Харатасчылар ӱлӱкӱнi алғым таныхталды
02.09.2026
Хабарлар
Майрых разрезінің устағ-пастаа тоғынҷыларын алғыстапча
Пайрам. Пӱӱл республикада Харатасчы кӱнi алғым таныхталды. Хакасияның хара тас аныпчатхан иң килкiм компаниялары профессиональнай ӱлӱкӱнге чарыдылған пайрамнығ мероприятиелернi Ағбанда иртiргеннер
28 орғахта «СУЭК-Хакасия» ООО тоғынҷыларын чағдапчатхан ӱлӱкӱннең М.Ю.Лермонтовтың адынаң Орыс драма театрында алғыстаан, «УК «Разрез Майрыхский» ООО паза «ГорТехМаш» ООО, тiзең, – «Саяны» стадионда.
«СУЭК-Хакасия» «Сибирьдегi хара тас энергетика компаниязы» АО-ның чардығы полча, пӱӱнгi кӱнде ол Россияда хара тас аныпчатхан иң килкiм предприятие. Амғы туста республикабыста компанияның тӧрт разрезi, пiр пайытчаң фабриказы паза тӧрт сервис предприятиезi тоғынча. Таныхтирға кирек, 2026 чылда «СУЭК-Хакасия» пайрамнығ 25 чылын таныхтапча. Ӧмезi тӱзiмнiг, пiр пӧгiннi толдырып, хада-пiрге тоғынчатханы сылтаанда, предприятиеде тилекей синiндегi рекордтар пiр ле хати турғызылбааннар. Iди пӱӱл 3 орғахта Харатастағы разрезте WK-35 экскаваторның 904 № тиксi бригадазының бригадирi Владимир Домаевтiң устаанынаң тилекей рекордын турғысхан. Харатасчылар пiр ай аразына автотранспортха пір миллион 400 муң куб метр тағ породазын таарлап салғаннар. От айында, тiзең, Харатастағы разрезтiң «Абаканский» азых тағ тоғыстары участогында тархында пiр ай аразына иң кӧп син хара тас анылған – 220 муң тонна. Пасха даа орыннарда тоғынҷылар матлама кӧзiдiглерге читчелер.
Профессиональнай ӱлӱкӱн алнында Приморскай крайның Лучегорск городында «Шахтерский олимп» марығ ирткен. Андар теорияны паза практиканы сыныхтапчатхан заданиелер кирiлгеннер. Хакасиядаң парған ӧме анда тимненiзiн паза хада-пiрге тоғын полчатханын чахсы кӧзiткен. Марығ салтарларынҷа ағаа, тиксi ӧменiң кӧзiдiглерiн кӧрiп, iкiнҷi орын пирiлген.
Пайрамнығ мероприятие Хара тигей iстiнде хайраллалчатхан, Тара Тағ алып хадарчатхан кӧйчеткен тасты чонға ағыл килген махачы оолдаңар кип-чоохтаң пасталған. Чайаачы ойын соонаң харатасчыларны алғыстир тус читкен. Иң пурун оларға Россияның энергетика министрi Сергей Цивилёвтың алғыстас сӧстерi читiрiлген.
Iдӧк харатасчыларны алғыстирға аарлығ аалҷылар кил парғаннар. Оларның санында Хакасия пазы Валентин Коновалов, республика Ӧӧркi Чӧбiнiң кнезi Сергей Сокол, министерстволар кiзiлерi паза Харатастың, Ағбан пилтiрi, Алтай, Пии аймахтарының устағ-пастаа полғаннар.
– Хара тас аныпчатхан предприятиелер Россияның энергетиказы хорғыс чох тоғынарына улуғ хозым итчелер. Пу отрасль экономикабысха хаҷан даа танығлығ полған паза ам даа полча. 25 чыл аразына «СУЭК-Хакасия» республикабыстың чуртас-экономика тилiзiне кӧрiндiре хозым итчеткен предприятие полыбысхан. Пӱӱнгi кӱнде тиксi хазнабыс паза алынҷа республикабыс сидiксiнiстерге тоғасчатхан даа полза, компанияның ӧмезi алнында турғызылған прай пӧгiннернi турыстығ толдырча. Алынҷа алғыс сӧстерiн отрасльның ветераннарына читiрчем, сiрер пiске прайзыбысха кӧзiдiм полчазар, – алғыстаан чыылысхан чонны Валентин Олегович.
Ол хара тас анир отрасльның тилiзiне салымнығ хозым иткен ӱчӱн Россия президентiнiң Аарластығ пiчиин «Единая сервисная компания СУЭК» — «Черногорский ремонтно-механический завод» ООО филиалының директоры Максим Лиферге читiрген. Iдӧк республика устағҷызы пӧзiк чидiглерге читкен, хара тасты анирында кӧп чыл iстен салған кiзiлернi Хакасия правительствозының Аарластығ пiчiктерiнең паза Хакасия пазының алғыстастарынаң таныхтаан. Соонаң предприятие тоғынҷыларына Хакасияның Ӧӧркi Чӧбiнiң алғыстас пiчiктерiн Сергей Сокол читiрген, iдӧк сценаа алғыстас сӧстерінең «СУЭК-Хакасия» ООО-ның ӧӧн директоры Сергей Канзычаков сыххан, танығлығ сыйыхтар сыйлаан.
Паза мероприятиеде компания предприятиелерiнiң устағ-пастаандағы кiзiлер, iстенiс ветераннары, хара тас анир предприятиелер аразындағы марығның чиңiсчiлерi таныхтатханнар.
Иң артых харатасчыларға автомобильлер сыйлааннар
Чон ӱлӱкӱнге чыылчатхан тустох драма театры алнындағы машиналарны турғысчаң орындағы алтын банттарнаң палғалған алты автомобиль прайзының хайиин тартхан. Пайрамнығ иир оларны компанияның иң артых тоғынҷыларына читiрерiнең тоозылған. Прай кӱстi салып тоғынғаны, пӧзiк чидiглерге читкенi паза компанияның тилiзiне салымнығ хозым иткен ӱчӱн, «СУЭК-Хакасия» ООО-ның пис тоғынҷызы паза «УБВР» ООО-ның пiр тоғынҷызы автомобильлернең сыйыхтатханнар. Аарлығ сыйых алғаннар санында Яков Бутонаев полған. Аның устаанынаң тоғынчатхан БелАЗ-75131 самосвалның 123 № ӧмезi 2025 паза 2026 чылларның салтарларынҷа планда кӧрiлген тоғыстарны толдырарында иң артых полыбысхан. Таныхтирға кирек, газетабыста Харатасчы кӱнi алнында Яков Александровичтеңер алғым материал сыххан.
Пуох кӱнде «Майрых разрезі» хара тас аныҷаң компания профессиональнай ӱлӱкӱнге чарыдылған мероприятиезiн иртiрген. Хакасия пазы Валентин Коновалов аның тоғынҷыларын iдӧк алғыстаан. Ол кӧп чыл тоғынған паза профессиональнай ӱлӱкӱн таныхталчатхан ӱчӱн кӧксiне хазанҷаң III степеньнiг «Харатасчы сабланызы» медальны экскаватор машинизi Евгений Берлизёвха читiрген. Iдӧк республика пазының холынаң пӧзiк чидiглерге читкен тоғынҷылар Россия энергетика министерствозының паза Хакасия правительствозының Аарластығ пiчiктерiн паза Хакасия пазының алғыстастарын алғаннар. БелАЗ-тың водительi Николай Пензинге «Хакасияның тағ промышленнозының аарластығ тоғынҷызы» ат пирiлген. Iдӧк тоғынҷылар предприятиенiң Аарластығ пiчiктерiн алғаннар.
Тимур Торбастаев Хакасия пазының алғыстазынаң таныхтатхан
Хакасия пазының алғыстазына турысханнар санында ӧӧн маркшейдернiң орынҷызы Тимур Торбастаев полған. Ол позы Аршаннар аалынаң. Специальнозына Новосибирскте ӱгренген. Ӱгредиин тоосхан соонаң чиит оол Майрых разрезiнзер тоғысха кiрген. Анда 10-ҷы чылы iстен парир. Ноғадаңар пу специальностьты таллаазар тiп сурғанымда, Тимур Олегович профессия хынығ пiлдiрген ӱчӱн тiп нандырған. Аның сӧстерiнең, тоғызы, наа пiлiстер алары ағаа ам даа хынығ. Тоғыста паза чуртаста даа чахсы салтарларға чидер ӱчӱн, ӱгренерге паза тоғынарға хорыхпасха кирек тiп таныхтапча ол.
Майрых разрезi ӱлӱкӱнге тоғынҷыларына паза оларның сӧбiрелерiне алғым программа тимнеп салтыр. Стадионда аймах ӱтертiстер, ойыннар ачыхтары тоғынғаннар, иирзер чонны Ағбандағы чайаачы ӧмелер ӧрiндiргеннер.
29 орғахта М.Ю.Лермонтовтың адынаң Орыс драма театрында Харатасчы кӱнiне чарыдылған мероприятиенi «Разрез Аршановский» ООО иртiрген. Пӱӱл предприятие 15 чылын таныхтир. Пайрамны разрезтiң хоры асхан. Таныхтирға кирек, ол 2022 чылда тӧстелген, аның прай араласчылары разрезтiң тоғынҷылары полчалар. Хор аймах синнiг марығларның чиңiсчiзi паза лауреады полча. Чайаачы ӧме гастрольларнаң Новосибирсксер, Хызылчар крайынзар паза Хакасияның аал-городтарынзар чӧрче.
Профессиональнай ӱлӱкӱннең харатасчыларны Хакасияның устағ-пастаа алғыстирға кил парған. Пайрамнығ иирнi азар чеес Хакасияның Ӧӧркi Чӧбiнiң кнезi Сергей Соколға пирiлген. Чыылған чонны алғыстап, ол чахсы кӧзiдiглерге читкен тоғынҷыларға регион парламентiнiң алғыстас пiчiктерiн читiрген.
Республика пазының, правительствозының паза позының адынаң харатасчыларны Хакасия пазының орынҷызы Михаил Побызаков алғыстаан.
– Аршаннардағы разрез – чиит предприятие. Хомзынысха, амғы туста кӧп иренге ырах-ырах чирлерзер вахтанаң тоғынарға чӧрерге килiсче. Че республикабыста мындағ предприятиелер азылғаны оларға ибi хыринда, сӧбiрелерiнең ӱрге чарылыспин, тоғынар оңдай пирче. Разрез iдӧк Хакасияның тилiзiне, экономиказына улуғ хозым итче. Предприятие мыннаң мындар пик тоғынзын, тилiзiн, планнарын толдырзын, тоғынҷыларның тоғызы, тiзең, хорғыс чох ползын, – алғыстаан Михаил Анатольевич.
Ол кӧп чыл матлама iстен салған паза хара тас промышленнозында чахсы чидiглерге читкен кiзiлерге Хакасия правительствозының Аарластығ пiчiктерiн паза Хакасия пазының алғыстастарын читiрген. Iдӧк харатасчыларны Хакасияның хазна чӧпчiзi Владимир Штыгашев алғыстаан. Владимир Николаевич тоғынҷыларға Иң пӧзiк тағ чӧбi чарадиинаң отрасльлар аразындағы III, II паза I степеньнiг «Тағҷы сабланызы» танығларны сыйлаан. Разрезтiң ӧӧн инженерi Михаил Терентьев Россияның энергетика министерствозының Аарластығ пiчiктерiн, ӧӧн директоры Евгений Юрин министерствоның алғыстас пiчiктерiн читiргеннер.
Мероприятиенiң официальнай чардығы соонаң тоғынҷыларны чайаачы сыйых сағаан – сценаа «Чиж & Co» ӧме сыххан.
Чечiме пайрамнығ мероприятиелерге пай полған. Алтай аймааның кiнiнде, Хубачар аалда, паза Харатаста ӱлӱкӱн iдӧк алғым таныхталған. Харатасчылар городында ӱлӱкӱн чуртастары ӱзiлген шахтерларның хумартхызының скверiнде В.А.Баландинаның хумартхы тазынзар порчоларны саларынаң пасталған. Кӱн тооза «Виктория» паркта аймах ачыхтар тоғынғаннар, спорт марығлары ирткеннер. Иирде пайрамнығ концерт полған. Сценаа Новосибирсктең килген «Ӧғmp Morӱ» кавер-группа, соонаң «Лесоповал» ӧме (Москва г.) сыхханнар.
Хубачарда ӧӧн мероприятиелер «Колос» стадионда иирде ирткеннер. Пӱӱл тағҷыларны Ағбандағы паза Саяногорсктағы артисттер ӧрiндiргеннер. Че ӧӧн хайығны, iкiнҷiлес чох, «Мираж» ӧме тартхан. Ӱлӱкӱнге пис муң азыра кiзi килген тiп таныхталча. Iдӧк стадион ачығында аал чуртағҷыларына паза аалҷыларына аймах ӱтертiстер тимнелгеннер. Пайрам салютнаң тоозылған.
Сомнар Дмитрий Сунчугашевти
Автор :
Татьяна Кыштымова
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
