Чылығны пирiп пастирына кӧп тус халбады
18.09.2026
Хабарлар
Селекторҷа чыылығ. Киҷее Хакасия пазы Валентин Коновалов республиканың муниципальнай пӱдiстерiнде чурт-коммунальнай хоных объекттерi 2026-2027 чыллардағы чылығ пирҷең тусха хайди тимнелчеткенiне чарыдылған селекторҷа чыылығ иртiрген
Хакасияның ЖКХ паза энергетика министрi Максим Виноградовтың чооғынаң, пу неделяда чурт чыындызының паспортизациязын иртiрерi тоозыл парған. Республикабыста паспорт аларға кирек полчатхан кӧп квартиралығ 2423 тура саналча. Пӱӱнгi кӱнге оларның 2414-i паспортты алып алған. Паспорттар ал полбааннар: Ағбанда – кӧп квартиралығ пір тура, Ағбан пилтiрiндегi Зеленай аалда – пір тура, Саяногорскта – пір тура, Ымайда – алты тура. Саяногорсктағы тура – общежитие, анда туранаң устир оңдай таллалбаан, аннаңар кирек тоғыстар тузында толдырылбааннар. Пасхазында гидравлика сыныхтағлары паза системаны чуур тоғыстар ам даа апарылчалар, че олар чылығ пирҷең тус пасталарына тимде поларға киректер тiп искiрiлген.
Мындағ оңдайнаң, кӧп квартиралығ тураларның паспорт алары 99,6 %-ке тиңнелче. Пӱӱл тоғыс тура паспорттарны кӧрiлген тусха ал полбаан, ирткен чылда андағ 16 тура саналған.
Хакасияда чылығ пирер тус кӧместең пасталча. Пӱӱнгi кӱнге Асхыс аймааның Писхамҷы паза Тӧӧ пазы посёлоктарда, Орджоникидзе аймааның Приисковай посёлогында тураларзар чылығны пирiп пастабысханнар.
Чылығ пирер тус чағдап килгеннең, хай пiрее муниципалитеттерзер сурығлар сығысханнар. Оларның санына Асхыс, Жемчужнай ааллар кiрчелер. Оларда тыхтағ тоғыстарын толдырары графиктең соона халчатханы таныхталча, аннаңар чылығ тузында пирiлбес тiп хорғыс пар.
Iдӧк чыылығда хара тас чыындызын тӧстирiне хайығ айландырылған. Пӱӱнгi кӱнге аның синi 46 муң тоннаа тиңнелче, ол кирексіністерҷе кӧрiлген чыындының 228 %-iне тиңнелче. Кирексіністерде 20,1 муң тонна кӧрiл парған. Ағбандағы ТЭЦ-та хара тас чыындызының синi 100 %-тең асча. Асхыс аймаанда Асхыстағы 1 № котельнайда, Хамыстығ, Ӱс чул, Кызлас аалларда, Пии аймаанда Кирбi аалда, Боград аймаанда Тадар Тис, Знаменка аалларда, Сыра аймаанда Сыра, Жемчужнай, Коммунар, Сон пилтiрi, Наа чир, Чирiм аалларда хара тас чыындызы, Ағбан пилтiрi аймааның котельнайларында хара тастың синминчеткен чыындызы тимнелбеен тiп таныхталған. Пу адалған ааллардағы чылығ пирҷең организацияларға 10 суткадаң асхынах нимес тусха чидер хара тас чыындызын тимнирге кирек тiп сизiндiрiг идiлген.
2026-2027 чыллардағы чылығ пирҷең тусха хара тас аныпчатхан компанияларнаң социально-экономическай кӧстегҷе хада-пiрге тоғынар чӧптезiгҷе 15,5 муң тонна хара тас пирiлген. Муниципалитеттерге пу хара тасты тартарынҷа тоғысты ӧткiн арах апарарға чахығ пирiлген.
Чарытхы пирҷең организацияларнаң тоғыс кӧрiлген оңдайҷа парча. 122 подстанцияның 98-iнде, ол 80 %-тең азыра, паза 529 км сетьтернiң 417 км сетьтерінде, ол 78 %, тыхтағ тоғыстары тоозыл парғаннар.
Iдӧк Максим Виноградов искiриинде чылығ пирҷең тусха тимненiске, ол санда коммунальнай инфраструктураны нааҷылирына, ахча хайди позыдылчатханнаңар чоохтаан.
Министрнiң чооғы соонаң, адалған муниципальнай пӱдiстернiң устағ-пастаанаң сығысхан читпестернi чох идерiнҷе тоғыстар хайди парчатханнаңар сурғаннар. Министерство-ведомстволарға оларны хайығда тударға, кирек полза, хабас пирерге чахылған.
Чыылығны тоосчадып, Валентин Коновалов тимненiс паспорттарын аларын соона салдырбасха кирек полчатханына хайығ айландырған. Пӱӱл аны алған объекттернiң саны ирткен чылдағызынаң артых поларға кирек теен ол. Валентин Олегович халғанҷы чылларда оларны техническай саринаң тимнирiнҷе улуғ тоғыс апарылған, амды ол чидiглернi пiчiкте кӧзiт пирерге кирек тiп таныхтаан.
Сом r-19.ru сайттаң
Автор :
Татьяна Кыштымова
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
