Чонның чайаачызы кӧдiре ӧс парған
14.10.2026
Хабарлар
«Тарина» бал теелбегі ӧмезінің абахайлары «Чарыхтаң тӧрееннер» теелбекті толдырчалар
Культура. С.П.Кадышевтiң адынаң чон чайаачызының национальнай кiнi 88-ҷi сезонын «Чылтыстарны чарытчабыс» сiлiг концертнең асхан
Чыл сай Хакасияның ӧӧн культура учреждениезiнiң пiрсi – С.П.Кадышевтiң адынаң чон чайаачызының национальнай кiнi – наа «чылтызахтарны», iлезiне сығарып, чайаачы чолҷа ипти апарып, ӧскiрiп одырча. Культура тоғынҷылары, наа чапсых нимелер сағын таап, республиканың чуртағҷыларын хайхастығ иирлерiнең сыбыра чапсытчалар. Тирең пiлiстiг кӧстегҷiлернiң холында чайаачы устарын таптапчатхан чиит артисттер сiлiг сарын-теелбектерiнең хынған кӧрiгҷiлерiне ӧрiнiс сыйлапчалар. Оларның сылтаанда пiстiң Чир-суубыста искусство iзестiг тилiпче.
Танығлығ кӱнде Хакасияның культура министрiнiң орынҷызы Лариса Киштеева наа тоғыс сезонына ах чол алғирға чон алнынзар сыххан.
– Пӱӱл культура учреждениезi 88-ҷi чайаачы сезонын асча. Пiс прайзы пiлчебiс, сигiс сан тоозылбас-парбас танығ полча. Мында, тiзең, ол iкi сан хости турча, аннаңар анзы пик часканы таныхтапча. Полған на пала – ол кiчiг тилекей. Аның тириин синеп алар ӱчӱн, кӧстегҷi паза ӱгретчi улуғ тоғыс апарчалар. Культура учреждениезiнiң сценазында кiчiг «чылтызахтар» пастағы хаалағ идiп пастапчалар. Сала улуғлары пӧзiк устығ актёрларнаң тиңнең тиңе тоғынчалар. Анзын пic Чыл пазы паза Ӱртӱн тойы ӱлӱкӱннерде чахсы кӧрчебiс. Пӱӱл Тун пайрам уғаа танығлығ полды. Ол Россия чоннары пiрiкчеткен чылға, iдӧк Хакас Республика тӧстелгеннең 35 чылына чарыдылған. Аннаңар ӱлӱкӱннi тимнеен культура тоғынҷыларына улуғ алғызыбыс читiрчебiс, – теен Лариса Юрьевна.
Анаң С.П.Кадышевтiң адынаң чон чайаачызының национальнай кiнiнiң тоғынҷыларына Хакасияның культура министерствозының Аарластығ паза алғыстас пiчiктерi читiрiлген. Сыйыхтастар соонаң «Чылтыстарны чарытчабыс» концерт аннаң андар узарадылған. Сценазар, теестезiп, «Чон кӧглерi», «Кӱн чахайағы», «Саяночка», «Тарина», «Медуница» ансамбльлар, «Алтыр» мода театры, «Хайджи» эстрада ӧмезi, «Арон» студия, Шрамконың адынаң хор, «Час ханат», «Ынархас» паза «Айас» олған студиялары сыхханнар.
Чайаачы иир парчатханда, пiс «Ынархас» олған теелбек студиязының хоос устағҷызы, Россия культуразының саблығ тоғынҷызы Елена Шарайның таңдағы пӧгiннерiнеңер пiлiбiскебiс.
– Пӧгiннер кӧп. Пӧзiк чайаачылығ балетмейстерлер Марина Кобыжакова паза Александра Анжиганова наа теелбектер турғызарлар. Пiстiң ынағ ӧмезер наа балетмейстер Алина Угдыжекова хозылған. Ол уғаа чиит, че узы пӧзiк. Позы «Ынархассар» кiчiгдең сығара чӧрген.
Пӱӱнгi кӱнде «Ынархас» студиязар 130-ча пала чӧрче. Прайзы чайаачылар. Iҷе-пабалар иркелерi сiлiг паза тузалығ кирекнең айғасчатханнарын чахсы оңарчалар, аннаңар пiске полысчалар. Палаларнаң хада тоғынарға истенчебiс. Пiстiң репертуар пай, – ӱлескен ол.
Елена Шарай позынзар чӧрчеткен олғаннарны хакас тiлiн пiлерге кӱстепче. Олар, Хыдатсар, Кореязар парзалар, андағы чон пос тiлiнең матлама чоох тасчатханына тың морсынчалар.
– Мин позым олған тузында хакас тiлiн матлама пiлҷеңмiн. Iҷе-пабамнаң хада ӱc-тӧрт чылҷа Асхыс чоғархы аалда чуртаабыс. Анда саңай хакастар нооза. Хада ойнап, саңай хакастасчаңмыс. Аның ӱчӱн позыма тың поғдархаҷаңмын. «Ынархас» студиязар чӧрчеткен олғаннарымнаң кем хакас тiлiн ӱгренче тiп сур ла салчам, – чоохтапча Елена Ивановна.
Республиканың чуртағҷылары С.П.Кадышевтiң адынаң чон чайаачызының национальнай кiнi иртiрчеткен концерттерге, танығлығ ӱлӱкӱннерге хынып чӧрчелер. Ағбан городтың чуртағҷызы Светлана Тыгдымаева пiди тiпче:
– Мин Кадышевтiң адынаң культура кiнi хыринҷа удаа ирт чӧрчем, аннаңар тасхархы килкiм афишаларда хайдағ иирлер поларын харахсын салчам. 9 чарыста концерт поларын кӧр салғанымдох, сала маңзыри кассадаң билет алып алғам. Пiстiң чон чайаачызынаң пiди кӧдiре ӧс парғанына тың ӧрiнчем. Хакас чирiн сабландырҷаң «чылтызахтарыбыстың» саны улам кӧп полып одырзын.
Сом Олег Ковалёвти
Автор :
Татьяна Тютюбеева
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
