Топливоның синi ӧзер тiп кӧрiлче
27.08.2026
Хабарлар
Штаб чыылии. Республикада топливо суриин хайығда тутчаң оперативнай штабтың теестегi чыылии ирттi. Ол неделя сай иртiрiлче.
Штаб кiзiлерi пӱӱнгi кӱнде Хакасияның топливо рыногындағы киректер хайди парчатханын ӱзӱргеннер. Iдӧк регионзар топливоның тузында паза тохтағ чох читiрiлерiнҷе республиканың паза федеральнай ӱлгӱлернiң хада-пiрге тоғызы хайдағ салтарлар ағылғанын кӧргеннер.
Россия правительствозының паза вице-премьер Александр Новактың устаанынаң топливо суриинҷа федеральнай штабнаң хада-пiрге тоғыс узарадылча. Ӱр ниместе А.Новак Россияның нинҷе-де нефтеперерабатывающай заводы тыхтағ соонаң пазох тоғын сыххан тiп таныхтаан, аннаңар сығарылчатхан топливоның синi ӧзер тiп кӧрiлче.
Хозарға кирек, регионнар араласчатхан федеральнай топливо штабының чыылығлары неделяда iкi хати иртчелер. Чағынғы туста андағ штабтың теестегi чыылии полар. Хакасияның экономика тилiзi министерствозы апарчатхан сыныхтағның салтарлары кӧзiтчелер: амғы туста республиканың АЗС-тарында АИ-92 20 кӱнге чидер, АИ-95 – 25 кӱнге, дизель топливозы – 42 кӱнге. Топливо читiрiлерi узарадылча, чардығы тӱрчедең регионзар чидер, пасхазы ам даа чолда. АИ-95 бензиннi республиказар ағылары сала хызырыл парған.
Хакасия правительствозы Россияның энергетика министерствозынзар паза федеральнай правительство кнезiнiң орынҷызы Александр Новаксар регионзар читiрiлчеткен топливоның синiн ӧскiрер сурығнаң айланған. Федеральнай кiн республика ӱлгӱлерiн искен, чағынғы туста Россияның энергетика министерствозы регионыбыста топливонаң палғалыстығ кирек хайди парчатханын ӱзӱрер.
Республикадағы штаб тоғызы чонның чуртазына кӧнi теелчеткен предприятиелерге, табырах полызығ пирчеткен паза коммунальнай службаларға, Хакасияның хара тас аныпчатхан предприятиелерiне топливо читкiҷе поларын алынҷа хайығда тутча. Iдӧк, регионда ас кизер кампания тудығ чох паза тузында иртсiн тiп, аграрийлерге паза аал хонии предприятиелерiне ГСМ-ның тудығ чох читiрiлерiне тӧремiл хайығ салылча.
Iдӧк топливоның паазы хайығ чох халбинча. Алында сайбағлар iлезiне сығарылған, предписаниелер пирiлген паза киректер азылған соонаң алынҷа АЗС-тарның ээлерi пааларны тӱзiрчелер. Хакасиядағы УФАС пааларны сыныхтирын узаратча.
Сом r-19.ru сайттаң
Автор :
Хакасия пазының паза Хакасия правительствозының пресс-службазы
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
