Пастағы марығ – хатығ сыныхтағ
25.09.2026
Хабарлар
«Саяны» Новосибирсктегі «Сибсельмашты» 4:3 саннаң чиңіп алған
Меспектіг хоккей. 21 ӱртӱнде Россия кубогының I чардығының халғанҷы ойыннары ирткеннер
Пӱӱнгі кӱнде Хакасияда ӧӧн спорт хабарлары «Саянынаң» палғалыстығ. Ол пістің республиканың чалғыс профессиональнай ӧмезі нооза. Аның таңдағызы кізілерні сағыссыратча. «Саяны» амды Суперлигада ойнапчатханында кӧп кізінің кӱзі, республика ӱлгӱлерінең пасти олаңай кӧрігҷілерге теере. Олох сылтағнаң «Саянының» полған на тоғазии санға алылча. Ирткен неделяда хоккей ӧмезі Россия кубогында кӱзін сынаан. Марығ тузында хоккеисттер ойыннарынаң ӧріндіргеннер, хомзындырғаннар паза ізеніс пиргеннер.
Хайди піс алында таныхтаабыс, 14 ӱртӱнде «Саяны» хызылчардағыларнаң тоғасхан, 15 ӱртӱнде – «Кузбасснаң». Пастағы матч 6:11 саннаң тоозылған полза, кемеровтағыларға пістіңнер 0:9 саннаң утыр салғаннар. Пастағы ойыннар киречілееннер: «Саяны» – пик хуйахтығ команда. Оолларыбыс, утырзалар даа, тоғазығлар тооза ойнааннар.
Че иң таңнастығ матч 17 ӱртӱнде ирткен. Хакасиядағылар «Сибсельмашнаң» ойнааннар. Новосибирсктегі ӧме паза «Саяны» кӱстерінең тиң тіп саналча. Кӧзідімге, 2024 чылда ікі команданың тоғазии 3:3 саннаң тоозылған, пылтыр «Сибсельмашха» оң полған. Ӧмедегілер «Саяныны» 6:1 саннаң чиңіп алғаннар. Пӱӱл кирек хайди парыбызар ни?
Сизінгенде, хоккеисттерібіс алындағы утырыстарға ӧкпелен партырлар. 4-ҷі минутада Руслан Гавричков санны асча. Кӧрігҷілернің чӱреенде ӧрініс. «Ыырҷаа» чиңіc кирегӧк. Тӱрчедең новосибирсктегілер санны тиңнестірібіскеннер. Че пістіңнерні тут полбассың. 26-ҷы минутада Роман Шохов «Сибсельмаштың» хаалхазынзар меспекті кире сабысты, тайм тоозылғанҷа арғызына Владислав Рябухин хозылған. Сан – 3:1. «Саяны» утча.
Тынағ тузында «Сибсельмаштың» ӧӧн тренері Кирилл Петровский кирек сӧстер тааптыр. Ікінҷі тайм пасталарға даа маңанмаан, «Саянының» хаалхазынзар меспек учухча. Читтір парирбыс. 60-ҷы минутада хайым пол парды. Сан – 3:3. Таныхтирға кирек, пӱӱл марығларға алызығлар киріл парғаннар. Алында командаларға чиңіс ӱчӱн 3 сан пирілҷең, хайым ӱчӱн – 1 сан. 2026 чылдаң чиңіс 2 санға тиңнелче. Хайым пол парза, хоккеисттер овертайм ойнапчалар. Аның тузында чиңіcчі табылбаза, командалар пенальти саапчалар. Тоғазығны овертаймнаң Кирилл Кузьмин ал халған. «Саянының» хоккеизі, 87-ҷі минутада гол кире сабызып, Хакасияа чиңіс ағылған. Команданың чидиинеңер республиканың прай СМИ-лары искіргеннер.
Хомзынысха, «Саяны» кӧрігҷілерін паза ӧріндір полбаан. Чир-суғҷыларыбыс «СКА-Нефтяникке» 1:20 саннаң утыр салғаннар. Руслан Гавричков – чалғыс голның авторы. 19 ӱртӱнде «Байкальские соколы» пістіңнерні 9:1 саннаң чиңіп алғаннар. Ол гол ідӧк Гавричковтың чидии. Хакасияның ӧмезінің капитаны аны ойынның 90-ҷы минутазында кире сабысхан. Андағ меспектерні «престиж голы» тіп адапчалар.
«Кузбасс-2» команданаң тоғазығ уғаа хазыр ирткен. Хаалха хадағҷызы Владислав Атапинні махтирға кирек. Аның кӱстенізінең «ыырҷы» пастағы таймда пір ле меспек кире саап алған. Тоғазығның ікі чардығында «Кузбасс-2» позының адына хоза 5 гол пас салған. Хакасиядағы командада матырларға Руслан Гавричковнаң Алексей Башарымовты санирға чарир. Хоккеисттер, хада-пірге тудынып, 57-ҷі паза 59-ҷы минуталарда пустығ чазының ээлеріне нандыр пиргеннер. Матч 2:6 саннаң тоозылған.
«Саяны» пір чиңіс тутхан соонда читі команда аразында алтынҷызы полыбысхан. «Сибсельмаш» прайзына утыр салған. Пу салтарларға хомзынарға кирек пе? Пылтыр хакасиядағылар ікі чиңіс тутханнар. Оолларыбыс «Кузбасс-2» паза «Байкал-Энергия» ӧмелерні чиңіп алғаннар. Аннаң тиңнестірзе, «Саяны» уйан кӧрінче. Че хоккей ӧмезі Россия чемпионадында пір дее турыстыра ойнап полбаан. Аннаңар пастағы марығны хатығ сыныхтағнаң тиңнестірерге чарир. Россия чемпионадында олох ӧмелернең тоғазарға килізер. Амды иділген алҷаастар санға алылчалар, оларны тӱзедерінҷе тоғыс парча.
Россия кубогының ікінҷі чардығы 5 – 11 чарыста Хабаровскта иртер. «Іcкеркі» ӧмедең анда «СКА-Нефтяник», «Кузбасс» паза «Енисей» ойнирлар, «Кидеркі» ӧмедең – «Динамо», «Уральский трубник» паза «Водник». Пістің «Саяны» Россия чемпионадына тимненер. Ол 7 кічіг хырласта пасталча.
Сом «Саяны» клубти
Автор :
Майя Кильчичакова
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
