Наа тоғыс оңдайларын тілеп, опытнаң ӱлескеннер
26.08.2026
Хабарлар
Форум араласчылары Саяногорсктағы алюминий заводында
Форум. Хакасияда пасха регионнарның «Минің пос киреем» кіннерінің устағҷылары паза специалисттері пастағызын на чыылысты. Оларға «Сибирь» регионнар аразындағы бизнес-лагерь ирткен
Форумны Хакасия правительствозының паза «Сибирьнің кресен (фермер) хоныхтарының паза аал хонии промышленнозы комплексінің пірігістері» ассоциация хабазиинаң Хакасияның тиліс чыындызы – «Минің пос киреем» кіні иртірген. Аалҷылар Хакасияда ӱс кӱн тоғынғаннар: 21 – 23 орғахта. Пірдең, оларға, тузалығ искіріглердең паза ӱзӱріглердең пасха, Хакасияның аймах кӧcтегліг предприятиелерiнің тоғызынаң танызар оңдай пирілген.
Іди аалҷылар Саяногорсктағы алюминий заводының тоғызынаң танысханнар. Алюминийдең ниме-ноо сығарызын алғыдар пӧгіннең Хакасияда килкім инвестиция проекті – «Хакас технология ойымы» сығарыс-промышленность оңдайлығ алынҷа экономикалығ орынны тӧстирі – чуртасха кирілче. Аннаң пасха, Хакасияның грант хабазиинаң тузаланып, туризм кирее тиліпче. Андағ орыннар санында «Изербельский ключ» тынағ базазы (ИП Воробьева Р.А.) паза «Мраморка» экстрим-парк (ИП Жигалов А.В.). Аалҷылар пу ікі орында пол килгеннер.
Ікі кӱн бизнес-лагерь араласчылары «Гладенькая» отельде тоғынғаннар. Пастағы кӱнде «Минің пос киреем» кіннің устағҷылары идінҷектерге читірілчеткен полызығлар санын алғыдар оңдайларны ӱзӱргеннер паза маңнаныстығ опытнаң ӱлескеннер, ідӧк «Хакас технология ойымы» алынҷа экономика орнының креатив индустриялары кӧстегҷе ӧӧн резиденттерінең танысханнар. Ікінҷі кӱнінде РусГИДРО кізілерінең тоғасханнар паза Хакасияда туризм киреен тилідерінҷе паза аның саблығ орыннарын сабға сығарарынҷа опытнаң ӱлескеннер.
Форумның аарластығ аалҷызы «Минің пос киреем» пос киреенің национальнай агентствозының директоры Максим Огладков полған.
– Национальнай агентство пос киреенең палғалыстығ прай чапсых киректерде араласча, ӧӧнінде хазна синінде. Аннаңар Сибирьде «Минің пос киреем» кіннері чыылызарынҷа наа кибір тӧстелчеткені мині ӧріндірче, – теен Максим Огладков айланызында. – Аның ӱчӱн пу пастағ ӱчӱн Хакасияны паза республиканың «Минің пос киреем» кіннің устағҷызы Валерий Евлаховты алғыстирға сағынчам. Пу тоғысты хайди даа узарадарға, опытнаң ӱлезерге кирек.
Валерий Ивановичтің искіриинең, мындағ форумны иртірер сағыс Хызылчарда тӧреен. Піс ӧӧнінде тӧӧй кирекнең айғасчабыс, че полғаны ла аны чуртасха кирерге тус, кӱс хоратча, наа оңдайлар тілепче. Итсе, прай ол нименең сала тӱзімніг тузаланарға чарирҷых.
– Аннаңар мин ізенчем, Хакасияда прай даа Сибирь регионнарынаң «Минің пос киреем» кіннерінің устағҷылары чыылысханда, пістің тоғызыбыс тузалығ полар паза мыннаң мындархы тоғызыбысты айныдарға паза идінҷектерге уламох чағын поларға полызар. Ағаа хоза пу форумны иртіреріне пір дее бюджет ахчазы тузаланылбаан. Мин хабасхан идінҷектерге алғызым читірчем, – таныхтаан чооғында Валерий Евлахов.
23 орғахта форум араласчылары тоғысты Ағбанда Л.Р.Кызласовтың адынаң Хакас национальнай чир-суғ ӱгренҷең музейде узаратханнар. Аалҷылар экскурсиянаң Кӱн тағзар пар килгеннер паза «Дух Хакасии» кооперативте пол килгеннер.
Сом Хакасияның тиліc чыындызы – «Минің пос киреем» кінни
Автор :
Наталья Сюптерекова
| Пн | Вт | Ср | Чт | Пт | Сб | Вс |
| 28 | 29 | 30 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
