Регионның таңдағызын пӱдiрер устағҷылар тимнелген
25.09.2026
Хабарлар
«Хакасия матырлары» проект араласчылары
«Хакасия матырлары». Пу неделяда Н.Ф.Катановтың адынаң Хакас хазна университедiнде «Хакасия матырлары» кадрлар проектiнде араласхан СВО ветераннарына дипломнар читiргеннер
Пу проекттiң тархыны ирткен чылда пасталған. Сағысха кирзе, 2025 чылда Пiлiс кӱнiнде Хакасияның студенттерiнең паза ӱгренҷiлерiнең хада парта кистiне iдӧк «Хакасия матырлары» региондағы проекттiң араласчылары одырғаннар. Прай 20 азыра кiзi. Азынада чоохтирға кирек, ӱгредiгнi пастааннарның прайзы диплом холға алған.
Ӱгредiг пасталғанынаң пiр чыл артиинаң ирт парды. Пу тус аразына олар регионның аймах пулуңнарынзар чорыхнаң сыхханнар: Сойан-Сус ГЭС-та, Саяногорсктағы алюминий заводында, Ағбандағы ТЭЦ-та, «Улуғ хуртуйах тас» музейде, республиканың искусство школаларында пол килгеннер, Ӱӱс суғҷа ингеннер, Алтай паза Асхыс аймахтарының устағ-пастаанаң тоғасханнар, республиканың министерство-ведомстволарында практика ирткеннер паза даа пасхазы. Проект тоғызынаң Хакасия пазының аппарады устаан, ӱгредiгнiң ӧӧн орны ХГУ полған. Стажировкаларны, тiзең, олар республиканың министерство-ведомстволарында ирткеннер. Проект араласчылары Виталий Шкробко паза Евгений Еранцев Ӧӧркі Чӧпте депутаттар Александр Пащенконың паза Анастасия Кочергинаның устаанынаң стажировка ирткеннер.
– Араласчылар ӱгредіге паза проекттерҷе тоғысха нандырығлығ хайғаннар. Андағ тоғыс оларға амыр чуртасха кӧнігерге паза тӧреен республикада постарының орыннарын табарға полысча, – таныхтаан Анастасия Кочергина.
Хакас хазна университедінде дипломнар алғаннарның аразында Александр Горяинов паза Виктор Тарасов полғаннар. Олар ікізі дее Хакасияның ГО, ЧС паза ПБ-ҷа хазна комитедінде ӱгредіг ирткеннер паза проекттерiн маңнаныстығ арачылааннар. Хазна комитедінің кнезі Владимир Карамашевтің чооғынаң, матырлар постарын чон аразында кирек паза кирексіністіг полчатханнарын пілерге киректер. Пір чыл хада тоғынған сылтаанда піс анзына читкебіс.
Проект тоғынчатхан туста Асхыстағы имнег туразының анестезиолог-реаниматологы Сергей Сагалаков Хакасияның хазых хайраллаҷаң министерствозының устағ-пастаанаң, ведомстводағы ӧӧн имнег пірігістерінің ӧӧн имҷілерінең тоғасхан. Амғы туста Сергей Сагалаков Асхыстағы имнег туразының ӧӧн имҷізінің тоғызын толдырча.
Дипломны холға алғаны СВО ветераннарына муниципальнай паза республика ӱлгӱзiнде, республиканың килкiм предприятиелерiнде тоғынарға оңдай пирче. Проект араласчыларын ӱгредiг иртiбiскенiнең Хакасия пазы Валентин Коновалов алғыстаан.
– Ирткен не чыл пiс пу проекттi пастаабыс, тус кӧп иртпеенге тӧӧй, сiрер, тiзең, холларыңда дипломнар тутчазар. Сiрерге ирткен ӱгредiг чылы олаңай полбаан полар, ол тузалығ, хынығ ирт парғанына iзенчем.
«Хакасия матырлары» проект – пiстiң республикабыстың таңдағызына улуғ хозым. Регионға наа оңдайнаң сағынчатхан, наа кӧрiстiг, сидiксiнiстерні пӧгерге хорыхпинчатхан устағҷылар кирек. Мин сiрернi ӱгредiгнi маңнаныстығ тоосханынаң алғыстапчам.
Че пiлерге кирек, пiс мынынаң тохтирға сағынминчабыс. Проект аннаң андар чуртир, анда пасха даа СВО ветераннары аралассын, – айланған ӧнетін чаа операциязы ветераннарынзар, проект араласчыларынзар Валентин Олегович.
Хайди чоохтапча Хакас хазна университедiнiң ректоры Татьяна Краснова, проект тоғынып пастаанда, ХГУ-ның ӱгретчілерi улуғ частығ, СВО-да араласхан ветераннарға лекциялар хығырарға чочынғаннар. Че соонаң оларның аразында теес полыбысхан. Аннаңар ХГУ-ның профессорлары, докторлары, доценттерi проекттiң наа араласчыларынаң тоғынарға тимделер.
«Хакасия матырлары» регион проекті Россия президентi Владимир Путиннiң чахиинҷа тӧстелген «Матырлар тузы» федеральнай программа хоостыра чуртасха кирiлче. Анда ӧнетiн чаа операциязы зоназынаң айланчатхан чааҷылар араласчалар. Проекттiң ӧӧн пӧгiнi – СВО араласчылары паза ветераннары санынаң хазна паза муниципальнай устағ системазына, ідӧк регионны тилідеріне кирек пасха даа сфераларҷа чахсы устағҷылар командазын тимнирі.
Олар «Хазна паза муниципальнай устағ. Хакасия матырлары» программаҷа пiлiс алчалар. Программа 514 часха кӧрiл парған. Ӱгредiг тузында олар тӧрт практика модульын иртчелер.
Сом Дмитрий Сунчугашевти
Автор :
Оксана Котюбеева
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
