Пастағыларның саны ӧсче
09.10.2026
Хабарлар
«Пастағылар чӧрімі» олғаннарның паза чииттернің региондағы пӧлиинің уcтағҷызы Эдуард Федосов сан пиріс итче
Сан пиріс. Хакасияның правительство туразында «Пастағылар чӧрімі» олғаннарның паза чииттернің хазна-халых тиксі Россия чӧрімiнің региондағы пӧлии тоғызының 2026 чылның III чардығының салтары иділген
Чӧрімнің салтарын идер алнында, правительство туразында чыылған чонзар чӧрімнiң департамент устағҷызы Ольга Негрова видео палғалысча айланған. Аның чооғынаң, Хакасия ӱлгӱзі региондағы чӧрімге чахсы хабасчатхан сылтаанда, республикада аның пӧліктері кӧп азылча паза аның мероприятиелерiне илееде олған тартылча. Iдӧк Хакасия чалғыс регион полча, хайда чӧрімнің пӧлии чоннар аразындағы аэропортта азылған. Пӧлік аэропортта азылғаны – ол iдӧк олғаннарға паза чииттерге чахсы профориентация паза пасха регионнарға кӧзідім.
Хакасияның чииттер политиказы паза халых тиліс министрiнің тоғызын толдырчатхан Лилия Боргоякова республиканың чииттері чоннар аразындағы фестивальда араласханнаңар чоох тутхан. Ол пӱӱл Екатеринбургта ирткен. Республикада фестивальға парардаңар 670 азыра сурыныс пічии кірген. Таллағны читі оол-хыс иртіп алған, ол санда «Пастағылар чӧрімiнің» араласчылары. Фестивальда хазнаның 100 саарбағы араласхан. Олар аймах кӧстеглерҷе устарын сынааннар: спортта, наукада, культурада, медиада, IТ-да паза даа пасхазында. Фестиваль араласчылары анда аймах проекттер паза программалар тӧстеп алғаннар.
Теестегі фестиваль 2028 чылда Хызылчарда иртiрілері кӧрілче. Хакасия анда хатап аралазарға пӧгінче. Ағаа тимненіс пасталыбысхан. Анда аралазарға сағынчатхан чииттерге хайди даа англия тілін чахсы пілерге кирек паза аймах кӧстеглерде чидіглері ползын.
«Пастағылар чӧрімі» олғаннарның паза чииттернің хазна-халых тиксі Россия чӧрімінің республикадағы пӧлиинің кнезі Эдуард Федосов региондағы чӧрім тоғызының тиксі салтарын искірген.
Хакасияның «Пастағылар чӧрімi» халых чӧрімiнзер кірерге сағынчатханнарның саны 35 процентке ӧс парған. Олар ӱгренҷілер, студенттер, ӱгредіг кӧстегҷілерi паза даа пасхазы. Ағаа хоза чӧрім мероприятиелері алғыдылча. Республикада «Флагманы возможностей», «Медиа-степь», «Школа безопасности», «Родные – Любимые», «Выставка профессий», «Твой Первый маршрут», «Классные встречи» паза даа пасха регион паза Россия синіндегі проекттер чуртасха кирілчелер. Ирткен чылда хоза проекттер кирілері кӧрілче. Кӧзідімге, «Медиашкола». Анда олғаннарны, хабарҷы поларға ӱгредіп, искіріглерні орта сығарарға ӱгредерлер. Пу паза даа пасха проекттер чағдапчатхан чылда тоғынып пастирлар.
«Пастағылар чӧрімi» халых организациязының региондағы пӧлиинің улуғ вожатайы Савелий Хвалов ирткен чайғызын чӧрім олғаннарына профильліг сменалары хайди ирткенін чарыт пирген. Олар чайғы туста кӱнӧрткі паза го- род тастындағы лагерьлерде тынанғаннар. Палалар ара зында льгота категориязына кірчеткеннер илееде полған. Сменада тоғынар вожатайлар, тізең, азынада ӧнетін ӱгредіг курстарын ирткеннер. Олғаннар ӧӧнінде Алтай аймаандағы «Беркут» олған лагерьінде тынанғаннар.
«Пастағылар чӧрімі» олғаннарның паза чииттернің тиксі Россия чӧрімі хазна президенті Владимир Путиннің чарадиинаң тӧстелген.
Правительство туразында ирткен чыылығда Хакасия пазы Валентин Коновалов iдӧк «Зарница 2.0» чаа-патриот ойынында пӧзік тимненіс кӧзіткен ӧмені сыйыхтаан. Орджоникидзе аймаандағы «Патриот РХ 10» ӧме, пӱӱл Хакасия алнын алып, махтаға сыххан. Аннаң пасха, правительство туразында Илбек Чиңicтің 81 чылына чарыдылған «Пабаларның махачылары – оолларының ханаттары» чӧрімде ӧткін араласхан «Пастағылар чӧрімiнің» чииттерін таныхтааннар.
Сом Дмитрий Сунчугашевти
Автор :
Оксана Котюбеева
| Пн | Вт | Ср | Чт | Пт | Сб | Вс |
| 28 | 29 | 30 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
