Ӱгредiг чолында iҷе-паба хаалағлар идерге полызар
02.09.2026
Хабарлар
Иван Толмашовты паза Милана Пастаеваны школаа іҷелері Мария паза Елена ӱдесчелер
Пiлiс кӱнi. Киҷее тиксi хазнада Пiлiс кӱнi ирткен. Ол Россия мӱчелiнiң иң чарых, ӧрiнiстiг кӱнi полча. Пу танығлығ кӱнде пастағы классха парчатхан оолах-хызыҷахтарны паба-iҷелерi ӱдесчелер
Хайди искiрче Хакасияның ӱгредiг паза наука министерствозы, пу ӱгредiг чылында республикада 70 муң азыра олған парта кистiне одырған, оларның пис муңы пастағы классха парған оолах-хызыҷахтар. Пастағызын на школада саң сыңыразын искеннернiң аразында Иван Толмашовнаң Милана Пастаева полғаннар. Ирке оолах-хызыҷах Ағбанның 11 паза 24№№ школаларында ӱгренер. Иван уғаа ӧткiн паза пiлiске тартылҷах оолах. Олған садынзар чӧрчеткендӧк, ол алфавиттi паза саннарны прай ӱгрен салған. Прай позы, улуғлар полызии чох. Мультфильмнер кӧргенҷе, пасха палаларнаң ойнаанҷа, ол пазарға, саннар пӧгерге хынча. Школа алнында ол саннар хатирын паза ӱлирiн iдӧк позы ӱгренiп алған. Амды таблицаны прай пiлче. Аннаң пасха, оолах англия тiлiне тартылча. Аны ол интернет пастыра iдӧк ӱгренiп алған. Пастағы пiлiстерi пар даа полза, оолах школаа парарын чидiкпин сахтаан. Анда ол наа пiлiстер алып аларға сағынча.
Милана Пастаева iдӧк школаа парарын чидiкпин сахтаан. Ол уғаа ирке хызыҷах. Иптiг паза нiске ӱннiг. Хызыҷах Ағбандағы 24№ школада хакас клазында ӱгренер. Паба-iҷезi аны андар ӧнетiн пирiбiскен. Милананың улуғ харындастары пуох школада ӱгренгеннер, хакас тiлiнең маңат чоохтасчалар, хызыҷах iдӧк пос тiлiн ӱгренерге сiренче. Аның iҷезi Елена Пастаева «Хакас чирi» газетада корректор полып iстенче. Палаларын пос тiлiне iдӧк кӧнiктiрче. Милана хоостирға хынча, iдӧк аның кӧңнiне теелбек салары кiрче. Аннаңар школа соонаң хоос кружогына алай ба теелбек студиязынзар чӧрерге тимненче.
2026 чыл – Россияның чоннары пірiкчеткен чыл. Піліс кӱнінде пу кӧcтегҷе аймах мероприятиелер ирткеннер. Класстағы часта Россия чоннарының культуразына паза кибірлеріне чарыдылған азых уроктар ирткеннер. Пістің хазнаның школаларында паза вузтарында аймах нациялығ олғаннар паза чииттер, парта кистiнде хости одырып, ӱгренчелер, нанҷыласчалар, чоох алысчалар паза таңдағызын хада пӱдірчелер. Ӱгредiг организациялары аймах нациялығ, киртiнiстiг олғаннарны пiрiктiрче, удур-тӧдiр аарласнаң хайарға кӧнiктiрче. Ынағласха паза улуғласха олғаннарны кiчiгдең ӱгредiп пастапчалар нооза.
Пiлiс кӱнi ӱгредiг чылы пасталчатханын киречiлепче. Пу кӱн алнында республикада наңмыр чаған даа полза, школаларда линейкалар пасталар алнында кӱн, сых килiп, ибiркiнi чылытхан паза ӱгренҷiлернiң кӧңнiлерiн кӧдiрген.
Сом Дмитрий Сунчугашевти
Автор :
Оксана Котюбеева
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
