Карамчаковтың турнирі – кибірліг марығ
07.10.2026
Хабарлар
Спорт министрі Пётр Макарчук 79 кг кӧдірімде чиңіc тутхан паза сыйыхтығ орынға сыххан оолларнаң хада
Спорт. 3-4 чарыста олаңай кӱресче Олимп ойыннарының хола призёры Сергей Карамчаковтың хумартхызына чарыдылған тиксі Россия марии ирткен
Пістің республикада Карамчаковтың турнирі иң танығлығ марығлар санына кірче. Ол иреннерге паза ипчілерге кӧрілген. Анда чиңіc тутханы улуғ чидіге саналча. Пӱӱл марығда 7 регионның – Хызылчар крайының, Иркутск, Кемеров паза Новосибирск областьтарының, Хакасияның, Бурятияның паза Туваның – кӱресчілері араласханнар. Тиксі алза, 127 кізі: 35 хыс паза 92 оол. Хакасия ӱчӱн 33 кӱресчі турысхан. Пастағы кӧріcке араласчылар саны кӧп нимес. Че 2024 чылда ахча чохтаңар кибірліг турнирні иртірбеске иткеннер. Салтарында, марығ регионнар аразындағы синде ирткен, кибіcте чиңіc ӱчӱн 90 спортсмен харбасхан. Ол чыл хыстарны турнирде араластырбааннар. Тренерлернең чоохтасханда, пӱӱл календарь планынаң сидіксініс пол партыр. Карамчаковтың турнирінең пір тиңе Тувада паза Бурятияда олаңай кӱресче арға-мӧрійлер иртірілтірлер. Килер чылда календарь планынзар алызығлар кирерлер, неке.
Чоохтирға кирек, Хакасияның правительствозы Карамчаковтың турнирін улуғ хайығда тутча. Кӧзідімге, кӱресті тилідіп, ӱлгӱдегілер ахчалығ сыйыхтың чыындызын ӧcкірібіскеннер. Алында чиңісчілерге 15-ер муң салковай читірілҷең, кӱмӱс призёрларға – 10-ар муң салковай, ӱзінҷі орынға сыхханнарға – 5-ер муң салковай. 2025 чылдаң чемпионнар 30-ар муң салковай холға кирчелер, ікінҷі орынға сыхханнар – 20-ер муң салковай, хола призёрлар – 10-ар муң салковай. Олох сылтағнаң Хакасия пазы Валентин Коновалов хакас чонның саблығ оолғының хумартхызына чарыдылған арға-мӧрійге тӧреміл чӧрче. Пӱӱл Валентин Олегович турнирні пайрамни азарында пазох араласхан. Чоох тудып, ол теен:
– Хакасияа мындағ турнирні иртірері – улуғ чеес. Пістің республика кӱрес кибірлеріне поғдархапча. Сергей Карамчаков, хомзынысха, чуртастаң ирте парыбысхан. Iди дее полза, саблығ спортсмен чииттерге кӧзідім полча. Cпортта чиңіcтер тударға сағынчатсаң, ол чіли пик хуйахтығ, тӧдір пазынмас поларға кирек. Чылығ сӧcтер сыйыхтаснаң узарадылғаннар. Валентин Коновалов абахай Наталья Пудоваа «Чоннар аразындағы класстығ спорт узы» аарластығ атты киречілепчеткен танығны читірген. Спортсменнең чоохтасханда, чир-суғҷыбыс нормативті 2024 чылда толдырыбыстыр. Хайди таныхтаан Наталья, амды ол ипчілернiң не аразында харбасча. Пӱӱл ол хазнаның чемпионадында ӱзінҷі орынға сыххан паза Россия чоннарының спартакиадазында кӱмӱс медальны холға кирген. Хазнаның иң кӱстіг кӱресчілерiнең харбазарға оой нимес, че ол кӧнік парған. Наташа 50 кг кӧдірімде харбасча. Анда пастағы номерге чуваш чонның хызы Елизавета Смирнова саналчаттыр, спортсмен Дагестан ӱчӱн турысча. Чарыс айында Смирнова тилекей чемпионадында кӱзін сынир. Турнирзер айланза, абахайлар саны ас полғаннаңар, олар пастағыох кӱнде харбазыбысханнар. Хыстар Хакасияа 8 медаль ағылғаннар: 3 кӱмӱс, 5 хола. Пӱӱл чиңіc тударына чир-суғҷыларыбыстың устары читпиндір. Наталья Пудова алтын медальны холға кирерҷік тіп ікінҷілес чоғыл. Че сборлардаң наа ла айлан килген спортсменні тренерлер марығда араластырбааннар.
2026 чылда оолларның киректері хай-хай чахсы. 79 кг кӧдірімде пьедестал пісти полған тирге чарир. Азах меетке сыхханнар Аймир Мамышев паза Владимир Боргояков. Оларның харбасханын кӧрерге киліскен. Мамышев, тоғазығ пасталғандох, 6:0 саннаң чиңіc тут сыххан. Че Боргояков удурласча. Итсе, Володяның кӱзі читпинче. Тоғазығның пастағы чардығы 10:2 саннаң тоозылды. Тынағ тузында Боргояков наа тыныс алып алған, таң. Сан 11:6 пол парды. Че салтарында Аймир Мамышев чиңіc тутхан. Чиит кізі Таштыптаң, олимп резерві училищезiн тоосхан соонда ХГУ-да пілістерін алғытча. Пу кӧдірімде хола призёрлар Айслан Хомушку (Хакасия) паза Балдан Жаргалов (Бурятия) полыбысханнар.
Чиңіснең ӧріндіргеннер Артур Чебодаев паза Семён Терещенко. Чир-суғҷыларыбыс Хызылчар крайы паза Хакасия ӱчӱн турысчалар. Чебодаев 61 кг кӧдірімде кӱрескен. Кинеп парған соонда Артур пір чылҷа харбаспаандыр. Сала тыып парыбысханда, чоннар аразындағы класстығ спорт узы Ағбандағы кибіссер сығарға чаратхан. Чиит кізінің чооғынаң, кибірліг турнирде ікінҷізін кӱзін сынады. Алында ол мында 2020 чылда чемпион полыбысхан. Россияда олаңай кӱрес чахсы тиліпче, аннаңар улуғ турнирлерде чиңіc тударға оой нимес. Тиксі алза, оолларыбыс ідӧк 8 медаль холға киргеннер: 4 алтын, 2 кӱмӱс, 2 хола. Пылтыр оларның ӱс ле медаль полған.
Н.Ф.Катановтың адынаң Асхыстағы чир-суғ ӱгренҷең музейнің ӧмезін махтабызарға кирек. Музей тоғынҷылары Cергей Карамчаковха чарыдылған кӧзідігні тимнеп салғаннар. Тренерлернің паза спортсменнернің Сергей Захаровичтің медальларын, сомнарын кӧріп алар оңдай полған. Кӧзідіг ӱчӱн нандырған Виктория Шалгинова. Хайди музей тоғынҷызы таныхтаан, чиит кӱресчілер, экспонаттарның хыринда сомға суурынып, олардаң кӱс алынып аларға харасчалар. Хакас спортсменнің сыйыхтарын кӧрерге сынап чӱрексіністіг. Мындағ кӧзідіг чыл сай ирткен полза, чахсы поларҷых.
Сом Ангелина Новиковани
Автор :
Майя Кильчичакова
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
