Чииттер наа пілістер алғаннар
26.08.2026
Хабарлар
Хакасияның чииттер политиказы паза халых тилізі министрінің тоғызын толдырчатхан Лилия Боргоякова
Этнова-2026. Пӱӱл «Этнова. Чылығ Сибирь» регионнар аразындағы чииттернiң этно-турист форумы ӧткін, наа кӧрістіг оол-хыстарға 15-ҷi хати ізиин асты
Пістің регионда кибірге кір парған форум пӱӱл пастағызын на ікі смена тоғынып иртiрілче. Пастағы смена 21 орғахтаң 23 орғахха теере тоғынған, ікінҷі смена 28 орғахтаң 30 орғахха теере иртер. Анда чиит улуснаң тоғынчатхан специалисттер аралазарлар.
Ирткен неделяның тынағ кӱннерінде Пии аймаандағы «Жарки» тынағ базазында «Этнова. Чылығ Сибирь» чииттер форумы пайрамни азылған. Анда илееде оол-хыс араласхан. Олар, аймах площадкаларда аралазып, постарының пілістерін алғытханнар. Олох туста пос проекттерінең пасхаларын таныстырғаннар.
Пастағы смена чииттернің пастағларына чарыдылған. Анда аймах сферада істенчеткен чииттерге алты площадка тоғынған: «Молодёжное предпринимательство», «Молодёжный туризм», «Культурный код», «Голос поколения», «Социопроектная мастерская», «Творчество.Молодость».
Форумны «Кӱн сузы» ансамбль сіліг теелбекнең асхан. Соонаң Хакасияның чииттер политиказы паза халых тилiзi министрінің тоғызын толдырчатхан Лилия Боргоякова, сценазар сығып, чыылған улусха форумны тӱзімніг иртірерге паза аның аймах площадкаларында кӧп наа арғыс таап аларға алғаан. Форум пайрамни азыл парғанда, араласчылар кӧңнiне килiстiре ачыхтарҷа тарасхлап парыбысханнар.
– Мин «Этновада» пастағызын на араласхам. Аның алнында «Контент» регионнар аразындағы медиафорумда полғам. Форум ирткен туста тасхар сӧрӧн полған. Че, андағ даа полза, наңмыр піске алныбыста турғызылған пӧгіннерні толдырарға харығ полбаан.
«Голос поколения» площадканың кураторы Дмитрий Кирсанов полған. Ол чиит улусха табығлар темазына чарыдылған уғаа хынығ занятиелер иртiрген. Анда олаңай лекциялар полбаан. Піс табығлар тузында хайдағ сидіксіністер сығыс килчеткенін ӱзӱргебіс. Чииттерні табығларда аралазарға хайди кӧӧктiрердеңер чоохтасхабыс. Паза піснең хада психологтар тоғынғаннар. Олар ноға чиит оол-хыстар нандырығлығ туста постарын іди тудынчатханнаңар чарыт пиргеннер. Мағаа Дмитрий Евгеньевичнең тоғынарға хынығ полған. Наа пілістер кізее тоғыста тилирге паза алнынзар пасха кӧріснең кӧрерге полысчалар, – теен форум араласчызы Евгения Гофман.
Евгения Пиидегі методика кінінің чиит тоғынҷызы полча. Тоғыс хоостыра ағаа наа пілістер паза сағыстар киректелген. Аннаңар ол, ӱр дее сағынмин, «Этнова. Чылығ Сибирь» форумда аралас кӧрерге чараттыр. Оңдай полза, чиит хыс килер чылда ідӧк форумда аралазарға пӧгінче.
Сом Хакасияның чииттер политиказы паза халых тилізі министерствозының сайтынаң
Автор :
Тимнеен Ольга Томочакова
| Пн | Вт | Ср | Чт | Пт | Сб | Вс |
| 28 | 29 | 30 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
