Нина Леонченко –Ағбан пилтірі аймаа
07.10.2026
Хабарлар
Нина Леонченко, Ағбан пилтірі аймаа пазының тоғызына кіріп, сын тоғынарға молҷағ пирче
Наа устағҷы. 5 чарыста Ағбан пилтіріндегі Ю.А.Гагариннің адынаң Культура туразында республика, город-аймахтарның паза Ағбан пилтірі аймааның, аның аалларының ӱлгӱ органнарының кізілері чыылысханнар
Чонға чыылызарға сылтағ Ағбан пилтірі аймаа пазы тоғызына Нина Леонченконың кірчеткені. 20 ӱртӱнде, пірге табығ кӱнінде, Ағбан пилтірі аймааның пазына табығлар ирткеннер. Пис кандидаттың аразында Нина Леонченко иң кӧп ӱн чыып алған. Аннаңар Ағбан пилтірі аймааның ТИК кнезі Евгения Матейко, сценазар сығып, искірген:
– Ағбан пилтірі аймаа пазына табығларда 16238 табығҷы алай тиксі табығҷыларның 46,59 проценті ӱн пирген. Прай аймахта 34854 табығҷы санға алылған. Табығҷылар ӱн пирген соонаң ӱннер мындағ оңдайнаң ӱлестіріл парғаннар: ЛДПР партиядаң кандидат Николай Евгеньевич Васильев – 841 ӱн алай 5,18 процент, «Единая Россия» партиядаң кандидат Елена Владимировна Егорова – 6647 ӱн алай 40,93 процент, «Возрождение России» партиядаң кандидат Иван Юрьевич Кукарцев –523 ӱн алай 3,22 процент, «Коммунисты России» партиядаң Нина Сергеевна Леонтенко - 978 ӱн алай 6,02 процент, КПРФ-таң Нина Владимировна Леонченко – 6865 ӱн алай 42,28 процент.
«Хакас Республиканың муниципальнай пӱдістерiнің пастарын, представительнай органнарның депутаттарын табарынаңар» 65-ЗРХ№ республика законының 58-ҷі статьязы хоостыра Хакас Республиканың Ағбан пилтірі муниципальнай аймаа пазының табығлары ирткен паза сын полча тіп саналча. Нина Владимировна Леонченко Хакасияның Ағбан пилтірі муниципальнай аймаа пазына табылған тіп саналча.
Залдағы чонның ізіг айа сабызы соонаң Евгения Ивановна аймахтың наа пазына удостоверение читірген. Анаң Нина Леонченко молҷағ пирген:
– Чонға сын тоғынарға, муниципальнай пӱдістің пазы тоғызын прай кӧңнімнең толдырарға, кізінің паза гражданиннің праволарын паза пос чуртазын улуғлирға паза хайраллирға, законнарға паза аймахтың уставына тудынарға молҷапчам, – сӧc пирген наа табылған устағҷы.
Алайзар, тізең, Хакасия пазы Валентин Коновалов алғыс сӧстерін читірерге сыххан. Республика правительствозы, чуртағҷылары паза позының адынаң алғыс читіріп, ол теен:
– Ағбан пилтірі аймаа –республикабыстың иң килкім аймахтарының пірcі. Аннаң устиры –улуғ нандырығ. Алнында хатығ тоғыс, наа проекттер паза пӧгіннер: оларны пӧгерінең аймахтың мыннаң мындархы тилізі паза кізілернің чуртас сині палғалыстығ. Нина Владимировна, сірер чапчаң паза кӱстіг кізізер, сірернің сағыстар паза пӧгіннер кӧп. Bзенчем, командаңар паза чуртағҷылар хабазиинаң сірерге кӧбізін чуртасха кирерге килізер, Хакасия правительствозы, тізең, мыннаң мындар аймахтың ізестіг арғызы полар!
Нина Леонченконы Ағбан пилтірі аймаа пазының тоғызына кірчеткеніне чарыдылған пайрамнығ чыылыға федеральнай органнар кізілері, республиканың министрлері паза аймах ведомстволар устағҷылары, Jӧркі Чӧп депутаттары, Улуғлар чӧбінің кізілері, халыхчылар, аарластығ паза олаңай чуртағҷылар чыылысханнар.
– Піс ізенчебіс, Нина Владимировнаның устаанынаң Ағбан пилтірі аймааның чуртазы алызар, маңат чуртир. Мин аны хаҷаннаң пілчем. Тоғысчы кӱстенҷік, иптіг чоохтығ кізі, аннаңар піс ағаа хабасчабыс, –тіпче аймахтағы ветераннар чӧбінің паза улуғлар чӧбінің кізізі Владимир Кучендаев.
– Ағбан пилтірі аймааның улуғлар чӧбі чуртағҷыларға орта таллағ иткен ӱчӱн алғызын читірче. Піс наа устағҷы тоғызында пу кӧстеглерге, хайығ айландырып, алызығлар киреріне ізенчебіс: аймахтағы паза пір орында даа тоғаспинчатхан, чалғыс тархын хумартхыларын, Порсых чазызы осхас, Чарков аал осхас, хайда андағ хумартхылар илееде, хайраллирына. Ӱс чыл піс Чарковта пайның чуртын хайраллирынҷа тоғысты апарчабыс. Пістің илбек хазнаның пір тӱрк регионында даа андағ музей чоғыл. Чарковта, тізең, андағ иб халған, пістің чӧпчібіс Александр Исаевич Августовский аның экспертизазын иртірген. Аны сыннаң даа 1890 чылда пай Чарков пӱдірген. Мының алнында аны кӧрген істезігҷілер дее пар. Анда школа даа, тадар ибіҷекте имнег туразы даа полған. Анда ыстырған ӱгретчі паза имҷі іcтенҷең. Аал пос чуртазынаң чуртаан. Музейні тӧстирге кирек, піc ол сағыснаң тиксі республиказар сығарбыс. Ол пістің аалға наа тыныс пирер, арса, чоллар пӱдіріліп пастир, чарытхы тартылар... Сигіс чыл пу сурығнаң айғазып, сурығ турғысчам: ноға пістің кізее ол аарлығ нимес? – таныхтапча Ағбан пилтірі аймааның улуғлар чӧбінің кнес орынҷызы Галина Янгулова.
Улуғлар чӧбінің араласчылары наа устағҷаа сигедек кизірткеннер паза чахығ пиргеннер: «Чир хулаа полыңар: сан пирістерні кабинеттерде ле испеске, че орамадағы тіріг ӱннерні истерге – улуғларның сурыныстарын паза олғаннарның хатхы-кӱлкiзін. Ӧтіг кӧрістіг полыңар: полған на хыйыр чолны, чылытпинчатхан батареяны паза аймахтың азылбаан оңдайын кӧріңер. Хатығ хол полыңар: бюджетті паза ис-пайны сын паза хыйға кӧстеңер, чалахай ээ суғны хурупчатхан садсар читірчеткен чіли. Азых чӱректіг полыңар: сағын салыңар, ӱлгӱ –ол чоннаң арачыланыс нимес, ол андар апарчатхан тахта. Сірернің киректерің кӧрілген тус соонаң халған паза тӧллерде чахсы сағыс артысхан иде тоғыныңар».
Сом r-19.ru сайттаң
Автор :
Наталья Сюптерекова
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
