Чииттернiң таланттарын тилiдер оңдай тӧстелче
04.09.2026
Хабарлар
Сыныхтағ тузында
Нацпроект. Харатас городта «Чииттер паза олғаннар» нацпроекттiң «Регион чииттерге» федеральнай программазы хоостыра республикадағы чиит улусха ӧнетiн кiн нааҷылалча
Наа кiн городтың Менделеев орамазында орнығар. Мының алнында пу iкi хадыллығ тура УФСИН-ның ӱгредiг корпузы полған. Ӱр ниместе ол республикаа пирiлген. Пӱӱл чайғының пастағы кӱннерiнде иргiлен париған туразар пӱдiрiгҷiлер кiрiбiскеннер. Корпус илееде изел парғаннаңар, пӱдiрiгҷiлернi анда кӧп аар тоғыс сахтаан. Иң пастап олар, ӧӧн стенелернi тыыдыбызып, пасхысты нааҷылабысханнар. Анаң иргi полларны, стенелернi, потолоктарны, ходырыбызып, нааҷылап пастааннар. Прай инженер коммуникацияларын тартханнар, кӧзенектер алыстырғаннар. Пу кӱннерде тоғынҷылар аның хырын нааҷылапчалар. Iдӧк пу чағында вентиляция оборудованиезiн алыстырарлар. Аннаң пасха, ӧрт сигнализациязын, видеонаблюдение камераларын турғызыбызарға паза ибіркі чирні иптебізерге кирек. Пӱдiрiг тоғыстарында 25 – 30 кiзi iстенче. Тоғыстар 70 процентке толдырыл парғаннар. Чииттер кiнi Наа чылға теере республиканың оол-хыстарына iзиин азарға кирек.
Нааҷылалған турада чииттерге пiр муңа чағын квадраттығ метр пирiлер. Ниме анда поларынаңар «Чииттер проекттерінің паза стратегия пастағларының кіні» чыындының директоры Валерия Голуб чарытча.
– Чииттер кiнi тимге сых парза, анда олғаннарның паза чииттернiң аймах халых организациялары ээленерлер. Ол «Пастағыларның чӧрiмi», «Юнармия» паза даа пасхазы. Iдӧк анда ӱн пасчаң, теелбек салҷаң, сарнаҷаң студиялар полары кӧрiлче.
Мында олғаннар аймах кӧстеглерҷе ӱгрен поларлар, лекциялар, мастер-класстар паза даа пасха мероприятиелер иртірерлер, проекттерҷе тоғынарлар паза олаңай даа чоохтас поларлар.
Пу кӱннерде Хакасия пазы Валентин Коновалов чииттер кінінде тыхтағ тоғыстары хайди парчатханын сыныхтабысхан. Аннаң хада пӱдіріг ачығында пол килгеннер: республика пазының орынҷызы Дмитрий Бученик, чииттер политиказы паза халых тилізі министрінің тоғызын толдырчатхан Лилия Боргоякова. Олар, чииттер кiнiн пӱкӱлее сыныхтап, сығысхан сурығларны ӱзӱргеннер. Пу кӱннерде наа тоғынҷылар аның ибiркiзiн иптеп пастабысханнар, cоонаң брусчатка саларлар. Ӧӧнi – кӱскӱ наңмырлары харығ полбазы.
Проекттің тиксі бюджеді 150 миллионға чағын салковай, аның 80,9 миллион салковайы – федеральнай ахча. «Чииттер паза олғаннар» нацпроект Россия президентінің чарадии хоостыра чуртасха кирiлче. Аның ӧӧн пӧгіні – чииттернiң таланттарын азарына оңдайлар тӧстирi.
Сом r-19.ru сайттаң
Автор :
Оксана Котюбеева
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
