«Саяны» пик хылиин кӧзітті
18.09.2026
Хабарлар
Пістің ооллар «Енисейнең» прай кӱстерін салып ойнааннар
Меспектіг хоккей. Пу кӱннерде Россия кубогының таллағ чардығы иртче. Пустығ чазызар 13 ӧме сыххан
Ирткен чылларнаң тиңнестірзе, пӱӱл Россия кубогы орай пасталды. Кӧзідімге, 2023 чылда хоккеисттер чиңіс ӱчӱн орғах айында харбасханнар. 2026 чылда арға-мӧрійнің пастағы ойыннары 14 ӱртӱнде ирткеннер. Мында таңнаҷаң ниме чоғыл. Чайғы тоозылғанҷа Суперлигада нинҷе команда ойнирын пірдеезі пілбеен нооза. Ахча чохтаңар «Старт» команда (Нижний Новгород) Суперлигадаң парыбысты, «Саяны» чадап тудыл халған.
Хоккей ӧмелерiне Россия кубогы – пастағы сыныхтағ. Аның тузында командаларның кӱстiг сариларын, читпестерiн оңарып аларға чарир. Cуперлигада 12 ле ӧме халған, че Россия кубогында 13 командаа узын кӧзітче. Хазнаның меспектiг хоккейҷе федерациязы «Кузбасс-2» командаа арға-мӧрійде аралазарға чараттыр. Марығ оңдайларынҷа араласчыларны ікі ӧмее чарыбысханнар. «Кидеркі» ӧмезер кірчеткен командалар – «Динамо» (Москва), «Водник» (Архангельск), «Волга» (Ульяновск), «Уральский трубник» (Первоуральск), «Родина» (Киров), «Ак Барс-Ракета» (Хазан) – Ульяновскта ойнапчалар. Халғанҷы команда пӱӱл адын алыстырыбыстыр. Ол алында «Ак Барс-Динамо» адалған. «МК-Хабаровск» СМИ таниинаң, хоккей командалары аттарын алыстырарға хынадырлар. Мында первоуральсктағыларны чемпионға санирға чарир. «Уральский трубник» – ӧменің алтынҷы ады.
«Саяны» команда «Іскеркі» ӧмеде. Хоккеисттерібіс Кемеровта «Енисей» (Хызылчар), «Сибсельмаш» (Новосибирск), «Байкальские соколы» (Иркутск), «СКА-Нефтяник» (Хабаровск), «Кузбасс» паза «Кузбасс-2» (Кемеров) командаларнаң тоғасчалар. Полған на ӧмедең азах меетке 3 команда сығар. Олар медальлар ӱчӱн харбазарлар. Финаллар 5 – 11 чарыста Хабаровскта иртерлер.
Пӱӱнгі кӱнге «Саяны» ікі тоғазығ иртiрібіскен. 14 ӱртӱнде «Енисейнең» ойнаан, 15 ӱртӱнде – «Кузбасcнаң». Киҷее тынағ кӱн полтыр. Пастағы матч сынап хайхатхан паза ӧріндірген. Ол киречілеен: «Саяны» – пик хуйахтығ паза чиңіcтерге кӧстегліг команда. Хоккеисттер, арға-мӧрійлерге сағын парып, таң, чарғыҷы cығырғандох, пустығ чазыда ӧткін хайын сыхханнар. Ӱзінҷі минутада «Саяны» сан асча! Ол Дмитрий Загайновтың чидии. Итсе, пір минута пазынаң Сергей Ломанов санны тиңнестірiбіcкен. Піcтіңнер тӧдір пазынминчалар. Тӱрчедең сан 2:1 пол парды. Пазох Дмитрий Загайнов ӧріндірче. Хоккеист Руслан Гавричковтың хабазиинаң «ыырҷының» хаалхазынзар меспекті кире сабысхан. Тоғазығның пастағы чардығы 3:7 саннаң тоозылды. «Саянының» ікінҷі таймға кӱзі чидер ни?
Кӧрігҷілер тиктең чӱрексіптірлер. 48-ҷі минутада «Енисейнің» хаалхазынзар пазох меспек учухча. Голның авторы – Кирилл Кузьмин. Сан – 4:7. Салтарында «Саяны» 6:11 саннаң утыр салған. Іди дее полза, команда харбасхан, прай кӧңнін салып ойнаан. Ікілер меспек Руслан Гавричковнаң Дмитрий Загайнов кире сабысханнар, пірер – Кирилл Кузьмин паза Олег Селиверсткин.
15 ӱртӱнде «Саяныға» хатығ чуғар тіп прайзы пілген. «Кузбасс» – кӱстіг команда. Кемеровтағылар ікі хати Россия чемпионадында чиңіс тутханнар. Хаалха хадағҷызы Владислав Атапиннің паза команданың кӱстенізінең пастағы тайм 0:1 cаннаң тоозылған. Ойынның ікінҷі чардығында хоккеисттернің меспекті кире сабызарға паза арачыланарға устары читпиндір. Сан – 0:9.
Тынанып алған соонда «Саяны» аннаңох кӱcтеніп ойнирына ізенчебіс. 17 ӱртӱнде 19.00 часта хакасиядағылар «Сибсельмашнаң» тоғасханнар, 18 ӱртӱнде «СКА-Нефтяникнең» ойнирлар, 19 ӱртӱнде – «Байкальские соколы» ӧменең, 20 ӱртӱнде – «Кузбасс 2» команданаң. Салтарлардаңар искірербіс.
Сом «Саяны» клубти
Автор :
Майя Кильчичакова
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
