Тоғызынҷы фура чорыхха сығыбысты
26.08.2026
Хабарлар
СВО-дағы пістің чааҷыларға Хакасия пазының адынаң «Лада Гранта» автомобиль ызылча
СВО-ға полызығ. Ӧнетiн чаа операциязында араласчатхан пiстiң чааҷы чир-суғҷыларыбысха гуманитарнай полызығ ызары узарадылча
Киҷее ӧнетiн чаа операциязында араласчатхан пiстiң чааҷыларға гуманитарнай полызығ чыыпчатхан Хакасия правительствозының складтары алнында теестегi «SCANIA» узун фура турыбысхан. Аның соондағы iзiктерiнзер УАЗ пикап кире хонған. Ол Алтай аймааның Хубачар аалындағы волонтёрлар чыған гуманитарнай полызығны ағылтыр. Iди кӱннiң сай пу складтарзар республиканың город-аймахтарынаң орыннардағы организациялар, халых пiрiгiстерi, волонтёрлар паза идiнҷектер, олаңай чуртағҷылар даа чыған таарлағны ағылчалар.
Амды чайғы чылығ кӱннер тоозылчатханда, СВО зоназынзар чааҷыларға хоза чылығ кип-азах паза даа пасха кӧп ниме-ноо киректелче. Аны санға алып, волонтёрлар орыннарда чааҷыларның сурыныстарынҷа ызар таарлағ тимнепчелер. Чаалазығларда прай ниме табырах иргiлен парча, кӧзiдiмге, чайғыда тузаланған чӱленҷең сетьтернi ам хайди даа нааҷылирға киректелче. Аннаңар соох арах кӱннер турарына килiстiре таарлағ тимнирге кирек.
Фураға гуманитарнай полызығны таарлир тоғыснаң устапчатханнар Хакасия пазының чӧпчiзi Сергей Комаров (ол илееде тус республика устағҷызының Луганск Чон Республиказындағы кiзiзi полған, ам анда пасха кiзi тоғынча) паза iдӧк Хакасия пазының чӧпчiзi полчатхан, Афганистанның паза ӧнетiн чаа операциялары ветераннарының тиксi Россиядағы халых пiрiгiзiнiң региондағы пӧлиинiң кнезi Александр Векшин. Аннаң алынҷа чоох алысхабыс:
– Пic прай гуманитарнай полызығларны ӧнетiн чаа операциязындағы чааҷыларның сурыныстарынҷа тимнепчебiс. Пӱӱл тоғызынҷы фураны таарлапчабыс, СВО пасталғаннаң сығара 54-ҷi полызығ ызылча. Пу фурада ниикке чӧрҷең ӱс автомобиль (пiр «Лада Гранта», пiр «Москвич-2140», паза пiр «Лада Ларгус»), мотоцикллер, пилорама «Ирбис» отрядха, кӧп чӱленҷең сеть, соохтар пасталарына тимiр «буржуйка» пестер, окоптарда тузаланҷаң свечiлер, прай таарлағның ӱзiнҷi чардығы адап ысчатхан посылкаларға килiсче. Фура 20 тонна таарлағ апарча. Гуманитарнай полызығны апарчатхан пiстiң фураларны чолда ыырҷының дроннары абылапчалар. Соонаң ызылған таарлағны чааҷыларға «буханка» автомобильлер читiрчелер, оларны iдӧк дроннар абылапчалар. Пу таарлағда дроннар учухчатханнаңар искiрҷең приборларны ысчабыс, – чоохтапча Александр Векшин.
«Лада Гранта» автомобильдеңер чоохтаза, таныхтирға кирек, аның сӱлейкезiнде «Хакасия пазынаң СВО араласчыларына – «Гранта» табличка чапсырылтыр, iдӧк соондағы сӱлейкеде «Автомобильнi тыхтап, нааҷылап салған КПРФ-тың региондағы пӧлии» паза «Читiген» театр» табличкалар хызылых. Автомобильнiң салонын кӧргенде, машина автомат коробкалығ полтыр, андағ автомашиналар тузаланыста даа тилем учурабинчалар.
Ызылчатхан автомобильлернiң салоннарына толдыра аймах коробкалар, пакеттер, посылкалар таарлапчалар. Пу тоғыстарны ДОСААФ-тың курсанттары толдырчалар. Автомобильлер таарлалған соонда, аның хыриндағы пос орыннарзар машина тегiлектерi, шиналар, пластик iдicтерде кӧп суғ таарлалғаннар. Курсанттар, изере турып, ол iдicтернi, холдаң холға пирiп, фуразар читiрчеткеннер. Толдыра таарлалған «Москвич-2140» эстакадаҷа фуразар пастап сых полбин салған, анаң, нандыра тӱзiп, ырахтын ойладып, фуразар кире хонған.
Ызылчатхан таарлағда чааҷыларға сыбыра киректелчеткен ниме-ноо полған: наа тӧзек-частых, салфеткалар, газнаң чылытчаң приборлар, аймах имнер, чааҷыларның ады-солазы, чаа частьының номерi пазылған посылкалар уғаа кӧп полғаннар.
Хайди таныхтаан Александр Векшин, гуманитарнай полызығ апарчатхан фура Лугансктағы Хакасияның складынзар чидер, аннаң сығара таарлағ кӧзiдiлген адрестерҷе Донецк Чон Республиказындағы, Запорожье паза Херсон областьтарындағы чаа частьтарынзар тарадылар. Прай таарлағ кӧзiдiлген адрестерҷе хайди даа читiрiлер. Мындағ полызығ пiстiң чааҷыларға фронтта чиңiс тударға хабазарына iзенiс пирче. Чиңiс хайди даа пicти полар!
Cом Дмитрий Сунчугашевти
Автор :
Николай Султреков
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
