Чааҷы чир-суғҷыларыбысха хабазып
11.09.2026
Хабарлар
Хакасияның искусстволар колледжінің «Big Band» джаз оркестрі
Чайаачы иир. 9 ӱртӱнде Ағбан пилтiрi посёлоктағы «Имидж» культура-ӱтертiс кiнiнде полызығлығ концерт ирткен
Ӧнетiн чаа операциязы парчатхан туста пiстiң республика Чиңiстi чағыннадарға прай кӱзiн салча. Чуртағҷылар пу оой нимес туста Чир-суубысты арачылирға кӧдiрiлген махачы чааҷыларыбысха нинҷе пар оңдайнаң полызарға кӱстенчелер. Пу кӱннерде Ағбан пилтiрiндегi чуртағҷылар, полызығлығ чӧрiмде аралазып, «Имидж» культура кінінзер Хакасияның искусстволар колледжiнiң студенттерiнiң хайхастығ концертiн кӧрерге килгеннер. Аарлығ аалҷыларның аразында Хакасия пазы Валентин Коновалов паза регионның культура министрi Светлана Окольникова полғаннар. Оларны Ағбан пилтiрi посёлоктың пазы Нина Леонченко чылығ удурлаан.
– Пӱӱн Хакасияның искусстволар колледжiнiң студенттерi полызығлығ чайаачы иир иртiрчелер. Чыылған ахчаны пiс ӧнетiн чаа операциязында араласчатхан чир-суғҷыларыбысха ыс пирербiс. Ағбан пилтiрi посёлоктың чуртағҷылары, хада-пiрге ынағ тудынып, СВО чааҷыларына матлама полысчалар. Пiстiң ипчiлер кӱннiң сай чӱленҷең сетьтер ӱрчелер. Олар тӧрт чыл аразына 40 километр азыра сеть ӱр салғаннар, анаң аны прай СВО-зар ысчалар. Ағаа хоза, Ағбан пилтiрiнде чуртапчатхан цыганнар диаспоразы ӧткiн хабасча. Олар ай сай ахча чыыпчалар, анаң пic хада, садығ базаларынзар парып, чааҷыларыбысха кирек ниме-ноо алчабыс. Чир-суубысты арачылапчатхан оолларыбыс чылығ резина сапогтар сурааннар. Iди цыганнар диаспоразы полызиинаң пiс киҷее 50 кізее сапогтар ызыбысхабыс. Пiстiң ипчiлер чааҷыларыбысха чылығ носки-мелейлер палғапчалар, аймах чiҷең ниме тимнепчелер. Пiстiң поссовет хаҷан даа хуруғ полбинча. Пiр таарлағ полызығ ызыл парзох, сағамох наа харачахтар тол парчалар. Мин чуртағҷыларға улуғ алғызым читiрчем, – кӧңнiн читiрген ол.
Хакасияның культура министрi Светлана Окольникова Ағбан пилтiрiндегi «Имидж» культура-ӱтертiс кiнi нааҷылалған соонаң чуртағҷылар пеер полызығлығ чӧрiмде аралазарға чыылысханы уғаа танығлығ теен.
– Хакасияның искусстволар колледжiнiң чиит кӧгҷiлерi махалығ концерт ағылғаннар, аннаңар аны хайди даа кӧрiп аларға кирек. Пiстiң чааҷыларға полызар ӱчӱн культура тоғынҷылары концерттер удаа иртiрчелер, театрлар ӧнетiн спектакльлар турғысчалар. СВО-дағы чир-суғҷыларыбысха ахча, имнер паза пасха даа кӧп кирек ниме-ноо чыыпчабыс. Культура тоғынҷылары кирек чирде хаҷан даа ӧткiн араласчалар, – таныхтаан ведомство устағҷызы.
Ағбан пилтiрi посёлокта «Добрые руки за Победу» волонтёрлар клубы пар. Ол «Золотые руки Ангела» тиксi Россиядағы пос кӧңнiнең чӧрiмнiң пӧлии полча. Клуб Илбек кнес Александр Невскийнiң тигiрибiнде орныхча. Андар 24 ипчi чӧрче, прайзы тынағда.
– Пенсия килзе, пiс ай сай ахча чыыпчабыс. Кем нинҷе пир полча, анҷа пирче: 500 салковай, 1000 салковай. Туған-чағыннарыбыстаң iдӧк ахча чыыпчабыс. Анаң чӱленҷең сетьтер ӱрҷең ис алчабыс. Клубнаң Людмила Бодоговская устапча. Истi аларға ол чӧрче. Неделя сай ӱс сеть ӱрiбiсчебiс. Аның узуны алты метр, чалбаа ӱc метр. Пiс хада-пiрге тоғынарға кӧнiк парғабыс, удур-тӧдiр сағыныс парчабыс. Ағбан пилтiрiнде ипчiлер харибі пар. Людмила Бодоговская андағы ипчiлернi iдӧк сетьтер ӱрерге ӱгрет салған. Неделя тоозылчатса, устағҷыбыс пiстiң паза колониядағы сетьтернi чыыбысча, анаң Ағбанзар апарыбысча. Пiснең хада сетьтер ӱрчеткен ӧӧребiс Алевтина Ефимованың оолғы пизiнҷi чылы СВО-да араласча. Ол, тӧреен чир-суунзар килзе, пiссер хайди даа тоғазарға кiрче, тоғызыбыс ӱчӱн улуғ алғызын читiрче. Пiс чӱленҷең сетьтерні тигiрибде палғапчабыс нооза, аннаңар полған на сетьке Худай сӧстерiн хығырчабыс, – чоохтаан «Добрые руки за Победу» клубтың араласчызы Надежда Серкина.
Сом Дмитрий Сунчугашевти
Автор :
Татьяна Тютюбеева
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде



