Бензин паазының ӧскенi таныхталбинча
24.09.2026
Хабарлар
Роман Ковтун топливо чырғалындағы кирек хайди парчатханынаңар искірген
Кӱн сурии. 22 ӱртӱнде Хакасия правительствозында топливо суриин хайығда тудар штабтың теестегi чыылии ирткен
Анда пӱӱнгi кӱнге топливонаң палғалыстығ кирек хайди парчатханын, пааларны ӧскiрбес ӱчӱн хайдағ тоғыс апарылчатханын паза пу кӧстегҷе пасха даа ағырсымнығ сурығлар ӱзӱрiлгеннер.
Хакасияның экономика тилiзi министрi Роман Ковтунның искiриинең, 22 ӱртӱнге республикада 92 маркалығ бензиннiң чыындызы 3453 тоннаа тиңнелче, ол 15 суткаа чидер тiп кӧрiлче, 95 маркалығ бензин – 3347 тонна ідӧк 15 суткаа, дизель топливозы – 7251 тонна 32 суткаа. Полызығ, арачыланыс паза коммунальнай службаларға топливо читкіҷе пирiлче.
Нефтебазалардаңар чоохтаза, Ағбанда 92 маркалығ бензиннi чығҷаң орын 53%-ке толдырыл парған, 95 маркалығ бензинни – 67%-ке, ДТ – 100%-ке. Харатаста: 92 маркалығ бензин – 86%-ке, 95 маркалығ бензин – 52%-ке, дизтопливо – 70%-ке. Ирткен неделянаң тиңнестiрзе, прай маркаларның чыындызы сала ӧс парған.
Ирткен неделяда чонға «ХТК» компанияның пис автозаправказы хоза азылған – Абазада, Ымайда, Тадар Тисте, Троицкайда. Ағбанда паза Знаменкада «Хакнефть», «Ачинские нефтепродукты», «ОПТИ» компанияларның паза пасха даа алынҷа идiнҷектернiң АЗС-тарының чардығы азылған.
Хакасия пазының чахиинаң экономика тилiзi министерствозы ирткен неделяда алынҷа идiнҷектернең топливаа пааларны кӧрiлген синде тудардаңар читі чӧптезiг ит салған. Iди чӧптезiглерде В.В.Городилов («ХТК»), А.И.Середа, С.А.Сомов, М.В.Нефедов («Хакнефть») идiнҷектер, «ТК «САЯН» ООО («ОПТИ»), «Альфа» ООО, «РосНефтеПродукт» ООО хол салыбысханнар. Анзы топливоның садиинаң айғасчатхан алынҷа идiнҷектернiң тиксi санынаң 50%-i пол парча. Чӧптезiге хозылған идiнҷектерге топливо пурун читiрiлер тiп кӧрiлче. Идiнҷектерге бензиннi паза дизель топливозын кӧрiлген паадаң аарлыға садарға чарадылбинча. Халған идiнҷектернең чӧптезiг идер тоғыс апарылча.
Хакасияның аал хонии паза ас-тамах министрi Сергей Труфанов республиканың аграрийлерiне топливо читiрiлерiнең палғалыстығ сидiксiнiстер чоғыл тiп таныхтаан. Пӱӱнгi кӱнге «Газпромнефть» аграрийлерге дизель топливозын пір тоннаны 89150 салковайға сатча, «Роснефть» – 89 муң салковайға.
Хакасиядағы УФАС-тың устағҷызы Ксения Лебедеваның таниинаң, неделя аразына бензиннiң садылчатхан паазы алыспаан, килкiм компанияларның заправкаларында ДТ-ның паазы сала тӧбiн пол партыр. Ол iдӧк идiлген чӧптезiглернiң тузазын таныхтаан.
Паза чыылығда тимiр чолларҷа топливо читiрiлчеткенiнеңер чоохтааннар. Анда тоғыс кӧрiлген график хоостыра парча тiп таныхталған.
Iдӧк чыылығда заправкаларның кӧрілген тыхтағ тоғыстарын толдырарына чабылары ӱзӱрiлген. Оларны соона чылдырарға паза чарабас тiп таныхтапчалар компаниялар кiзiлерi. Резервуарларны арығлир тоғыстарны +5 градустаң соох полғалахха толдырыбызарға кирек осхас. Аннаңар Ағбандағы Аскизскай орамадағы «Роснефть» заправка чабылча. Тоғыстар 25 ӱртӱнге теере апарыларлар тiп чоохтаан компанияның кiзiзi. Саяногорскта «Газпромнефть» заправка насостарны тыхтир тоғыстарны пастапча. Компания пу кӱннерге «ОПТИ» заправкаа позыдылар бензиннiң синiн ӧскiрерге молҷаан. Че таныхтирға кирек, ол тоғызын саңай тохтатпас, анда алынҷа колонкалар ла тоғынмас. Тоғыстар он кӱнҷе парар тiп таныхталча.
Сом Дмитрий Сунчугашевти
Автор :
Татьяна Кыштымова
| Пн | Вт | Ср | Чт | Пт | Сб | Вс |
| 28 | 29 | 30 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
