Бюджет алнындағы алымны хызырып
02.09.2026
Хабарлар
Чыылығ тузында
Ахча сурии. Хакасия пазы Валентин Коноваловтың чахиинҷа регион бюджедіне алымнарны хызырарынҷа ведомстволар аразындағы тоғысчы ӧменің 14-ҷі чыылии ирткен
Анда Хакасияның прокурор орынҷызы Денис Стонт, Хакасияның сенаторы Олег Земцов, Хакасия пазының орынҷызы Михаил Побызаков, Хакасияҷа федеральнай налог службазы устанызының устағҷызы Светлана Диденко, чарғы приставтары службазының, министерстволарның кізілері паза муниципальнай пӱдістернің пастары араласханнар. Чыылығны Хакасияның Москвадағы тӧреміл кізізі, республика пазының орынҷызы Юлия Исмагилова апарған. Аның таниинаң, парыстарҷа дебитор алымының синін хызырарынҷа, ідӧк республика ведомстволарының паза учреждениелерінің тоғынҷыларының ис-пай налогтарынҷа паза НДФЛ-ҷа алымнарны чабарын тӧстирінҷе тоғыстар чахсы салтарлар пирчелер. Бюджеттің парыстығ чардығын толдырарына ис-пайға налогтар паза НДФЛ ӧӧн резерв полып халча.
Хакасияның финанстар министрінің тоғызын толдырчатхан Марина Гардернің искіриинең, 2022 чылдаң сығара алымны айландырарынҷа тоғыс апарылча паза кӧрілген тусха тӧлелбеен ис-пай, транспорт, чир налогтарына паза НДФЛ-ға теелче. Налог службазының 2026 чылның от айының 15-ҷі кӱніне танығларынҷа, республиканың паза муниципалитеттернің ӱлгӱ органнары паза учреждениелері тоғынҷыларының тиксі алымы 11 миллион 683 муң салковайға тиңнелче. Ол алындағы айдаң 4 миллион 260 муң салковайға асхынах. Муниципальнай учреждениелерде тоғынҷыларның ӧдіс ахчазы 6 миллион 39 муң салковайға чит парған, пірдең, Ағбанда кӧріндіре чахсы алызығ таныхталча – сала ікі хати нимес хызырылғаны. Хакасияның толдырығлығ ӱлгӱ органнарының паза оларның устаандағы учреждениелернің тоғынҷыларының алымы 5 миллион 644 муң салковайға тиңнелче.
Андағ даа полза, алым сині кӧріндіре паза хайығ киректепче. Аның ӱчӱн Хакасияның финанстар министерствозы орындағы пос устаныс органнарына паза толдырығлығ органнарға алнынҷа хайынарға чӧп пирген: УФНС-таң официальнай искірігні сахтабин, алымнардаңар искірігні тузында алар ӱчӱн, тоғынҷылар санын налог службазынзар ай сай посха ызарға.
Ідӧк Марина Гардер искірген, от айының 1-ғы кӱніне республиканың консолидированнай бюджедінзер налогтығ нимес парыстарҷа тузында тӧлелбеен дебитор алымының сині 605 миллион 324 муң салковайға тиңнелче. Ол, тізең, ирткен чылның олох тузындағы синнең 101 миллион 379 муң салковайға алай 14,4%-ке асхынах. Муниципальнай пӱдістернің бюджеттерінҷе кӧзідіг 163 миллион 456 муң салковайға (26,5%-ке) син парған паза 454 миллион 389 муң саловайға тиңнелче.
Алымнар ӧсчеткені таныхталчатхан муниципалитеттер кізілері, ол киректі тӱзедер ӱчӱн, аннаң андар тоғынар оңдайларны ӱзӱріге сығарғаннар. Республикада ахча киреен тыыдар ӱчӱн, бюджетсер алымнар синін хызырарынҷа тоғыс узарадылар.
Сом r-19.ru сайттаң
Автор :
Ирина Истомина
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
