Сӧрӧн кӱннер чылығ пирер тусты чағыннатчалар
09.09.2026
Хабарлар
Видеоселектор чыылии. Тасхар сӧрӧн кӱннер пiлдiрт сыхты. Кии чылии тӱскеннең тӱзiп ле одырча. Анзы тураларға чылығ пирер тус чағдапчатханын киречiлепче
Хайди республика чылығ пирер тусха тимненче? Пу сурығҷа Хакасияның ӱлгӱ туразында теестегi чыылығ ирткен. Аны кибiрли регион пазы Валентин Коновалов иртiрген.
Чыылығда ӧӧн сан пирiстi республиканың чурт-коммунальнай хоных паза энергетика министрiнiң орынҷызы Анатолий Безлепкин иткен. Аның искiриинең, пӱкӱлее регионның коммунальнай кирее хысхаа 90 процентке тимде, ол санда котельнайлар, чылығ пирҷең сетьтер паза даа пасхазы.
Амды ӧӧн хайығ тимнеглiг паспорттарны аларына салылча. Аны иң пурун чурт чыындылары алчалар. Ирткен видеоселектор чыылығларында регион пазы Валентин Коновалов прайзын аны ӱртӱн айының 15-ҷі кӱнiне теере нимес, 10-ҷы кӱнiне теере алып аларға чахығ пир салған. Пу тусха аны 100 процентке толдырыбысханнар Абаза город, Орджоникидзе паза Тастып аймахтары. Пасха муниципалитеттер ортымахти 80 процентке тимделер. Итсе-де, хайзыларының котельнайлары хысхаа тимделер, кирек пiчiктер ле алып аларға халды.
Хайдағ муниципалитеттер сағыссыратчалар республика ӱлгӱзiн? Кӧп квартиралығ туралар паспорттар хомай нимес алчатхан ползалар, котельнайларның прайзында тыхтағ тоғыстары тоозылбаан. Аннаңар хай пiрее город-аймахтар паспорттарны тузында ал полбазына чiгленiс пар.
Сорығ город хысхаа чылдаң чылға аар тимненче. Оларның пiрде котельнайдағы хазаннары иргiлен парған полча, пiрде нааларны турғыс полбин, ирееленчелер. Аннаңар чылдаң чылға пу муниципалитет, пасхазынаң тиңнестiрзе, уйан арах кӧрiнче. Пу наада хысхаа тимненерiнде хатабох сидiксiнiстер сығыс килгеннер. Хайди сан пирiс иткен город пазы Марина Гурай, Сорығдағы котельнайда чарытхы чоғыл, аннаңар анда тоғыстар апарылбинча, пiрееде генераторларнаң тузаланарға килiсчеӧк, че оларнаң кӧп ле тоғыс толдырып аларзың. Энергетиктер, тiзең, город устағ-пастаана удур парарға хынминчалар. Оларның тоғырланчатханы iдӧк пiлдiстiг. Устағ-пастағ чарытхы ӱчӱн санаспааннаңар, энергетиктер чарытхыны ӱзiрiбiскеннер. Тасхар соохтал сыхханда, социальнай объекттерде дее температура тӱсче. Ағаа хоза iзiг суғ чоғыл. Город устағ-пастаа чарытхы чох котельнайда тыхтағ тоғыстарын хайди тоозарын пiлбинче. Хакасия пазы Валентин Коновалов, энергетиктернең палғалызып, котельнайға чарытхы пирер сурығның узы-пазына сығарға чахығ пирген.
Таштып аймааның ӧӧн котельнайында паза ӧӧн имнег туразының котельнайында сидiксiнiстер пар. Имнег туразына наа хазан ирткен чылда алылған, че ол ам даа тасхар турча. Ноғадаңар? Турғызарға ахча чоғыл осхас. Хакасия пазы Валентин Коновалов наа хазанны турғызар оңдай таап аларға чахаан.
Асхыс аймаанда iдӧк хысхаа тимненiс ниик парбинча. Нинҷе-де аал-поселокта чылығ пирер тусха тимненерге аймах сылтағлар харығ полчалар, ол санда чарытхы ӱзiрiлгенi, котельнайларда тыхтағ тоғыстары читiре толдырылбаан тiп искiрче Асхыс аймаа пазының тоғызын толдырчатхан Евгений Костяков.
Чыылығ тоозылчатханда, Хакасия пазы Валентин Коновалов прайзынзар айланған.
– Чылығ пирер тусха прай муниципалитеттер тимнеглiг паспорттарын алып аларға киректер. Сидiксiнiстер полза, Ростехнадзорнаң чағын тоғыныңар, чӧптезiңер, ағырсымнығ сурығны табырах пӧгiңер.
Правительство город-аймахтарға хысхаа тимненерге прай саринаң хабасхан, ахча позытхан, хазаннар алған. Че ирткен чыл прайзы паспорттар ал полбаан. Ӧӧн сылтағ – пiчiктернi иптiг тимнебеенi. Котельнайлар тоғынарға тимде полғаннар, че хай пiрее муниципалитеттер пічіктер тимнеп тутхлан салған сылтаанда, тимнеглiг паспорттарны ал полбааннар. Пӱӱл андағ ниме полбасха кирек. Аннаңар прайзын пiчiктернi иптiг тимнирге хығырчам.
Муниципалитеттерні хысхаа тимнирі, паспорттарны алары – ол город-аймах пастарының нандырии. Аннаңар пу сурығнаң сірер постарың айғазарға кирексер.
Iдӧк федеральнай паза региондағы программаларҷа апарылчатхан тыхтағ тоғыстарын прай тоозарға, подрядчиктернең чағын тоғынарға хығырчам. Паза чоннаң тоғыс апарарға ундутпаңар, олар чурт-коммунальнай полызығлар ӱчӱн тузында тӧлезiннер, – таныхтаан чооғында Валентин Олегович.
Сом r-19.ru сайттаң
Автор :
Оксана Котюбеева
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
