Топливо синi хызырылчатханы таныхталча
07.10.2026
Хабарлар
Чыылығ тузында
Кӱн сурии. Киҷее Хакасияның ӱлгӱ туразында республика пазы Валентин Коноваловтың устаанынаң топливо суриин хайығда тударынҷа штабтың теестегi чыылии ирткен
Хакасияның экономика тилiзi министрiнiң орынҷызы Владимир Наумкиннiң искiриинең, республикада топливо садылчатханынаң палғалыстығ сурығ ам даа сидiксiнiстiг, заправкаларда теестер хызырылбинча. Хакасияның топливо операторлары оларға ВИНК-тардаң топливо читiрiлбинче тiп таныхтапчалар.
5 чарысха республикада 92 маркалығ бензиннiң чыындызы 2,5 муң тоннаа тиңнелген, ол ортымахти 11 суткаа чидер тiп кӧрiлче, 95 маркалығ бензин – 1,6 муң тонна, 7 суткаа, дизель топливозы – 5,5 муң тонна, 26 суткаа. Ағбандағы нефтебазалар дизель топливозынаң 100 %-ке толдырылғаннар, бензиннең – 40 %-ке. Харатаста нефтебазаларда чыындылар чоғыл даа тiп таныхталған, топливоны ағылзаларох, ол садыл парча. Полызығ, арачыланыс паза коммунальнай службаларға топливо читкіҷе пирiлче.
Владимир Александрович республиканың экономика тилiзi министерствозы топливо суриин, алынҷа идiнҷектернiң тоғызын хайығда тударын, саннарны топливо-энергетика комплексiнiң ӧӧн диспетчер устанызынзар ызарын узаратча тiп чоохтаан. Iдӧк Хакасиязар топливоны читiрерi хоостыра Россия правительствозынаң, энергетика министерствозынаң паза ВИНК-тарнаң хада-пiрге тоғыс тӧремiл апарылча.
Ирткен неделяда алынҷа идiнҷектернең топливо паазын кӧрiлген синде тударынҷа хоза ӱс чӧптезiг тимнел парған. Андар Харатастағы идiнҷектер хозылғаннар. Пӱӱнгi кӱнге андағ 10 чӧптезiгде хол салылған – ол республикада тоғынчатхан идiнҷектернiң 60 %-i. Чыылығда республика федеральнай штабтың прай чахығларын толдыр салған тiп таныхталған.
Хакасиядағы УФАС-тың устағҷызы Ксения Лебедева топливаа паалар алысчатханынаңар чоохтаан. Розницаа садығда алызығлар пар теен ол. Iди «Роснефть» заправкаларда 92 маркалығ бензиннiң паазы 10 ахчаа ӧс парғаны таныхталған, дизель топливозының – 0,1 %-ке. «Газпромнефтьте» 92 маркалығ бензиннiң паазы 7 ахчаа ӧс парған, 95 маркалығ бензиннiң – 5 ахчаа.
Кiчiг опт садығларын алза, ВИНК-тарның паалары алыспаан. Республикадағы «ХТК» килкiм компания пааларны сала тӱзiрiбiскен тiп таныхталған – 95 маркалығ бензин 3,5 %-ке, дизель топливозы 21 артиинаң процентке. Ксения Александровна ДТ паазы тӱсчеткенi ол чайғы топливозы полчатханынаң палғалыстығ полар тiп искiрген.
Алынҷа идiнҷектернiң заправкаларында паалар iдӧк алысчалар. Ирткен неделяда хай пiреезiнде 92 маркалығ бензиннiң паазы 5 %-ке читiре тӱс парғаны таныхталған. Тиксi алза, пу бензин пiр литр 89 – 115 салковайға садылча. 95 маркалығ бензин iдӧк ниик арах пол парғаны таныхталған – 0,5 %-ке. Пiр литр ӱчӱн 96 – 125 салковай сурчалар. Дизель топливозы тиксi тӧртче процентке тӧбiн пол парған – пiр литр 83 – 110 салковайға садылча.
Хакасияның антимонопольнай службазы пааларны хайығда тудар тоғысты узаратча. Тувазар топливо сатчатхан килкiм компания кiчiг оптча садылчатхан 92 маркалығ бензиннiң паза дизель топливозының паазын тың ӧскiрiбiскен тiп iлезiне сығарылған. Идiнҷекке топливо паазын тӱзiрерге кирек полчатханнаңар сизiндiрiг пирiлген, ағаа апарылған тоғыс хоостыра сан пирiс идерге кирек.
Хакасия пазының орынҷызы Дмитрий Бученик ырах орныхчатхан аалларзар топливоны читiрерiнең палғалыстығ кирек хайди парчатханнаңар чоохтаан. – Халғанҷы iкi неделя аразына прай республикаҷа топливо синi хызырылчатханы таныхталча. Аннаңар аймахтарда пу сурығ iдӧк оой нимес. ВИНК-тарның заправкалары республика чуртағҷыларының кирексiнiстерiн тоозазынаң толдыр полбинчалар. Аннаңар пiс кӱннең кӱнге теестер ӧсчеткенiн кӧрчебiс. Оларға заправкаларзар топливоны читiрер оңдайларын чахсыландырарға кирек, – теен ол.
Сорығдағы идiнҷек А.И.Середаның заправказынзар iкi неделяда пiр хати топливоны «Роснефть» читiрче. Приисковайзар топливоны «Газпромнефть» читiрче, Орджоникидзе аймаанда «КНП» тоғынча. Анда сағам топливоның кирек синi пар. Че тиксi республикада топливо синi синчеткен сылтаанда, оларда iдӧк топливо синi хызырылар тiп таныхтаан Дмитрий Анатольевич.
Тимiр чолларҷа топливо читiрiлчеткенiнеңер Хызылчар тимір чолының Ағбандағы пӧлиинің пастығы Евгений Новокрещенов искiрген. Аның таниинаң, 5 чарысха Ағбандағы регионның станцияларынзар дизель топливозын читiрер 515 вагон кӧрiл парған, ол 30 муң тонна ДТ. 60 вагон – 4 муң тонна, таарлал парған. Амғы туста станцияларда чӧрiсте 38 вагон. Бензинге 475 вагон кӧрiл парған, ол 25 муң тоннаа чағын. 63 вагон – 3,5 муң тонна, таарлал парған. Амғы туста 115 вагон чолда тiп таныхталча. Евгений Анатольевич iдӧк вагоннардағы таарлағны албин, оларны тутчатхан компанияларны адаан. Кӧзiдiмге, Сорығдағы ГОК-та дизель топливозы таарлалған вагоннар турча. Ағбанда «КНП» бензиннiг iкi вагонны ӱс сутка азыра тут парир, идiнҷек В.В.Городилов дизель топливозы таарлалған тӧрт вагонны ӱс сутка азыра позытпинча тiп таныхталған.
Чыылығда Хакасияның аал хонии паза ас-тамах министрiнiң пастағы орынҷызы Александр Башков Шира аймаанда «Роснефть» заправказы ветеринар службазына, топливо карталары пар даа полза, бензиннi 30 ла литр позытча тiп сурығны кӧдiрген. Орджоникидзе аймаандағы ветеринар службазы топливоны iдӧк анда алчаттыр. Хакасия пазы сурығны, штабтың протоколына кирiп, табырах пӧгерге чахығ пирген. Амғы туста малларның вакцинациязы парча, аннаңар аны соона саларға чарабас, республикада малларның хорғыстығ ағырығларын тараттырбазы анзынаң кӧнiзiнең палғалыстығ теен ол.
Iдӧк чыылығда заправкаларның тыхтаға чабылчатханы ӱзӱрiлген. Ағбандағы Тельманның орамазындағы «Роснефть» заправкада тыхтағны килер неделяа чылдырыбыстырлар. Ол понедельниктең средаға читiре тоғынмас тiп кӧрiлче.
Автор :
Татьяна Кыштымова
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
