Палаларға ӱтертiнҷең орыннар тӧстелче
07.10.2026
Хабарлар
Хакасияның культура министрі Светлана Окольникова наа кіннің тоғызына ах чол алғапча
Нацпроект. Алтай аймааның Хубачар аалында паза Абаза городта «Сӧбiре» национальнай проектче олғаннарға культура-чарыдығлығ кiннер азылғаннар
Хубачардағы музейде
Проекттi чуртасха кирер ӱчӱн Хубачардағы чир-суғ ӱгренҷең музейде тыхтағ тоғыстары иртiрiлгеннер, наа оборудование турғызылған паза культура тоғынҷылары хоза ӱгредiг ирткеннер.
Чарых паза истiг культура-чарыдығлығ кiн аймах темалығ орыннарға пӧлiлген: хумнығ столда хоостар чайаҷаң, конструкторлар пӱдiрҷең паза тилiтчең ойыннарны ойнаҷаң орын; ӧнетiн тирiглернең паза микроскопнаң тузаланып, iстезiглер иртiрҷең пулуңас; ноутбук полызиинаң постың пiлiзiн алғытчаң орын, фильмнернi паза презентацияларны кӧрҷең интерактивнай зона. Тынанҷаң пулуңаста кокон-сiрее пар.
Кiн наа оборудованиенең тирiндiрiлген: ноутбуктар, проектор, интерактивнай панель, пасхаҷыл сынны кӧртiсчеткен очкилер, аудиогидтер, ӱннендiрҷең система, микроскоптар, гербарийлер хайраллаҷаң наборлар, тилiтчең ойыннар паза конструкторлар. Пу проекттi чуртасха киреріне тиксi 3,8 миллион салковай позыдылған.
Хакасия пазы Валентин Коновалов Алтай аймааның устағ-пастаана паза музейнiң ӧмезiне иткен тоғыстары паза чидiглiг салтарлары ӱчӱн алғызын читiрген:
– Хазна программалары чонның чуртазын чахсыландырчалар. Анзын культура-чарыдығлығ кiн азылғаны киречiлепче. Истiг, чарых, чылығ паза наа оборудованиенең тирiндiрiлген кiнде Алтай аймааның паза тиксi Хакасияның олғаннары хынып ойнирлар паза наа пiлiстер аларлар.
Абаза-Заречнай библиотекада
Андағох кiннернi асчаң чахсы теес Абаза городха читкен. Олар Абаза-Заречнай библиотекада паза городтың культура кiнiнде орныхчалар. Полғанын на тӧстиріне федеральнай бюджет тең 3,8-ер миллион салковай позыдылған. Ӧрiнiстiг кӱннең чуртағҷыларны Хакасияның культура министрi Светлана Окольникова паза Абаза городтың пазы Валентина Филимонова алғыстааннар.
Абаза-Заречнай библиотеканың устағҷызы Нина Байкалованың таниинаң, ӱр ниместе ле оларның кирек оборудование паза наа книгалар чох полған. Че, андағ даа полза, кiчiг хығырығҷылар пеер чӧрерге хынҷаңнар.
– Библиотеканы чиит хығырығҷыларға чапсых иде тӧстеп алары минiң хынған сағызым полған. Мин пiстiң олған модельнай библиотекаа, Ағбандағы паза Харатастағы модельнай библиотекаларға морсынҷаңмын. Пӱӱнгi кӱнде андағох хайхастығ орын пiсте азыл парды, – ӱлесче Нина Байкалова.
«Сӧбiре» нацпроект полызиинаң наа компьютерлерге паза мультимедийнай оборудованиее чидiнерге оң полды. Библиотека наа книгаларға пайып парған. Аның тасхахтарында фэнтези, романнар, комикстер, наука книгалары тол парғаннар. Библиотекадағы культура-чарыдығлығ кiн тӧрт пӧлiкке чарыл парған: книга хығырҷаң паза проекттер пасчаң орын, тӧллер хада-пiрге палғалыс тутчаң пулуң, мультимедийнай орын, компьютер клазы чiли тирiндiрiлген орын.
Абазадағы культура кiнiнде
Ӱр ниместе ле Абазадағы культура кiнiнiң iкiнҷi хадылында соох полған. Аның iстiнде сӧрӧн чил чӧрҷең. Тураның стенелерi ходырылҷаң. Пӱӱнгi кӱнде аны танып таа полбас: наа чарых кӧзенектер, нымзах ковролин, наа мебель паза оборудование, тилiтчең ойыннар – чылығ, чарых паза истiг.
– Мин хада тоғынчатхан арғыс-ӧӧрелерiме, Россияның паза Хакасияның культура министерстволарына, городтың устағ-пастаана улуғ алғызым читiрчем! Пiс культура-чарыдығлығ кiн азыларын чидiкпин сахтаабыс паза ол кӱннi чағыннадар ӱчӱн прай кӱзiбiстi салғабыс. Культура кiнiнiң тоғынҷылары, прайзы хада, кӧзеңелер тiккебiс, мебель чығабыс - пiр сӧснең, пу орынға прай кӱзiбiс салғабыс, –чоохтаан Абазадағы культура кiнiнiң директоры Марина Шульенко.
Олған культура-чарыдығлығ кiнде палаларны паза саарбахтарны тилекейдегi аймах тiллiг чоннарның кибiрлерiнең таныстырарлар.
– «Сӧбiре» национальнай проектче Хакасияның правительствозының паза муниципальнай пӱдiстернiң устағпастаа полызиинаң олғаннарға мындағ чахсы кiннер тӧстелчеткенi уғаа ӧрiнiстiг. Пӱӱл республикада тӧрт культура-чарыдығлығ кiн азылды: Ағбанда, Хубачарда паза iкiзi Абазада. Пiс пу кӧстегҷе мыннаң мындар тоғынарбыс. Iди килчеткен чылда республикада алты культура-чарыдығлығ кiн тӧстелерi кӧрiлче. «Сӧбiре» программада аралазар ӱчӱн, айланыс пiчиин пазып, марығда таллағ иртiбiзерге киректелче, –таныхтаан Хакасияның культура министрi Светлана Окольникова.
Пӱӱл Россияның 75 субъектiнде олғаннарға 300 культура-чарыдығлығ кiн азылар. Полғанында ла палалар постарының чайаачыларын азарлар, наа нанҷылар табарлар паза пос чонының кибiрлерiнең чағын танызарлар.
Сом авторни
Автор :
Аскар Артамонов
| Пн | Вт | Ср | Чт | Пт | Сб | Вс |
| 28 | 29 | 30 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
