністері ӱчӱн турызар. Регион устағҷызы аны депутатха табылғанынаң алғыстаан, ідӧк республикаа туза ағыларында тӱзімніг тоғыс алғаан.
Тоғазығ тузында олар пірге тоғыстың ӧӧн кӧстеглерін ӱзӱрібіскеннер. Кӧзідімге, Валентин Коновалов федеральнай бюджетті ӱзӱрерінде паза аларында Хакасияның кирексіністерін санға алары уғаа киректелчеткенін таныхтаан.
Республика пазы нинҷе-де сурыға хайығ саларға сурынған, хайзыларын пӧгіп аларына регион ӱлгӱлерінің кӱстенізі ле нимес, че ідӧк федеральнай законодательствоны алыстырары киректелче.
– Хазна даа, республика даа пӱӱн оой нимес тусты иртчелер, кӧп хығыртыға урунчалар. Пар сурығлар, хайзыларын регион синінде ле пӧк полбассың. Мында піcке федеральнай синде хабазығ киректелче. Киртінчем, пірге кӱстеністернең, хада тоғынып, піс кирек чарадығларны таап аларбыс, – теен Валентин Коновалов.
Александр Штыгашев республика правительствозынаң паза Хакасиядаң сығара сенаторларнаң пірге тӱзімніг тоғынарға тимде полчатханын искірген, ол санда федеральнай законодательствоны чахсыландырар сурығларҷа:
– Табығлар тоозыл парған. Партия пістің пір – Хакас Республика. Мин хада тоғынарға тимдебін. Сірер турғысхан пӧгіннерні піс Александр Аркадьевич Жуковнаң паза Олег Александрович Земцовнаң хада тоғынып, федеральнай синде пірге пӧгерге кирекпіс. Интригалар чох, республикаа туза ағылып тоғынарға кирек.
Таныхтирбыс, Александр Штыгашев, пір мандаттығ округча табығҷыларның 40,68 % ӱнін чыып, депутатха табылған. Ікінҷі орында КПРФ сығарған кандидат Валерий Старостин пол парған (22,54 %).
Партия списоктарынҷа КПРФ Хакасияда 26,32% ӱн чыып алған. Россия регионнарын алза, ол КПРФтың иң пӧзік салтарларының пірсі.
Сом r-19.ru сайттаң
Автор :
Хакасия пазының паза Хакасия правительствозының пресс-службазы
| Пн | Вт | Ср | Чт | Пт | Сб | Вс |
| 30 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
