Олғаннарны ӧткін поларға кӧӧктiрче
25.09.2026
Хабарлар
Сарима Асочакова
27 ӱртӱнде – Воспитатель кӱні. Сарима Асочакова, олған садында 13 чыл істеніп, иркеҷектернің тӧреен тілге хыныс одын тамысча
Тыс пілбес воспитатель Сарима Романовна город, республика, хазна синіндегі марығларда сыбыра араласча. Ол, олғаннарынаң даа хада аймах марығларда тӧремiл аралазып, иркеҷектерге сыйыхтығ орыннар аларға полысча.
Пу наада Сарима Асочакова «Пос тілінiң паза пос литературазының иң чахсы ӱгретчізі» хазна синіндегі марығда пістің республиканың алнын алған. Марығ ӱс чардыхтаң пӱткен. Пастап ол муниципалитет синінде ирткен, соонаң – республика синінде. Сарима ікі чардыхта иң чахсы воспитатель полыбысхан. Анаң Липецкте ирткен марығда хазнабыстың прай даа регионнарынаң килген воспитательлер, ӱгретчілер жюриге пос узын, опыдын пис кӱн кӧзіткеннер. Тиксі 131 араласчы полған. Че, ачырғасха, чир-суғҷыбысха сыйыхтығ орынға сығып аларға оң полбаан.
Россия синіндегі марығда тиксі 46 воспитатель узынаң сынасхан. Сарима Романовна 15 иң артых воспитательлернің санында пол парған.
Ӧткін воспитатель істеніс чолын 13 чыл мының алнында пастаан. Н.Ф.Катановтың адынаң Хакас хазна университедін маңнаныстығ тоозыбызып, чиит хыс, ікінҷілебин, чуртас чолын олған садынаң палғалыстырарға чаратхан. Пастап Сарима Ағбандағы «Росинка» олған садында тоғынған. Школа алнындағы ӱгредіг учреждениезінзер килгендӧк, аны иркеҷектерні хакас тіліне ӱгретчеткен группазар тоғынарға ысханнар. Чиит хыс, іди істеніс чолын наа ла пастап, профессиязының чазыттарын посха азып пастаан. Кем-де кічіг палаҷахтарнаң тоғынарға хайди сидік полар тир. Че сынында кічіг дее кізінің чӱрее, хылии пар. Полған на паланың чӱреензер чол таап аларға кирек. Андада ол воспитательнің чооғын истер, аннаң хада наа кибелістер, сарыннар хынып ӱгренер.
– Олған садындағы хакас группаларзар аймах-пасха чонның палалары чӧрчелер. Оларны піс хакас тілінең ойыннар, сарыннар, кибелістер пастыра таныстырчабыс, – теен Сарима.
2020 чылдаң сығара ӧткін воспитатель Сарима Романовна Асочакова Ағбандағы «Дашенька» олған садында істенче. 13 чыл аразына кӧп палаа ікінҷі іҷезі полған. Пӱӱл ол, олғаннарынаң хатабох анымҷохтазып, оларны школазар ӱдезібіскен паза, кӱскӱ пасталыбысханда, пасха иркеҷектерні позының нымзах холларынзар алды.
– Минің холымда полған олғаннарның иң улуғлары тоғыс класс тоозыбысханнар. Оларға тоғас парзам, танып таа полбаспын. Олғаннар, ӧзіп, тың алыс парчалар нооза. Пірееде, киҷеегі иркеҷектеріме тоғас парзам, хайди олар табырах ӧс парғаннар тіп ӱрӱкчем. Чыллар табырах чӱгӱрчелер, – кӱлiніп ала чоохтанча воспитатель.
Сарима Романовнаның чооғынаң, олған садында 13 чыл істеніп, ағаа хакас тілінең чахсы чоохтасчатхан пір дее палаҷах тоғаспаан. Кӧп паланы ол олған садында тӧреен тілінең пастағызын на таныстыртыр.
Нымзах ӱнніг воспитатель, пір орында турбин, позының узын сыбыра тилітче. Тоғыста наа оңдайлар таап, оларнаң тузаланча. Паза кӱлiмзірес ипчі, маң полза, хайди даа аймах марығларда аралазарға кӱстенче. 2021 чылда ол тӧреен тіллерҷе тиксі Россия синіндегі устар кӧзідиинде «Тӧреен тілге кӧніктiрчеткен ӱчӱн» алынҷа номинацияда таныхтатхан.
Сарима Асочакова тоғызын чахсы толдырчатхан ӱчӱн аймах аарластығ сыйыхтарға турысхан. 2021 чылда ол хакас чонның Улуғлар чӧбінің «Чыл кізізі» аарластығ атха турысхан. Ідӧк Хакасияның ӱгредіг паза наука министерствозының Аарластығ пічиин алған. Олох чылда Сарима Романовна Ағбан пазының премиязының лауреады полыбысхан. Ідӧк «Чӱреемні палаларға пирчем» Тиксі Россия марииның регион синіндегі чардығында чиңісті холға кирген.
Тыс пілбес ипчі ікі паланың іҷезі полча. Оларны iдӧк чуртаста ӧткін тудынарға ӱгретче. Олар іҷезӧк чіли марығда араласчалар, школа, олған сады соонаң аймах кружоктарға чӧрчелер.
Тоғыс хоостыра мағаа Сарима Романовнаны аймах мероприятиелерде араласчатханын кӧрерге килiсче. Ол анда сыйыхтар алча алай пос опыдынаң пасха воспитательнең ӱлесче. Чазырбин чоохтаза, ағаа пасхазынаң ӱлеcчең нимелер пар. Абахай ипчі олған садтарына пазылчатхан хакас тілінҷе методика программазын тимнирінде ӧткін араласча. Андағ оңдайнаң пістің матырыбыс пасха воспитательлерге тоғызын пӧзік синде апарарға полысча тирге чарир.
Сом Сарима Асочакованың архивінең
Автор :
Ольга Томочакова
| Пн | Вт | Ср | Чт | Пт | Сб | Вс |
| 28 | 29 | 30 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
