Олғаннар марығласханнар
02.09.2026
Хабарлар
Пыдырахтағы «Матырлар» команда устағҷы Анастасия Кулумаеванаң хада
Спорт. Ағбанда «Пастағыларның хыйғызы» тиксі Россия марииның региондағы чардығы ирткен
Ағбандағы ниик атлетика манежінде 28 орғахта суум-саам турған. Анда «Пастағыларның хыйғызы» марииның араласчылары чыылысханнар. Пу «Пастағылар чӧрімі» пірігістің проекті. Ол 2023 чылдаң чуртасха кирілче. Анда 6 частаң аралазарға чарир. Школа ӱгренҷілеріне кӧрілген турнир ӱс чардыхтаң пӱттір. Хакасияда артыхтарның артығын пастап муниципалитеттер синінде таллааннар. Анаң олғаннар республика синінде марығласчалар. Чиңісчілерні азах меет сағыпча. Пӱӱл ол «Сириус» ӱгредігліг кінде иртер.
Марығ 11.00 часта пайрамни азылған. Аарлығ аалҷылар санында полған Хакасия пазы Валентин Коновалов. Валентин Олегович, олғаннарзар айланып, теен:
– Спорт кізі хылиин тыытча, кӱс хосча. Аннаң айғасханнар пик хуйахтығ поладырлар. Сірерге чиңіc тударға алғапчам.
Чарғыҷылар сығырғанда, марығлар пасталғаннар. Ол кӱн пас меетке 16 ӧме сыххан. Полған на командазар 5 кізі кірген. Араласчыларны частары хоостыра чарыбысханнар: 6 – 9 частығларға, 10 – 12 частығларға паза 14 – 17 частығларға. Андағ оңдайнаң пір муниципалитет ӱc команданы арға-мӧрійге сығарған. Сизінгенде, город-аймахтарның чарымы спортсменнерін марыға ыс полбиндыр. Ӧӧн сылтағ – бензиннең сидікcініс пол партыр. Аннаңар республика синінде 80 на кізі кӱзін сынаан.
Ӧткіннернің аразында таштыптағыларны таныхтирға кирек. Аймах ӱчӱн Ибіг аалның ікі командазы турысхан. Олар ікізі дее «Кӱстіг хара хустар» адалғаннар. Ӱзінҷі ӧме – пыдырахтағы «Матырлар». Андар 7-8 частығлар кіргеннер. Оларны марыға школа директоры Анастасия Кулумаева ағылтыр. Ол чоохтаан:
– Пастағы чардых часхызын ирткен. Марығ оңдайларынҷа школадаң ӱc ӧме сығарғабыс. Кічіглерге ле оң полды. Олар амды 2 паза 3 класстарда ӱгренчелер. Республика синіне сыхханы – піске улуғ чидіг. Пілдістіг, чайғызын марыға тимненерге сидік. Пеер килер алнында спорт тимненізін сыныхтабысхабыс. Санапчам, «Пастағыларның хыйғызы» олғаннарға кӱс сынир чахсы оңдай пирче.
«Пастағыларның хыйғызы» проектсер нинҷе-нинҷе проект кірчеттір. Анастасия Васильевна сӧбірезінең хада анда ӧткін араласча. Пӱӱл чайғызын Кулумаевтер, «Чағыннар-Хынғаннар» тиксі Россия мариинда аралазып, Мордовиязар пар килгеннер. Орғах айында, тізең, Ағбанның 33 № школазында «Семейная зарница» ойын ирттір. Кулумаевтер анда ікінҷі орынға сыхханнар. Чиңіс тутхан Орджоникидзе аймаандағы сӧбіре, че олар азах меетте аралас полбастар. Амды Хакасия ӱчӱн пазох Кулумаевтер турызарлар. Олар ӱртӱн айында Волгоградсар парарға тимненчелер.
Турнирзер айланза, олғаннар узунға сегіргеннер, азахты хаптыр салып, посты кӧдіргеннер. Ідӧк программазар эстафетаны, чӱгӱріcті, «Вышибалы» ойынны кир салтырлар. Кічіглер аразында 5 команда марығласхан. Пыдырахтағылар cыйыхтығ орынға сых таа полбаан ползалар, марығ аалдағы палаларға пілістерін алғыдар оңдай пирген. Ибігдегілер постарын турыстыра кӧзіткеннер. Саарбахтарны тренер паза физкультура ӱгретчізі Cемён Кулумаев тимнептір. Ортын частығлар аразында олар кӱмӱс медальны холға киргеннер, улуғлар аразында чиңіс тутханнар. Итсе, мында чапсыҷаң ниме чоғыл. 2024 чылда Ибігдегі школаның командазы «Президент ойыннары» марығлар тузында 85 ӧме аразында пизінҷізі полыбысхан.
Ағбанның «Титаны 33» командазын алынҷа таныхтирға кирек. Ӧменің ікі алтын паза пір кӱмӱс медаль. Андағ оңдайнаң «Сириуста» кічіглер паза ортын частығлар аразында Хакасия алнын аларлар Ағбанның ікі командазы, 14 – 17 частығлар аразында – Ибігдегі «Кӱcтіг хара хустар» ӧме.
Сом Дмитрий Сунчугашевти
Автор :
Майя Кильчичакова
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
