Мал имҷізі поларға сағынчатханнарға тузалығ смена
30.09.2026
Статья
Сменаның араласчылары паза ӱгретчілері
Ӱгредіг. Пу наада «Альтаир-Хакасия» республиканың олғаннар чайаачызын тилiтчең кінінде «Ӱртӱндегі наука сменазы. Ветеринарияның ӧӧні» смена ирткен
«Альтаир-Хакасия» ӱгренҷілерге аймах профессияларға чарыдылған сменалар сыбыра иртірерге кӱстенче. Ӱр ниместе аал хониинаң палғалыстығ смена азыларынаңар хабар искірілгенде, анда Томыҷахтар, Чарков аалларының, Нымырттығ посёлоктың, Пирікчулның паза Н.Ф.Катановтың адынаң Хакас гимназияның ӱгренҷілері аралазарға сағыныбысханнар.
Ветеринариянаң таныстырчатхан сменада 9 – 11 класстарның 18 ӱгренҷізі наа пілістер алған. Смена 14 ӱртӱннең сығара 23 ӱртӱнге теере тоғынған. Олғаннарға занятиелерні ХГУ-ның аал хонии колледжінің ӱгретчілері апарғаннар. Оол-хыстар, анда аралазып, мал имҷізінiң тоғызынаң тирең танысханнар. Ол санда оларға мал, хус тударынаңар лекция хығырғаннар. Ідӧк ӱгренҷілер туйғахтығ маллар хайдағ ағырығларнаң ағырчатханнарынаңар піліп алғаннар.
Практика оңдайынаң ирткен уроктарда улуғ класстарда ӱгренчеткен чиит улус аймах тиріглернең орта тузаланарға кӧніккен.
Ветеринария наукаларының кандидады Елена Назарова ветеринар поларға сағынчатхан оол-хыстарға микробиологияҷа ус кӧзідиин иртірген.
– Лекциялар тузында олғаннар ӧӧн тема микрофлоранаң чахсы танысханнар. Аны мал-хустың идіндегі хайдағ орнында таап аларға киректеңер, чахсы микрофлораның тузазынаңар паза, ол сайбал парза, мал-хустың иді-сӧӧгінде ниме пол парчатханынаңар наа піліс алғаннар. Ӱгренҷілернің хайиин тартхан занятиелерге ағылған камак. Андар кӧріп, олғаннар андағ аңыҷахтарны хайди орта азырирға киректеңер, хайди оларны ибде тударынаңар піліп алғаннар, – теен Елена Назарова.
Аал хонии наукаларының кандидады Марина Ткаченко ӱгренҷілерге аал хониинда маллар тударына ноға улуғ хайығ салылчатханынаңар чоохтап пирген. Аның уроктары сӱттіг паза иттіг маллар нименең пасхалалчатханына чарыдылғаннар. Наа алылған пілістерні сағыста ӱрге артыс салар ӱчӱн, олғаннарға тузалығ ойыннар иртiрілгеннер, хайда олар, постың миистерін «хыймырадып», наа темаҷа пілістерін тыытханнар.
Чуртазын аал хониинаң палғалыстырарға сағынчатхан ӱгренҷілерге кӧп тузалығ лекция паза занятие апарылған. Ӱгренҷілер хустарның даа чуртазынаңар кӧп наа ниме піліп алғаннар.
Ӱгренҷілер ідӧк палыхтарның чуртазынаң танысханнар. Ветеринария наукаларының кандидады Максим Новицкий олғаннарға палыхтар хайдағ ағырығларнаң ағырчатханынаңар чарыда чоохтап пирген. Паза ол оол-хыстарға Сибирьде палыхтарны хайди ӧскiрчеткеннеңер искірген.
Улуғ класстарда ӱгренчеткеннер ветеринарияа чарыдылған сменада микроскопнаң чахсы тузаланарға ӱгреніп алғаннар, ӧзімнер микроскоп ӧтіре хайди кӧрінчеткенінең танысханнар.
Хайди таныхтапчалар «Альтаир-Хакасия» кіннің тоғынҷылары, смена уғаа хынығ паза тӱзімніг ирт парған. Пос чуртазын аал хониинаң палғалыстырарға пӧгінчеткен оол-хыстар, ӱртӱндегі сменада аралазып, ол кӧстегҷе пілістерін уламох алғыдарға сағыс тудыбысханнар.
Ирткен чылда ӱгренҷілерге мындағ смена пастағызын на азылған. Пӱӱл, тізең, ол кӧстегҷе тоғыс узарадылған тіп таныхтирға кирек.
Сом ХГУ-ның официальнай сайтынаң алылған
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
