Чиистiң аймағын кӧрдiлер, иң татхынын амзадылар
09.09.2026
Хабарлар
Ярмарка тузында
Губернатор ярмарказы. Тынағ кӱннерде республиканың аал хонии чырғалында губернатор ярмарказы ирттi. Ол Яблоко паза Мӧӧт спастарына чарыдылған
Пӱӱл ярмарка тӧртiнҷi хати иртiрiлдi. Ол орындағы сығарығҷыларға республика чуртағҷыларын ас-тамахнаң, кип-азахнаң, сувенирлернең паза даа пасха ниме-ноонаң таныстырар оңдай пирче. Аал хонии чырғалында садығ орны оларға тикке пирiлче. Пӱӱл ярмарка ӱс кӱн ирткен.
Тынағ кӱннерi айас турыбысханда, чонның кӧбiзi ӱӱҷiктерiндегi чир тамаан чыған полар. Че андағ даа полза, ярмаркаа илееде кiзi кил парған. Иң кӧп чон чечiмеде полған. Пу кӱнде ярмарканың тоғызын Хакасия пазы Валентин Коновалов пайрамни асхан. Аннаң хада чырғалда республиканың Ӧӧркi Чӧбi кнезiнiң пастағы орынҷызы Пётр Воронин, министерстволарның устағҷылары, депутаттар полғаннар.
Иң пурун Валентин Олегович ярмарка араласчылары садыға сығарған ниме-нооны кӧрiп алған, садығҷыларнаң чоохтасхан. Хакасияның тилiс фондының – «Минiң пос киреем» кiннiң директоры Валерий Евлахов ағаа идiнҷектердеңер, оларның айғасчатхан киректерiнеңер чоохтап турған.
– Амғы туста Хакасияда ӧскiрiлген, сығарылған ниме-нооны алчатсаң, ол татхыннығ, пӧзiк качестволығ полар тiп пiр дее iкiнҷiлебинчезiң. Аның ӱчӱн пiстiң дачниктерiбiске, ӱӱҷiк салчатханнарыбысха, аграрийлерiбiске, фермерлерiбiске, аал хонии сығарығҷыларына алғыс сӧстерiн читiрерге кирек. Пӱӱн мында пiстiң чирiбiсте ӧскiрiлген иң артых ниме-ноо садыға сығарылған. Полған на кiзее кӧңнiне кiрер нименi таап аларға чарир. Ярмарка iдӧк сығарығҷыларға товарларын аларға хынар кiзiлернi таап алар оңдай пирче. Мындағ хайызығлар Хакасия экономиказының тилiзiне хабасчалар. Пӱӱн, мындағ айас, чахсы кӱнде, ярмаркаа килген полған на кiзее алғызымны читiрерге сағынчам, – удурлаан сценадаң чыылысхан чонны Валентин Коновалов.
Ол аал хонии кӧстеенҷе, пос киреен тилiдiп, тӱзiмнiг паза пӧзiк салтарлығ тоғынчатхан ӱчӱн Хакасия пазының алғыстазын идiнҷек Инга Зауерге паза кресен-фермер хоных пазы Артём Концевойға читiрген. Iкiзi иттең тимнелген чиис сығарарынаң айғасча.
Iдӧк ярмаркада Хакасияның аал хонии паза ас-тамах министерствозының, республиканың аал хонии чырғалының сыйыхтары читiрiлгеннер. Оларны идiнҷектер Наталья Яковлева, Сергей Сердюк, Артём Угдыжеков паза Андрей Апрелков алғаннар.
Кӱскӱ – аймах чир тамаана, чапсых чииске пай тус. Аннаңар даа ярмаркада кӧрҷең, cадысчаң ниме пар полған. Анда аралазарға кiзiлер Хакасияның пасха-пасха пулуңнарынаң кил парғаннар тирге чарир. Сығарылчатхан ниме-нооны улуғ нимес идiнҷектер дее, килкiм аграрийлер дее садыға сығарғаннар. Оларның санында «Дух Хакасии», «Маркеловский продукт» кооперативтер, «Благо Сибири» сӧбiре компаниязы, Асхыстағы «Сағай чазызы» пiрiгiс, «Сытый бай» кафе паза даа пасхазы полғаннар.
Кем-де чонның хайиина амғы тусха чахсы таныс чиизiн, чейлерiн, иттең тимнелген ниме-ноозын сығарған. Кем-де наа ла сығарыл сыххан ас-тамаанаң таныстырған.
Садығ тураларында халғанҷы туста сiстеен нымырхалар садылчатханын удаа кӧрерге килiскен. Оларны Ағбан пилтiрiндегi хус фабриказы сығарчаттыр. Чапсых оңдайнаң тимнелген нымырханы ол пӱӱл часхызын сығарып пастабыстыр. Пызырылған нымырхалар бук ағастың узағының ызында сiстелчелер тiп чоохтапча «Вкус» компанияның паза хус фабриказының маркетологы Светлана Ипполитова. Садыға таңах идiнең тимнелген пасха даа продукция сығарылған. Iдӧк фабрика чонның хайиина таңахтың хоң идiнең тимнелген консерваларны пастағызын на сығарған, сағам олар садығда чоғыллар. Че тӱрчедең садығ тураларының тасхахтарында оларны табарға чарир.
Iдӧк пос сығарған чииснең паза гастрономическай экотуризм кӧстегҷе полызығларынаң «Сартак» кресен-фермер хонииның пазы Сабина Бургундосова таныстырған. Хоныхта малларны, хойларны, ӧскiлернi, таңахтарны, хастарны, индюктарны тутчалар паза анда прайзы хынчатхан Агнесса ослиха пар.
Сабина Владимировнаа хоныхты тилiдерге аның iҷе-пабазы полысчалар. Олар ӧӧнiнде ӧскi идiнең чиистi тимнепчелер: олаңай итке сатчалар, сiстепчелер, тушёнка пызырчалар. Iдӧк ӧскi сӱдiнең пызылах, аймах сырлар тимнепчелер. Паза олар чейлернi тимнепчелер, харағай махайағынаң варенье пызырчалар.
Хоныхсар Россияның прай регионнарынаң аалҷылар кил парчалар. Олар татхыннығ чей iсчелер, чейге 8-9 кӧрiмнiг варенье, мӧӧт, тадылығ халас салылча. Анаң иирде туристтер хакас чонның чиизiнең танысчалар.
Аалҷылар хайди даа хатап килербiс тiпчелер тiп чоохтапча Сабина Владимировна. Чиит идiнҷектiң оларны чуртадар тураҷахтарны пӱдiрер сағыс пар, че сағам андағ оңдай чоғыл тiп хомзынча ол.
Ярмарка аал хонии сығарызынаң айғасчатханнарға даа, чуртағҷыларға даа чағын арах танызып алар чахсы оңдай пирче. Аалҷыларны кибiрли Хакасияның чайаачы ӧмелерi кӧзiдiглерiнең ӧрiндiргеннер. Пӱӱл ярмарканың пайрамнығ чардығында «Час ханат», «Ынархас», «Саяночка», «Медуница» ӧмелер, М.Л.Шрамконың адынаң орыс чон хоры чон алнына сыхханнар.
Cом r-19.ru сайттаң
Автор :
Татьяна Кыштымова
| Пн | Вт | Ср | Чт | Пт | Сб | Вс |
| 28 | 29 | 30 | 31 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
