Хакас тiлi кӱнi алғым таныхталар
02.09.2026
Хабарлар
Культура. Ӱртӱн айының 4-ҷi кӱнiнде 12.00 часта С.П.Кадышевтiң адынаң чон чайаачызы кiнiнде Хакас тiлi кӱнiне паза Россия чоннарының тӧреен тiллерiне чарыдылған алғым мероприятие (12+) иртер
Ӱлӱкӱнде хакас тiлiн хайраллаҷаң паза тилiтчең тоғыстарнаң айғасчатхан ӱгретчiлер, студенттер паза ӱгренҷiлер аралазарлар. Мероприятиенiң пайрамнығ чардығы «Чатхан» фильмнiң тун кӧзiдиинең тоозылар. Аны хазнаның культура министерствозының полызиинаң Россияның В.Д.Поленовтың адынаң чон чайаачызы туразы чарыхха сығарған. Фильмнiң кӧзiдии «От чистого истока» искiрiг-чарыдығлығ проект хоостыра парча. 2025 чылда – саблығ хакас хайҷы-нымахчы С.П.Кадышевтiң пайрамнығ 140 чазы толған чылда – Хакасияда пастағызын на федеральнай фольклор-этнография экспедициязы ирткен. Iди салтарында «Чатхан» фильм суурылған. Ол Россия чоннарының материальнай нимес этнокультура ис-пайына кiрче.
Концертке килген аалҷыларға С.П.Кадышевтiң адынаң чон чайаачызы кiнiнiң иң артых ӧмелерi сiлiг сарын-теелбектер сыйлирлар. Улуғ залның фойезiнде алтын холлығ устарның чапсых кӧзiдии сығарылар. Iдӧк чуртағҷылар хакас тiлi учебниктерiн, пособиелернi кӧрiп аларлар.
Хакас тiлi кӱнi 2017 чылның ӱртӱн айының 4-ҷi кӱнiнең сығара таныхталча. «Хакас тiлi кӱнiн турғызардаңар» Хакас Республиканың законы 2017 чылда хандых айының 13-ҷi кӱнiнде хакас тiлiн хайраллир, тилiдер паза аның тузазын кӧдiрер пӧгiннең алылған.
Алғым мероприятиенiң тӧстегҷiзi С.П.Кадышевтiң адынаң чон чайаачызы кiнi полча. Ағаа Н.Г.Доможаковтың адынаң Национальнай библиотека, В.М.Торосовтың адынаң Хакас книга издательствозы, Хакасияның тiл, литература паза тархын наука-iстезiглiг институды, Хакасияның Чайаачылар туразы хабасчалар.
Автор :
Ольга Кожухова
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
