«Ойын» кiннiң iзии тиксi республиканың палаларына азых
23.09.2026
Хабарлар
Марина Бутьянова хызыҷахтарны узанарға ӱгретче
Нацпроект. Пу кӱннерде С.П.Кадышевтiң адынаң чон чайаачызының национальнай кiнiнде республиканың кiчiг чуртағҷыларына наа «Ойын» культура-чарыдығлығ кiн пайрамни азылған
Пылтыр С.П.Кадышевтiң адынаң чон чайаачызының национальнай кiнi тиксi хазнадағы Культура туралары аразында иртiрiлген улуғ марығда чиңiсчi полыбысхан. Аны Россияның культура министерствозы «Сӧбiре» нацпроектче иртiрген. Iди пӱӱл учреждение «Ойын» олған культура-чарыдығлығ кiннi тӧстирiне федеральнай бюджеттең 3,8 миллион салковай субсидия алған. Чайғызын позыдылған ахчаа теелбек залында стенелер нааҷылалғаннар, чарытхы оборудованиезi турғызылған, проектор, ноутбук, фотоаппарат, кӧг тирiглерi, аймах мебель паза олғаннарға тилiҷең ойыннар алылғаннар.
Ӱртӱн айының 17-ҷi кӱнiнде наа кiннi пайрамни азарға илееде чон чыылысхан. Улуғ аалҷыларның аразында Хакасия пазы Валентин Коновалов паза Хакасияның культура министрi Светлана Окольникова полғаннар. Устағ-пастағ кибiрли хызыл лентаны хыплаан. Оларға культура учреждениезiнiң директоры Анна Шаламова хозылған.
Наа культура-чарыдығлығ кiннiң иркiнiн алтаанда, пайрамға килген чон алғым паза чарых турада пол парған. «Ынархас» олған теелбек студиязы аалҷыларға «Краски творчества» теелбектi сыйлаан соонаң Хакасия пазы Валентин Коновалов прайзын чалахай кӱннең алғыстаан:
– Пӱӱн олғаннарға хайхастығ кiн азылча. Республиканың кiчiг чуртағҷылары мында ойнирлар, хоостирлар, музыканаң айғазарлар, театр искусствозынаң танызарлар. Пу кiнде хынығ тоғазығлар паза чапсых мастер-класстар удаа иртерлер. Оолахтар паза хызыҷахтар фильмнер кӧрерлер. Полған на пала позының кӧңнiне чарас айғасчаң ниме-ноо паза наа нанҷылар таап алар. «Ойын» кiнде олғаннарның хатхы-кӱлкiзi ӱзiлбезiн. Олар пеер улуғ ӧрiнiснең чӧр турзыннар. Ӱгретчiлер ӧмезіне iдӧк чахсы чидiглер алғапчам, прай хынған сағыстары толзын.
Чыылысхан чонзар видеоҷа айланып, наа кiн азылғанына ӧрiнiзінең Россияның культура министрi Ольга Любимова ӱлескен.
– Аарлығ нанҷылар, Россияның культура министерствозы адынаң культура-чарыдығлығ кiн пайрамни азылғанынаң алғыстапчам. Ӧсчеткен тӧлге полызары хазнаның ӧӧн кӧстеглерінiң пiрсi полча. Амғы туста наа паза истiг учреждениелер кирексiнiснең тузаланчалар. Библиотекалар, Культура туралары, музейлер хазнаның ыраххы пулуңнарында прай нааҷылалчалар. Олған кiннерi азылғаны чуртағҷыларның чуртас оңдайлары тилiпчеткенiн таныхтапча. Пастағы олған кiннерi «Сӧбiре» национальнай проектче пылтыр тӧстел сыхханнар. Оларның саны хозылча. Пӱӱл 75 регионда прай 300 андағ кiн азылары кӧрiлче. Мындағ кiннерде чон кибiрлерi паза наа технологиялар палғалыс парчалар. Прайзына пӧзiк чидiглер алғапчам, – теен Ольга Борисовна.
«Ойын» культура-чарыдығлығ кiннең Анна Алексеевна Толмашова устир. Ол позының наа тоғызынаңар толдыразынаң чарыт пирген. Аның искiриинең, «Ойында» С.П.Кадышевтiң адынаң чон чайаачызының национальнай кiнiнiң тоғынҷылары iстенерлер. Оларның культура киреенде тоғынҷаң опыттары улуғ. Кӧзiдiмге, олғаннарны холнаң узанарға Марина Михайловна Бутьянова кӧнiктiрер. Олар чаҷыннаң, иснең паза пасха даа материалларнаң тоғынарлар. Палаларның чайаачы тоғыстары ай сай кӧзiдiге сығарыл турарлар. Чиит специалист Айяна Викторовна Сагалакова олғаннарны хоостирға ӱгредер. Сомға суурҷаң чазыттарны С.П.Кадышевтiң адынаң чон чайаачызының национальнай кiнiнiң сомҷызы Олег Леонидович Ковалёв чоохтир. Олғаннарны театр искусствозынаң Виктор Анатольевич Сагалаков таныстырар. Ол С.П.Кадышевтiң адынаң чон чайаачызының национальнай кiнiнде театр чайаачызынҷа специалист полча. Музыка аймах сарыхтарға чарылчатханнаңар, пу кӧстегҷе аймах ӱгретчiлер тоғынарлар: хайзы хакас сарыннарнаң таныстырар, кем-де эстрадаа кӧнiктiрер паза даа пасхазы. Аның ӱчӱн «Ойын» кiн пасха культура учреждениелерiнең палғалыс тудып тоғынар. Хореография уроктарына iдӧк аймах учреждениелернiң специалисттерiн тартарлар. Хакас теелбектерiне «Ынархас», «Айас», «Час ханат» олған студияларының хореографтары ӱгретселер, че хип-хоп, брейк-данс паза пасха даа теелбек сарыхтарынаң таныстырарға пасха студияларның устары кил турарлар.
Iдӧк «Ойында» олғаннарға кинолар кӧзiдерлер. Анзына «Сӧбiре» нацпроектче ӧнетiн проектор алылған. Палалар, хап-сiреелерде одырып алып, чапсых фильмнер кӧрерлер. Наа культура-чарыдығлығ кiнде оолахтар паза хызыҷахтар хакас паза пасха даа чоннарның ойыннарын ойнирлар.
– «Ойын» кiнде олғаннар постарының кӧңнiлерiне чарас ниме-ноонаң айғас поларлар. Пiс олған искусство школаларынаң нименең пасхалаларбыс? Олған искусство школазында олғаннар пiр ле кӧстегҷе ӱгренчелер: хоосчылар хоостапчалар, кӧгҷiлер музыканаң айғасчалар, теелбекчiлер теелбек салчалар. Пiстiң кiнде андағ полбас. «Ойында» пала узанҷаң мастер-класста аралас полар. Кӧңнi полза, сомға суурарға ӱгренер. Хынза, хореографиянаң танызар. Пiр сӧснең, пiстiң кiнде пала позын аймах кӧстеглерҷе сынап полар. Прай ӱгредiглер, мастер-класстар, ойыннар тикке иртiрiлер, – чарытхан Анна Толмашова.
Олған кiнi 2027 чылның кӱрген айынаң тоғынып пастир.
Сом r-19.ru сайттаң
Автор :
Татьяна Тютюбеева
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
