Наа ӱгредіг чылында – наа чидіглер
02.09.2026
Хабарлар
Хакас гимназиязынзар килген улуғ аалҷылар
Піліс кӱні. 1 ӱртӱнде хазнабыстың прай школаларында пайрамнығ линейкалар иртiрілчелер. Н.Ф.Катановтың адынаң хакас национальнай гимназияда даа наа ӱгредіг чылы пасталғанына чарыдылған пайрам ирткен
Кибір хоостыра 1 ӱртӱнде гимназия алнындағы ачыхта прай ӱгренҷілер чыылысханнар. Ах банттар, чарых ӧңніг кӧгенектер ырахтынох кізі хараана тасталғаннар. Ӧӧн хайығ, тізең, 5 паза 11 класстардағы ӱгренҷілерге полған.
Пайрамнығ линейка азылғанда, чон алнынзар Россияның паза Хакасияның флагтары сығарылғаннар. Анаң чыылған улус, сым турыбызып, хазнабыстың паза республиканың гимннерін тыңнаан. Ӱлӱкӱн пайрамни азыл парған соонаң, сӧс хакас гимназиязының директоры Лилия Ахпашеваа пирілген:
– Мин прайзын Піліс кӱнінең алғыстапчам. Ол наа ӱгредіг чылы пасталчатханын таныхтапча. Наа ӱгредіг чылында прай сағынған сағыстарың толзын. Паза ол пӧзік чидіглерге пай ползын. Мин пизінҷі класстардағы ӱгренҷілерзер айланчам. Сірер пӱӱн гимназиянаң танысчазар. Мыннаң турыстығ, пӧзік чидіглерге читкен кізі кӧп сыхханнаңар искен поларзар. Сірерге ол кибірні узарадарға кирек. Паза пӱӱнгі пайрамнығ линейкада гимназияны тоозарға тимненчеткен ӱгренҷілер араласчалар. Оларны алнында уғаа нандырығлығ тус сағыпча. Ол хазна сыныхтағларын тудары полча. Сірерге полған на хаалағда оң ползын. Ідӧк мин хада тоғынчатхан арғыстарымны наа ӱгредіг чылынаң алғыстапчам. Сірернің пӧзік пілістерің ӱчӱн улуғ алғызым читірчем.
Соонаң сӧс алған Хакасия пазының орынҷызы Михаил Побызаков.
– Прай чыылған чонны Хакасия пазы Валентин Олегович Коноваловтың адынаң Піліс кӱнінең алғыстапчам. Хакас гимназиязы иң артых ӱгредіг учреждениелерінің пірсі полча. Мында хыйға, махачы, кӱстiг олғаннар ӱгренчелер. Аны тоосхан оол-хыстар чир-суубысты сабландырчалар. Гимназияның ӧмезі олғаннарға тирең пілістер пирче. Чиит тӧлге андағ алғым пілістер пирілчеткен ӱчӱн алғызымны ӱгретчілерге читірчем. Cірернiң выпускниктерің Ағбаннаң Москваға теере иң чахсы вузтарзар ӱгренерге кіріп алчалар. Андағ кӧзідім ӱгретчілернің тоғызын пӧзік синге кӧдірче, – теен Михаил Анатольевич, іҷе-пабаларзар, ӱгретчілерзер паза ӱгренҷілерзер айланып.
Аарлығ аалҷыларның санында ідӧк Хакасияның ӱгредіг паза наука министрінің орынҷызы Марина Сагатаева паза республиканың Ӧӧркі Чӧп депутады Валерий Старостин полғаннар. Олар ідӧк чылығ сӧстернең чыылған кізілерзер айланғаннар.
«Пӧӧлбек» ӧменің араласчылары сіліг теелбек салчалар
Анаң гимназия алнындағы ачыхсар алғасчы, сығып, ирбен одын ӧртеен. Паза чиит тӧлнің прай ниме чахсы ползын тіп алғас сӧстерін чоохтанған. Ол арада кииҷе ирбен одының татхыннығ чызы тараан. Соонаң кибірге кір парған оңдайнаң пизінҷі класстарның ӱгренҷілері чахсы ӱгренҷі полардаңар сӧс пиргеннер.
Чыл сай хакас гимназиязы пизінҷі классха килген наа ӱгренҷілерін чылығ удурлапча. Оларзар прайзы хайығ салча. Пӱӱл ол ізиин 80 палаа асхан. Оларның амды наа чуртас пасталча. Андағ иркеҷектернің санында Савелий Саражаков полча. Савелий гимназиязар Асхыс аймаандағы Казанов аалдаң ӱгренерге килтір. 10 частығ оолағас тӧреен тілін чахсы пілче. Ағаа сыныхтағларны тударға пір дее сидік полбаан тіп таныхтаан хыйғаҷах.
11 класстарның ӱгренҷілері чӱрексіпчеткеннер. Олар халғанҷызын хынған гимназияда Піліс кӱнін таныхтапчалар нооза. Килер чылда 98 ӱгренҷее халғанҷы саң сыңырир. Че ол соонаң полар. Амды, тізең, олар чахайахтар тудынып, оларны класс устағҷыларына сыйлирға тимненчеткеннер.
Піліс кӱнінiң иң танығлығ чардығы ол пастағы саңның сыңыразы полча. Пӱӱл ах банттығ хоңыроҷахтың ӧтіг ӱнін гимназия алнындағы ачыхча 5 «А» класстың ӱгренҷізі Софья Аскаракова чайған. Кибір хоостыра 11 класстың ӱгренҷізі Дима Котожеков, Софьяны иңнінзер одыртып, чыылған чонны ибірген. Хоңыроҷахтың сыңыразы наа ӱгредіг чылы пасталғаннаңар искірген.
Сомнар Дмитрий Сунчугашевти
Автор :
Ольга Томочакова
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
