Чииттернің пастағларына наа тыныс пирілген
19.08.2026
Хабарлар
Валентин Коновалов чииттернең хада «Контент» медиафорумны асча
Форум. Пу тынағ кӱннерде Хакасия пазы Валентин Коновалов «Жарки» тынағ базазында «Контент» регионнар аразындағы чииттер медиафорумының араласчыларынаң тоғасхан
Чоохтирға кирек, форум «Чииттер паза олғаннар» нацпроектке кірчеткен «Россия – оңдайлар пирчеткен хазна» федеральнай проектче иртiрілген. Аның ӧӧн пӧгіні чииттерні амғы тустағы медианы тилiдеріне хозыларға кӧӧктiрерi полча.
Чайғының халғанҷы айы чиит улусха тӱзімніг иртче. Пу наада «Жарки» тынағ базазынзар чоннаң ӧткін палғалысчатхан 150 оол-хыс чыылысхан. Оларның санында сомҷылар, видеографтар, журналисттер, SMM-специалисттер, блогерлер паза дизайнерлер полғаннар.
– Сірернiң наа сағыстар паза кӱс пар, хайзы наа кӧстеглерні азарға полызар. Анзы ӧӧнi. Андағ кізілер хаҷан даа наа оңдайлар таапчалар паза, чоннаң палғалызып, аймах ағырсымнығ сурығларны ӱзӱріге сығарчалар. Пӱӱнгі кӱнде андағ ӧткін, наа хаалағларны хынып пастапчатхан чуртағҷылар пістің республикаа паза хазнаа уғаа киректер, – чоохтаан Валентин Коновалов, чыылған чиит улуссар айланып.
Ӧткін оол-хыстарның регионнар аразындағы форумы ікі кӱн парған. Анда оларға алғым программа тоғынған: федеральнай паза регионнар синіндегі эксперттернең чапсых тоғазығлар, ӱзӱрiглер, мастер-класстар, саннығ технологияларнаң палғалыстығ интерактивнай мероприятиелер.
Форумның араласчылары, пӧзік пілістіг спикерлернең тоғазып, хабарҷының тоғызына теелчеткен сурығны ӱзӱргеннер. Ол санда иптіг тудынарынаңар, кізілернең орта чоохтазарынаңар сурығ кӧдірілген. Паза чииттер амғы туста арған сағыснаң хайди орта паза хайдағ кӧстеглерде тузаланарға чарирынаңар сағыстарынаң ӱлескеннер. Ідӧк аймах ачыхтарда араласчыларға проекттерінең таныстырарға оңдай пирілген.
Пістің республикада мындағ алғым иртiрілчеткен мероприятиеде пӧзік пілістіг, пос тоғызында улуғ чидiге читкен кӧп спикер араласхан. Андағларның санында Павел Мавриди полған. Аны чиит улус чахсы таныпча. Павел «Пятница» паза «Суббота» телеканалларда аймах кӧзідіглерні апарча. Ідӧк ол «POPCAKE» паза «Новости первых» программаларның ӧӧн редакторы полча. Форумда Павел Мавриди «Журналист паза блогер: тоғыс пыласчатханнар алай аймах-пасха кӧстеглерҷе тоғынчатханнар полчалар?» ачыхта чиит чир-суғҷыларыбыснаң чоох алысхан.
Таныхтирға кирек, аның килерін чиит улус чидікпин сахтаан. Пӱӱнгі кӱнде саблығ ведущай кӧп оол-хысха кӧзідім полча. Павел аймах темаа чарыдылған кӧзідіглерні апарча, саблығ кӧгҷілердең интервью алча, чуртағҷыларны сизіндіріп, «Осторожно, мошенники!» кӧзідігде сайбағҷылар хайди хайынчатханнаңар чоохтапча. Паза аның алынҷа проекттері тилекейдегі чапсых орыннарға чарыдылча.
– Форум мині таңнатхан! Мағаа медиасферада пӧзік чидіглерге чидерге сағынчатхан оол-хыстарнаң тоғазарға чапсых полған. Пістің Хакасияда андағ улуғ форумнар иртірілчеткенін кӧрерге уғаа ӧріністіг. Сірер уғаа хыйғаҷахсар! 20 чыл мының алнында мин, Хакасиядаң парчадып, чир-суумзар пірее мастер-класснаң айланарға сағынғам. Амды чазыт сағызым тол парды, – таныхтаан саблығ ведущай.
Павел медиа кӧстегҷе пастағы хаалағларны Ағбан городта пастаан. Ол Хакас хазна университедінің журналистика факультедін тоосхан. Анаң, улуғ пӧгіннер турғызып, хазнабыстың ӧӧн городынзар чуртирға парыбысхан. Анда чиит оол, кӧп сидіксіністерні тобырып, позының чолын таап алған.
Сом r-19.ru cайттаң
Автор :
Тимнеен Ольга Томочакова
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
