Ӱзӱрігде – кӱскӱ-хысхыны иптiг иртері
09.10.2026
Хабарлар
Селекторҷа чыылығ. Киҷее Хакасия пазы Валентин Коновалов чылығ пирҷең тусха паза кӱскӱ-хысхыдағы ӧрт сығызарынаң хорғыстығ тусты иртерiне чарыдылған теестегi чыылығны иртiрген
Хакасияның чурт-коммунальнай хоных паза энергетика министрi Максим Виноградовтың искiриинең, пӱӱнгi кӱнге прай республикада чылығ пирiлiп пастабысхан. Тоғыстар кӧрiлген оңдайҷа иртчелер. Амғы туста муниципальнай пӱдiстер чылығ пирер тусха тимненiс паспорттарын алчалар. Чыылығда хайзыда пу тоғысты тузында толдырча, хайзы сӧӧ тартча тiп таныхталған. Министр прай пiчiктер 15 кiчiг хырласха тимнел парарға киректер тiп искiрген.
Амғы тусха республикада хара тас чыындызы 59 муң тоннаа тиңнелче тiп таныхталған. Ол кӧрiлген синнiң 293 %-iне тиңнелче. Ағбандағы ТЭЦ-тың хара тас чыындызы 100 %-тең асча.
Пірге тоғынчатхан диспетчер службазынзар ызылчатхан сан- нарны кӧрзе, хара тастың синминчеткен чыындызын тӧстирiне алынҷа хайығ айландырарға кирек мындағ чылығ пирҷең организацияларға: Сыра аймааның Жемчужнай аалындағы «Жемчужненское ЖКХ» МКП-ға, анда хара тас чыындызы ӱс суткаа чидер тiп кӧрiлче, Коммунар аалдағы «Коммунаровский Коммунальщик» МКП-ға, чыынды – iкi суткаа, Сон пилтiрi аалындағы «Теплоресурс» ООО-ға, чыынды – сигiс суткаа. Муниципальнай пӱдiстер пастарына пу сурығны iдӧк тӧремiл хайығда тударға чахығ пирiлген.
Чылығ пирiлiп пастааннаң чуртты сыныхтир хазна органнарынзар Ағбан, Абаза, Саяногорск, Харатас городтарның, Ағбан пилтiрi поселоктың паза Асхыс, Тадар Тис ааллар чуртағҷыларынаң чылығ паза iзiг суғ пирiлчеткенi хоостыра 28 айланыс кiрген. Ол айланыстарҷа специалисттер тоғынчалар. Iдӧк чылығ пирҷең организацияларнаң хада чылығ пирҷең объекттернiң паза туралар iстiндегi чылығ пирҷең системаларның тӱзiмнiг тоғызы сыныхталча, кирек полза, тӱзедiглер кирiлче.
Хакасияның ЖКХ паза энергетика министерствозында «iзiг» линия тоғынып пастабысхан. Специалисттер чуртағҷыларның чурт-коммунальнай хоных сурығлары хоостыра айланыстарын хараа-кӱнӧрте алчалар.
Iдӧк Максим Виноградов чооғында муниципальнай пӱдiстегi ЖКХ сурығларынаң айғасчатхан специалисттернiң квалификациязын кӧдiрерге кирек полчатханына пазох хайығ айландырған. Ӱгредiг Ростехнадзорның ӱгредiг-методика кiнiнде иртче. Аны иртерге кирек полчатханы – Россияның пӱдiрiг паза ЖКХ министерствозының кирексiнiзi.
Кӱскӱ-хысхыдағы ӧрт сығызарынаң хорғыс пар тусха тимненiстеңер Хакасияның ГО, ЧС паза ПБ хазна комитедiнiң кнезi Владимир Карамашев чоохтаан. Аның сӧстерiнең, чыл пасталарынаң республикада 1207 ӧрт ӱзiрiлген, ол санда 280 чир-чайаандағы ӧрт, 19 кiзi ӱреен. Пу кӧзiдiглер ирткен чылдағы пуох тусха саннарнаң сала пӧзiк арахтар. Тиксi алза, Хакасияда ӧрт сығысчатханынаң палғалыстығ кирек пiр синде тудылча.
Ӧрт сығызарынаң хорғыстығ тусха тимненер пӧгiннең республиканың пос устаныс органнары аймах объекттерде паза аал-городтарда кирек мероприятиелернi иртiрчелер. Алынҷа хайығ минерализованнай полосаларны тимнирiне паза нааҷылирына салылча. Хазна комитедi пу тоғыстар толдырылчатханын тӧремiл сыныхтапча. 7 чарысха пу тоғыстар 281 аал-городтың санынаң 176-да толдырыл парғаннар. Халған 105 аал-городта минерализованнай полосаларны нааҷылиры паза ибiркiнi сӧп-саптаң арығлиры чарыс айының 20-ҷi кӱннерiне теере толдырыл парарға киректер. Владимир Карамашев ӧрт сығызарынаң хорғысты чох идер тоғыстарны уйан толдырчатханнар санында Сыра, Орджоникидзе, Ағбан пилтiрi аймахтарын адаан. Iдӧк комитет устағҷызы муниципальнай пӱдiстер пастарынзар кресен-фермер хоныхтары паcтарынаң, дача паза сад пiрiгiстерiнiң чирлерiнде хуруғ отты, сӧп-сапты чох идерге кирек полчатханнаңар профилактика паза чарыдығлығ тоғысты апарарға кирек тiп айланған.
Чыылығда адалған муниципальнай пӱдiстер пастары iдӧк чоох тутханнар, читпестернi тӱзедер ӱчӱн, хайдағ тоғыстар апарылчатханынаңар сан пирiс иткеннер, iдӧк оларны чох идер тустарны адааннар.
Хакасия пазы, чыылығны тоосчадып, тоғыстарны сӧӧ тартпасха, пiчiктернi кӧрiлген тусха тимнирге, чуртағҷыларының айланыстарынҷа табырах тоғыныбыс турарға чахаан.
Автор :
Татьяна Кыштымова
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
