Полған на кiзi узах частығ паза хазых поларға сағынча
02.09.2026
Хабарлар
Хазых оңдайнаң узах час чазир имнег кіні пайрамни азылчатхан туста
Хазых. Ӱр ниместе Ағбанда Г.Я.Ремишевскаяның адынаң республиканың имнег туразында Хазых оңдайнаң узах час чазир имнег кiнi пайрамни азылған
Аның ӧӧн пӧгiнi ағырчатхан кiзiнi имнирi нимес, ағырығ сығызар алнындох аны iлезiне сығарары полча. Андағ оңдайнаң кiн ағырығны тузында тохтадыбызар, ағаа сығызарға пирбес ӱчӱн прай кӱзiн салып тоғынар. Анда специалисттер кiзее хазиин хайраллап аларына тузында чӧптернең полызарлар.
Таныхтирға кирек, Россия Федерациязының правительствозы тиксi хазнада узах час чазир кiннернi тӧстеп пастаан. Олар хазна поликлиникаларында ӧӧн кӧстеглернiң санына кiрчелер. Хазнада хазых хайраллирының ӧӧн стратегиязы полча, iдӧк «Хазых хайраллирында наа технологиялар» паза «Ӧткiн паза узах час» национальнай проекттернi 2030 чылға теере чуртасха кирерiнiң ӧӧнiне саналча.
Хазых оңдайнаң узах час чазир имнег кiнiнiң пайрамни азылчатханында Хакасия пазының пастағы орынҷызы Татьяна Курбатова араласхан. Республика пазының адынаң прай чыылысхан чонны мындағ танығлығ кӱннең алғыстаан. Iдӧк ол таныхтаан, регионда хазых хайраллирын тилiдерi республика правительствозы тоғызының ӧӧн кӧстеглерiнiң пiрсi полча. Ӱлгӱдегiлер имнег полызии полған на кiзее тузында паза чахсы синде пирiлерiне ле нимес хайығ салчалар, олар iдӧк, чуртағҷыларның ағырығ сығыс килерiне хорғыс пар полза, аны, азынада сизiнiп, iлезiне сығарарға пӧгiн турғысчалар. Кiзi, посха хайығ салып, профилактика оңдайынаң тузаланып, хазиин тыыдарға кирек. Iдӧк чуртағҷылар хазыхтарын хайраллирға кӱстензiннер паза чуртас синiн чахсыландырзыннар тiп мындағ кiннер тӧcтелчелер. Хакасияда анзына сыбыра хайығ салылча паза тоғыс апарылча. Республика пазы Валентин Коноваловтың кӧрiзiнең, «Хазых полған на кiзее аарлығ, узах час чазиры – пiстiң пiрге пӧгiнiбiс». Аннаңар Хазых оңдайнаң узах час чазир имнег кiнi азылғанда, чон, хазиин сыныхтап, имҷiлернiң ағырығ хоостыра профилактика чӧптерiн тузында ал полар.
Кiн пайрамни азылчатханда, Хакасияның хазых хайраллаҷаң министрi Максим Максимов чыылысхан улусха уғаа кӧп чылығ сӧстер читiрген. Ол республика чуртағҷыларына, сыныхтағлар иртiп, хазыхтарын тузында тыыдарға паза кiн тоғынҷыларына тӱзiмнiг тоғыс апарарға алғаан.
– Национальнай проекттер чуртасха кирiлiп, пӱӱн Хазых оңдайнаң узах час чазир имнег кiнi пайрамни азылча. Ол санда кiннi азарға «Ӧткiн паза узах час» национальнай проект полысхан, ағаа федеральнай паза республика бюджеттерiнең ахча позыдылған. Ол ахчаа имнег паза iстезiг иртiрҷең оборудование алылған. Олар чӧреес ағырығларны iлезiне сығарарға полызарлар. Азылчатхан кiн пiстiң чуртағҷыларға улуғ туза ағылар, – чоохтаан министр.
Азылчатхан кiн имнег оборудованиезiнең не нимес, iдӧк тоғынҷыларнаң толдырылған. Наа кiнде тоғынарға тiп, iкi специалист ӱгредiг иртiбiскен. Оларның санында, Хакас хазна университедiнiң имнег институдын тоозыбысхан Полина Иванова. Хайди таныхтаан чиит специалист, ол Г.Я.Ремишевскаяның адынаң республиканың имнег туразында тоғынар сағысты iкiнҷi курстаң cығара тутхан. Аннаңар Хазых оңдайнаң узах час чазир имнег кiнi азылғанына уғаа ӧрiнче.
– Хазых оңдайнаң узах час чазир имнег кiнi азылчатханында араласчатханыма паза аның пастағҷыларының санына кiрчеткенiме ӧрiнчем. Ол имнег туразының тархынына кiрче, андағ танығлығ киректе араласчатханы чахсы. Пу кiн республика чуртағҷыларына уғаа тузалығ полар, – сағыстарынаң ӱлескен чиит имҷi.
Сыныхтағ чардыхтарға пӧлiлiп иртiрiлче. Иң пастап анкетирование иртче, анда чуртас оңдайларынаңар, стресстеңер паза даа пасха сурығлар пирiлче. Iкiнҷi пӧлiкте специалисттер сыныхтағлар иртiрерлер. Олар кiзiнiң координациязын паза функциональнай оңдайын кӧрчелер. Ӱзiнҷi пӧлiкте, кiзiнiң кӧдiрiмiн синеп, мышцалар, ӱс паза суғ синiн iлезiне сығарарлар. Алынҷа пӧлiкте психологнаң чоохтазығ иртче. Прай сыныхтағлар соонаң имҷi-терапевт пациентке орта азыранары хоостыра паза хазых чуртас оңдайынҷа тузалығ чӧптер пирер.
– Наа кiннiң пӧгiнi – кiзiнiң биологическай чазын паза хазиина чочыныс ағылчатхан ағырығларны iлезiне сығарары, – чоохтаан кiннiң устағҷызы Анна Колмакова. – Пiстiң кiнде полған на 18 час толдыр салған кiзее сыныхтағларны тикке иртiбiзерге чарир. Регистратуразар паспорттығ паза полистiг айланарға кирек. Ағбан чуртағҷыларына регистратуразар 8(3902)248-267 телефон номерiнҷе сығдырадарға чарир.
Сом Дмитрий Сунчугашевти
Автор :
Наталья Тюкпеева
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
