Топливоның республиказар читiрiлчеткенi – тӧремiл хайығда
30.09.2026
Хабарлар
Хакасиядағы УФАС-тың устағҷызы Ксения Лебедева чоох тутча
Кӱн сурии. Хакасия пазы Валентин Коновалов наа тоғыс неделязын топливо суриина чарыдылған штабтың чыылиин иртiрерiнең пастаан
Иң пастағызын республиканың экономика тилiзi министрi Роман Ковтун региондағы топливо синiнеңер паза аның паазын кӧрiлген синде тударынҷа чӧптезiглернi тимнирiнҷе тоғыс хайди апарылчатханнаңар чоохтаан.
– Амғы туста топливоның хорадылчатхан синiн кӧрзе, 25 ӱртӱнге республиканың нефтебазаларында 92 маркалығ бензиннiң чыындызы 15 суткаа чидер тiп кӧрiлче, 95 маркалығ бензиннiң – ідӧк 15 суткаа, дизель топливозы – 30 суткаа.
Министерство топливонаң палғалыстығ киректi хайығда тударын узаратча, пiс топливо-энергетика комплексiнiң ӧӧн диспетчер устанызынзар (ЦДУ ТЭК) саннарны тӧремiл ысчабыс. Ирткен неделядағы пятницаның кӧзiдiглерiнҷе, Хакасия сан пирiстi тӱзiмнiг пирчеткенi хоостыра хазнабыс регионнары аразында пастағы орында пол парған, – искiрген Роман Ковтун.
Iдӧк республиканың топливо чырғалында пааларны кӧрiлген синде тударынҷа наа чӧптезіглернi идер тоғыс апарылча тiп таныхтаан министр. Пӱӱнгi кӱнге алынҷа идiнҷектернең андағ читi чӧптезiг тимнелген. Пу неделяда хоза тӧрт чӧптезiг тимде полар тiп кӧрiлче.
Нефтьтi анып, постары топливоны сығарарынаң паза садарынаң айғасчатхан килкiм компанияларның (ВИНК) чӧптезiгде хол салған идiнҷектерге топливоны читiрерiнең палғалыстығ сурығ ам даа азых турча тiп таныхтаан республиканың экономика тилiзi министрi. Пу неделяда чӧптезiглерге хозылған компанияларға топливоны пурун позыдардаңар президенттiң чахии сығарын сахтапчабыс теен ол.
– Пiске президенттiң чахии сығарын сахтирға кирек чоғыл, Хакасия топливо суриинҷа федеральнай штабтың протоколына кирiл парған, амды ол алылған чарадығ чуртасха кирiлзiн тiп кӱстенерге кирек. Указ сығарын сахтазабыс, тус илееде парыбызарға айабас. Топливо, тiзең, пiске амох кирек.
Топливоны читiрерiнҷе тудығлар тиксi хазнада пар. Аннаңар протоколның пу пунктын чуртасха кирерге кирек. «Роснефть», «Газпромнефть» федеральнай сетьтерде дее тудығлар пар. Аннаңар пу сурығны табырах арах пӧгiбiссебiс, iдӧк табырах республикада топливо сурии пӧгiлер.
Ағаа хоза пӱӱнгi кӱнде толдыра кӱзiнең тоғынминчатхан, топливоның алынҷа кӧрiмнерiн сатпинчатхан орындағы сетьтернең, ӧӧнiнде ХТК-наң ӧткiн тоғыныбызарға кирек. Олар «Роснефтьте» паза «Газпромнефтьте» теес чыылчатханын санға алзыннар, оларны хызырарынҷа тоғысха хозылып, тоғынып пастазыннар.
– Министерство Саяногорск паза Харатас городтарзар топливо хоза читiрiлзiн тiп алынҷа айланыстар тимнепче. «Газпромнефтьнең» «ОПТИ» заправказар топливоны хоза читiрерiнеңер чӧптескен полғабыс, че сағам ол читкiҷе нимес, теес пар.
Ағаа хоза, амғы туста «Роснефтьтiң» заправкалары планда кӧрiлген тыхтағ тоғыстарын иртiрерiне чабылчалар. Пу неделяда Мостоотрядтағы заправка чабылар, – чоохтаан Роман Ковтун.
Валентин Коновалов тынағ кӱннерiнде Ағбанда паза Харатаста орныхчатхан «Газпромнефть» заправкаларда 92, 95 маркалығ бензин чох полғанына хайығ айландырған. Пу киректiң узы-пазын таап, сурығны табырах пӧгерге кирек теен ол.
Сӧс Хакасия пазының орынҷызы Дмитрий Бученикке пирiлген.
– Ирткен неделяда топливо суриинаң палғалыстығ кирек андағ ла сидiксiнiстiг полбаан тирге чарир. Андада пiс ВИНК-наң бензиннi хоза читiрерiнҷе чӧптезiп алғабыс, аннаңар хоза заправкалар азылғаннар. Ол санда Нефедов идiнҷектiң iкi «Хакнефть» заправказы азылған – «НП-Авто»-ның хыринда паза Хакас национальнай гимназиядаң тоғыр орныхчатхан заправкалар. Крыловтың орамазындағы заправкада Ағбандағы имнег туразына, Ремишевскаяның адынаң республиканың имнег туразына, перинатальнай кiнге бензиннi садарынаңар чӧптезiг идiл парған. Чӧптезiглер хоостыра алынҷа идiнҷектерiбiске бензин читiрiл сыхса, Крыловтың орамазындағы заправканы хазна бюджет учреждениелерi бензин алар заправка ит саларға пӧгiнчебiс. Анда олар топливоны теес чох, ипти садызып ал турарлар.
Алындағы неделяда «Газпромнефтьтең» Приисковайдағы заправкаларзар бензиннi читiрерiнеңер чӧптезiглер иткен полғабыс. Компания чоохтас салғаныбыс хоостыра кирек син бензиннi читiрген. Iдӧк Орджоникидзе аймаанзар паза Сорығ городсар бензиннi читiрерiнҷе тоғысты алынҷа апарчабыс.
Че чағынғы туста, тиксi хазнада топливо читiрiлерiнең палғалыстығ кирек сидiксiнiстiг полчатхан сылтаанда, Хакасиязар топливоның кирек синi читiрiлерiнең палғалыстығ сидiксiнiстер поларынаң хорғыс пар. Амғы туcта Хызылчар крайында паза Кемеров облазында тудығлар пар сыхханын кӧрчебiс.
Тынағ кӱннерiнде «Газпромнефть» заправкаларзар иртен читірілген бензин иирзер тооза садыл пар турған. Пятницада iдӧк, iкi «ОПТИ» заправкаа 92 паза 95 маркалығ бензин читiлер ле тонна ағылғаннар. Ол обед алнына прай садыл парған.
Амғы туста ВИНК-тарнаң чӧптезiглернi апарар тоғысты алғыдарға кирек. Ирткен неделяда Россияның энергетика министерствозынаң апарылған чӧптезiглер хоостыра, пу неделяда Хакасиязар бензин читiрiлiп пастир тiп iзенiс пар. Анзына iкi сылтағ пар. Пастағызын, пiс сан пирiстi пирерiнҷе прай кирексiнiстернi толдыр салғабыс. Паза пiс алынҷа идiнҷектернең чӧптезiглернi тимнирiнҷе iдӧк пастағылар санына кiрчебiс, – таныхтаан Дмитрий Анатольевич.
Хакасия пазы килкiм компанияларнаң паза алынҷа идiнҷектернең хада-пiрге тоғысты апарарын узарадарға чахаан.
Iдӧк чыылығда полызығ, арачыланыс паза коммунальнай службаларға, аал хониинаң айғасчатханнарға топливо читкіҷе пирiлче тiп таныхталған.
Киҷее Хакасия пазының орынҷызы Дмитрий Бученик республика устағҷызының чахиинаң топливо чырғалындағы киректi хайығда тутчатхан штабтың теестегi чыылиин иртiрген. Пу неделя саннарнаң ӧрiндiрбинче тирге чарир.
– Топливо чырғалындағы кирек тиксi хазнада оой нимес. Пiс республикада топливо суриин хайығда тударына прай кӱзiбiстi салчабыс. Республиказар читчеткен топливоны, теестер тың ӧспезiннер тiп, муниципальнай пӱдiстер аразында кирексiнiстерi хоостыра ӱлестiрерге кӱстенчебiс. Андағ даа полза, топливо синi кӧместең хызырылып одырча, аннаңар федеральнай кiнзер айланарбыс. Александр Новактың устаанынаң иртчеткен федеральнай штабтың протоколына кирiлген чарадығларны пу неделяда чуртасха кирерге кирек, – таныхтаан Дмитрий Анатольевич.
Хакасияның экономика тилiзi министрi Роман Ковтунның искiриинең, 29 ӱртӱнге республиканың нефтебазаларында 92 маркалығ бензиннiң чыындызы 12 суткаа чидер тiп кӧрiлче, 95 маркалығ бензин – 8 суткаа, дизель топливозы – 24 суткаа.
Ирткен неделяда наа автозаправкалар азылған даа ползалар, пӱӱнгi кӱнде теестер ӧсчелер. Ырах орныхчатхан орыннарда – Приисковайда, Копьёвта, Сорығда – топливо читiрiлерiн алынҷа хайығда тутчабыс тiп таныхтаан министр.
Штаб чыылиинда iдӧк Хакасияның аал хонии паза ас-тамах министрi Сергей Труфанов чоох тутхан. Аның таниинаң, аграрийлернiң топливонаң палғалыстығ сидiксiнiстер чоғыл. Наңмырлар чаапчатхан сылтаанда олар топливоны тың на хоратпинчалар. Пӱӱнгi кӱнге тоңастығларның 60 %-i кизiл парған, мал азыралының 80 %-i тимнел парған.
Iдӧк Боград аймааның депутаттарының школа автобустарына бензиннi садызарынаң хабазардаңар айланызы ӱзӱрiлген. Дмитрий Бученик, пу сурығны протоколға кирiп, ағаа алынҷа хайығ саларға чахаан.
Заправкаларда теестер ӧзiп, бензинге кирексiнiс ӧсчетсе дее, аның паазы пiр синде тудылча. Хакасиядағы УФАС-тың устағҷызы Ксения Лебедеваның чооғынаң, килкiм компанияларда паза орындағы «ХТК» компанияда бензиннiң паазы алыспаан. Дизель топливозының паазы тӱсчеткенi таныхталған. Ол топливо паазын кӧрiлген синде тударынҷа чӧптезiглерге хозылған алынҷа идiнҷектерге бензин чидiспинчеткенінең палғалыстығ киректе парыстанып аларға кӱстенминчеткен ӱчӱн алғызын читiрген.
Iдӧк чыылығда тимiр чолларҷа топливо читiрiлчеткенi ӱзӱрiлген. Пу сурығ хоостыра вагоннарнаң читiрiлген топливоны тудығ чох аларға кирек полчатханына хайығ салылған. Паза вагоннарнаң топливоны хайраллир орыннаң чiли тузаланарға чарадылбинчатханы таныхталған.
Чыылығлар салтарынҷа, топливо сурии Хакасия правительствозында тӧремiл хайығда тудылча, республиказар читiрiлер бензиннiң синiн ӧскiрерiнҷе улуғ тоғыс апарылча тiп таныхтирға чарир. Iзенербiс, пу тоғыстың салтарларын регион чуртағҷылары чағынғы туста кӧрерлер.
Автор :
Татьяна Кыштымова
| Пн | Вт | Ср | Чт | Пт | Сб | Вс |
| 28 | 29 | 30 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
