Чааҷы службазына Хакасиядаң 600-че кiзi парар
07.10.2026
Хабарлар
Хакасияның чааҷы комиссары, подполковник Сергей Спиридонов
Брифинг. Киҷее чааҷы службазына кӱскӱде хығыртар кампания пасталчатханы хоостыра Хакасияның чааҷы комиссары Сергей Спиридонов брифинг иртiрген
Хайди искiрген республиканың чааҷы комиссары, пӱӱл чарыс – улуғ хырлас айларында Хакасиядаң, чааҷы службазына хығыртып, войсколарзар 600 азыра кiзiнi ызары кӧрiлче. Амды Россияның законодательствозы хоостыра, чааҷы службазына хығыртылчатхан кiзiлер чыл тооза имнег сыныхтаан паза профессияҷа психология таллаан ирт поларлар. Пу наа оңдай хығыртығ пункттарының тоғызын нииктепче паза чааҷы службазына хығыртылчатхан кiзiлернiң качествозын кӧдiрче. Призывниктер, тiзең, армияа парар алнында прай кирек мероприятиелернi иптеп, кӧӧлҷе иртiрiбiзерлер.
Амды военкоматтарның тоғызы санға алар паза хығыртар киректер автоматизация чох идiлбинче. Хығыртығ мероприятиелерi чааҷыларны санға алчатхан реестрнең тузаланып апарылчалар. Аның полызиинаң прай тоғыстар тӱзiмнiг толдырылчалар. Iди, реестрнең тузаланып, пазылған повесткалар кiзiлерге ызылчалар, ағаа хоза олар электроннай кӧрiмде прайзына кӧрiндiре реестрде турғызылчалар. Олар турғызылғаннаңар искiрiглер «Хазна полызығлары» порталда пос кабинеттерiнзер ызылчалар.
Iдӧк пу системаның чахсы сари пар –отсрочкаларны кiзiнi араластырбин пирчеткенi. Кӧзiдiмге, студенттердеңер, iкi паза аннаң даа кӧп палалығ пабалардаңар, ИТ специалисттерiнеңер искiрiглер, хазна органнарының паза тоғыс пирчеткеннернiң искiрiглерiне тӧстенiп пирiлчелер. Ағаа хоза, «Хазна полызығлары» пастыра чааҷы санына ту- рыбызардаңар алай суурылардаңар, пiчiктерге алы- зығлар кирердеңер сурыныс пiчиин пирерге чарир. Андағ оңдай кiзiлернiң тоғызын истiг итче.
Чааҷыларны санға алчатхан реестрдегi искiрiглернi аларға чарир сайттағы пос кабинедiнде: реестрповесток.рф алай посха МФЦ-зар айланып. Пу тоғыс пiди апарылған сылтаанда, призывниктернi часхыда чааҷы службазын иртер орыннарзар ызары илееде ирте тоозылған.
Чааҷы службазына хығыртарынаң палғалыстығ мероприятиелерге кiзiлер чыл тооза хығыртылчалар. Ам андағ призывниктер пар, хайзылары служба иртер орыннарзар ызарын на сағыпчалар, олар чӱзерлеп саналчалар, кӧбiзiне чааҷы службазын иртер орыннарзар ызарға военкоматсар килерге киректеңер искiрiлген.
Хоза таныхтирға кирек: хығыртығ хоостыра чааҷы службазын иртчеткен чааҷылар ӧнетiн чаа операциязының пӧгiннерiн толдырарға Украиназар ызылбастар.
Амғы туста ӧнетiн чаа операциязының пӧгiннерiн толдырчатхан чаа частьтарынзар чааҷы службазын иртердеңер контракт идiп алған кiзiлер парчалар. Пӱӱл кӱскӱде служба тузы тоозылчатхан хығыртығҷа чааҷылар службадаң тузында позыдыларлар, олар иблерiнзер айланарлар.
Iдӧк таныхтирға чарир, хығыртыға тимненчеткен кiзiлер пос кӧңнiнең тӧстелген пiрiгiстерге кiр поларлар, че оларны чааҷы службазына алай альтернативнай гражданскай службаа хығыртардаңар чарадығ чох ла полза. Олох туста, олар пос кӧңнiнең тӧстелчеткен пiрiгiстерде полчатсалар, оларның отсрочкаа право пар полча. Андағ отсрочка, олар постары килбезелер дее, призывниктiң киреендегi пiчiктерге тӧстенiп пирiлче. Iдӧк пос кӧңнiнең тӧстелген пiрiгiсте полчатханнаңар чаа частьынаң справка киректелче, анда контракт тузы хаҷан тоозылчатханы кӧзiдiлче.
Амды призывниктер аразында ӧнетiн чаа операциязында аралазарға контрактча чааҷы службазына парчатхан чииттер кӧп.
Таланттығ оолларға армияда алынҷа оңдайлар пар, кӧзiдiмге, наука подразделениелерi, андағ призывниктерге 18 наука подразделениезi тӧстелген, оларның 8-i Краснодар городтағы «ЭРА» технополисте. Наука тоғызына тартылчатхан таланттығ призывниктер санынаң кандидаттарны таллапчалар вузтарда паза военкоматтарда. Олар чааҷы службазына чарас поларға, профильҷе пӧзiк ӱгредiглiг, арачыланыс министерствозының кирексiнiстерi хоостыра апарылчатхан наука iстезiглерiнiң кӧстеглерiне килiзерге киректер.
Ам кӧп олған хазых оңдайлығ чуртасты таллапча паза спортнаң айғасча. Оларның спорт роталарынзар кiрiп алар оңдайлары пар. Спорт ротазынзар кiрiп аларға, ағаа олимп кӧрiмiнҷе спортча Россияның пiрiктiрiлген командазына кандидат поларға киректелче. Iдӧк ол спорт министерствозының списогына кирiлген поларға, хайзы арачыланыс министерствозынзар ызылча. Спорт ротазында служба иртерге сағынчатхан призывниктерге искiрiг ЦСКА-ның сайтында «Спорт паза армия» чардыхта турғызылых.
Хазнаның арачыланыс заказын толдырарында араласчатхан призывниктерге наука-производство подразделениелерi пар. Олар ОПК предприятиелерiнiң кадрлар кӱзiн хайраллир паза хазнаның арачыланыс заказын толдырарын ӧскiрер пӧгiннең тӧстелгеннер. Андағ подразделениелер тӧстирiн кирексiпчеткен предприятиелер саны сыбыра ӧсче. Ол подразделениелерзер служба иртер оолларны марығ хоостыра таллапчалар. Чиит специалисттер пӧзiк алай ортымах профессиональнай ӱгредiглiг, ОПК-ның предприятиелерiнде кирек специальностьтарда тоғынчатхан поларға киректер.
Хакасия призывниктерiнiң чаа специальнозын азынада алып алар оңдай пар, олар кӧңнiлерiне чатсыннар. Ам оларны ДОСААФ-тың ӱгредiг организацияларында таарлағ тартчаң автомобильнiң «С» категориялығ водительi паза кӱзi асхынах хысха салғахтығ радиостанция специализi специальностьтарҷа тимнепчелер. Призывниктернi хазна бюджедiнiң ахчазына тимнепчелер. Ағаа хоза водитель удостоверениезi ӱчӱн пошлина тӧлебинчелер, оларға пасха даа компенсациялар пирiлче.
1 чарыстаң сығара Хакасияның чааҷы комиссариадында iзiг линия телефоны тоғынча: 8(3902)34-13-08, iдӧк хығыртығ сурығларынҷа айланарға чарир орыннардағы военкоматтарзар.
Cом Дмитрий Сунчугашевти
Автор :
Николай Султреков
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
