Ӱннер ӱчӱн кӱрезiг чағыннапча
19.08.2026
Хабарлар
Хакасияның Табығ комиссиязының кнес орынҷызы Ираида Чустеева
Табығлар-2026. Хакасияның Табығ комиссиязы республикада иртер табығларға тимненістеңер паза кандидаттарны санға алар чардыхтың салтарларынаңар пресс-конференция иртірген
Пресс-конференцияны Хакасияның Табығ комиссиязының кнес орынҷызы Ираида Чустеева апарған. Хайди ол таныхтаан, пістің республикада Россияның тоғызынҷы хығыртии Хазна Думазының депутадына табығлардаң пасха орындағы пос устаныс органнарынзар 14 табығ кампаниязы иртче.
– Кандидаттарны санға алары прай чирде тоозыл парған, – искірген ол. – Пу оңдайнаң аның салтарларын идерге чарир.
Россияның Хазна Думазының депутадына табығларда, 40 № Хакас пір мандаттығ табығ округынҷа, 10 кандидат сығарылған. Че оларның аразынаң 7 ле кандидат санға алылған. 2 кандидат пічіктерін пирбеен сылтаанда сығарылғаннарның статузын чідіргенге саналған, пос посты сығарған кандидат Игорь Арчимаев ағаа хабасчатхан хол салған саны читкіҷе полбаан сылтаанда санға алылбаан. Ағаа 11851 хол салғанын чыып аларға киректелген. Кандидаттың, тізең, 11641 хол салғаны пар полтыр, 210 хол салғаны читпиндір.
Санға алылған кандидаттар: Ирина Вербицкая («Справедливая Россия»), Игорь Ефремов («Зелёные»), Павел Камеко («Коммунисты России»), Иван Мисюк («Новые люди»), Михаил Молчанов (ЛДПР), Валерий Старостин (КПРФ), Александр Штыгашев («Единая Россия»).
Ираида Чустеева ирткен чыллардағы табығларны тиңнестіріге ағылған. Bди 2016 чылда Хазна Думазынзар табығларда 8 кандидат сығарылтыр, ол санда 1 – пос посты сығарған кандидат. Оларның аразында 6 кандидат санға алылтыр, прайзы – партиялар сығарған кандидаттар. 2021 чылда Хазна Думазынзар табығларға хай-хай кӧп кандидат сығарылтыр, тиксі 17 кандидат, ол санда 8 – пос посты сығарған кандидат. Андада санға алылар чардыхты 10 кандидат иртіп алған, ол санда 1 – пос посты сығарған кандидат.
Орындағы пос устаныс органнарынзар табығ кампанияларын алза, оларның иң килкімнері Ағбан пилтірі аймаа пазына табығлар паза Абаза городтың депутаттар чӧбінзер табығлар полчалар.
Ағбан пилтірі аймаа пазына табығларда 5 кандидат санға алылған, прай кандидаттарны партиялар сығарғаннар: адвокат Николай Васильев (ЛДПР), аймахтың амғы пазы Елена Егорова («Единая Россия»), Сибирьде туризмні паза сервисті тилідерінҷе ассоциацияның кнезі Иван Кукарцев («Партия Возрождения России»), Ағбан пилтірі аал чӧбінің кнезі Нина Леонченко (КПРФ) паза Хызылчар крайында чуртапчатхан пенсионер Нина Леонтенко («Коммунисты России»).
Абаза городтың депутаттар чӧбіндегі 15 депутат орны ӱчӱн 45 кандидат кӱрезер. 6 кізі – пос посты сығарған кандидат, 39 кізіні 4 партия сығартыр: КПРФ, «Единая Россия», «Справедливая Россия» паза ЛДПР.
Ираида Чустеева ідӧк табығ оңдайларынаңар чоохтап пирген. Амғы туста пічікке кирілгені хоостыра нимес орында чуртапчатхан, алай ӱн пиріс кӱннерінде пасха орында полар, табығҷыларға ӱн пирҷең табығ участогын таллап аларға оңдай пар. Анзына оларға килістіре айланыс тимнирге кирек: МФЦ-да алай «Хазна полызығлары» портал пастыра.
Паза Хакасияның Табығ комиссиязының кнес орынҷызы республикада «ИнформУИК» проект тоғынардаңар искірген. Ол проект хоостыра табығ комиссияларының кізілері тураларҷа чӧрерлер, иртер табығлардаңар чоохтирлар. «ИнформУИК» наа нимес проект, ол республикада 2024 чылда Россия президентіне табығлар тузында тоғынған.
– Улуғ тоғыс толдырылған, че алнында ам даа кӧп пӧгін, – таныхтаан Ираида Чустеева, пресс-конференция салтарларын идіп. – Че піс оларға сыданарбыс!
Сом Дмитрий Сунчугашевти
Автор :
Альберт Толмашов
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
