Тархынны аарлааны изелбес сiбее полча
04.09.2026
Хабарлар
Россияның чаа-тархын пірігізінің региондағы пӧлиинің профильліг клазы
Ӱгредiг. Ағбанда Россияның чаа-тархын пiрiгiзiнiң (РВИО) профильліг клазы пайрамни азылған
Ӱртӱн айының пастағы кӱнiнде Ағбандағы 1№ школада iкi ӱлӱкӱн полған. Анда Пiлiс кӱнiне чарыдылған пайрамнығ линейка ирткен паза РВИО-ның профильліг клазы азылған. Мындағ класс Сибирьдегi федеральнай округта чалғыс ла. Танығлығ кӱнде школазар улуғ аалҷылар килгеннер: Хакасияның хазна чӧпчiзi Владимир Штыгашев, республиканың культура министрi Светлана Окольникова, Ағбан город пазы Алексей Лёмин, «Хакасия матырлары» регион программазының араласчылары Игорь Арчимаевнең Цырен Димчиков. Iдӧк чапсых мероприятиеде культура тоғынҷылары, ӱгретчiлер, ӱгренҷiлер паза оларның iҷе-пабалары полғаннар. Ағбан город пазы Алексей Лёмин, актовай залда чыылысхан чонны чылығ удурлап, тархынның сынын пiлерге кирек тiп позының кӧрiзiнең ӱлескен.
– Чаадаң хорғыстығ ниме полчатханын пiлчезер бе? Чааның матырларын, оларның махачыларын ундутханы, тархын олаңай ла саннарға айланғаны иң хорғыстығ. Тархынны аарлааны изелбес сiбее полча. Аның сылтаанда хазнабыс пик тудылча. Тархынын улуғлабаан хайдағ даа хазнаның, хайдағ даа чонның кӱзi порт пол парча. Россияның чаа-тархын пiрiгiзi – тархынны аарласта тутчатхан тiрег. Ол чонға сынны читiрче, ундудыл париған муңарлап матыр кiзiнiң адын нандыра «тiрiлдiрче». Аның пiр ӧӧн пӧгiні – пiс хайдаң сыхханыбысты пiлiнерге, чахсы оңарарға кирекпiс, – теен Ағбан город пазы Алексей Лёмин.
Iдӧк ӱгренҷiлерзер паза аалҷыларзар РВИО-ның региондағы пӧлиинiң попечительскай чӧбiнiң кнезi Владимир Штыгашев айланған. Хакасияның культура министрi, РВИО-ның региондағы пӧлиинiң кнезi Светлана Окольникова Хакасия пазы Валентин Коноваловтың айланызын хығырған паза ӱгренҷiлер хайдағ лекциялар истерлер, хайдағ спикерлернең тоғазарлар тiп чарытхан.
– РВИО-ның клазында чапсых уроктар иртер. Пу олаңай ла профильліг класс полбас, мында сiрер пiстiң тархынны сынап тирең ӱгренерзер. Классты тӧстирге полысхан организацияларға улуғ алғызым читiрчем, олар – РВИО-ның Ағбандағы пӧлии, городтың ӱгредiг устанызы, Ағбанның 1№ школазы, «Бентонит Хакасии» паза «Саянмолоко». Оларның хабазиинаң пiс ӱгренҷiлерге наа форма паза наа учебниктер алғабыс, классты кирек оборудованиенең тирiндiргебiс. Чолыңар азых ползын, олғаннар! – теен Светлана Анатольевна.
Класс Россияның Матыры Игорь Ахпашевтiң адын ал чӧрер. Ол iдӧк пу школаны тоосхан. Пастағы Чечен чаазында Матыр аарлығ тынын пир салған. Ағбандағы 1№ школаның ӱгретчiлерi паза ӱгренҷiлерi аны хаҷан даа ундутпинчалар паза аарлапчалар.
Россиядағы чаа-тархын пiрiгiзiнiң профильліг клазы 2024 чылда Благовещенск городта пастағызын на тӧстелген. Пӱӱнгi кӱнге мындағ класстар 10 регионда азылғаннар, ол санда Луганск паза Донецк Чон Республикаларында. Пу проект тоғынып пастааннаң iкi чыл аразына хазнада РВИО-ның прай 35 клазы азылған.
Ӱгренҷiлер анда чаа тархынын паза обществознаниенi тирең ӱгренерлер, саблығ историктернең тоғазарлар паза пасха регионнарзар фестивальларға чӧрерлер. Сынны чоохтаза, РВИО-ның профильліг клазынзар кiрiп аларға оой полбаан. Пеер олимпиадаларның чиңiсчiлерiн, Юнармияның, «Движение первых» чӧрiмнiң паза чаа-патриот клубының араласчыларын таллап алғаннар.
Класс устағҷызына тархын паза обществознание ӱгретчiзi Евгений Захаров турғызылған. Ол Россиядағы ӱгретчiлернiң аймах марығларында сыбыра чиңiстiг орыннар алча. Аның пiр ӱгренҷiзi, пӱӱл ЕГЭ-да тархын предмедiн 100 баллға тудыбызып, Санкт-Петербургсар ӱгренерге парыбысхан. Амғы ӱгренҷiлер наа профильліг класс оларның чуртастарын пiстiң хазнаның тархынынаң саңайға палғалыстыр салар тiп пик iзенчелер.
Сом Дмитрий Сунчугашевти
Автор :
Татьяна Тютюбеева
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
