Наа ӱгредіг чылына тимделер
19.08.2026
Хабарлар
Хакасияның ӱгредіг паза наука министрі Анатолий Бутенко наа ӱгредіг чылына тимненістеңер искірче
Ӱлгӱ. Киҷее Хакасия пазы Валентин Коноваловтың устаанынаң республика правительствозының теестегі чыылии ирткен
Хакасия правительствозының теестегі чыылиина пӱӱнгі кӱннің ӧӧн сурығлары кирілген: топливо сурии, ӱгредіг чылына, чылығ пирҷең тусха паза Пірге табығ кӱніне тимненіc. Аннаң пасха, Алтай аймаандағы Хызыл чазы аал чӧбі пазы Залина Кузнецова устағ-пастағ тоғызынаңар паза Ағбан пилтірі посёлок пазы Нина Леонченко чииттер политиказының тиліc оңдайларынаңар искіргеннер.
Хакасияның экономика тилізі министрі Роман Ковтунның искіриинең, республиканың АЗС-тарында топливо садиин хайығда тудары узарадылча. Чуртағҷыларның пӱӱнгі кирексініcтерін санға алза, 17 орғахха нефть базаларында паза АЗС-тарда мындағ чыындылар полған: АИ-92 бензин – 20 суткаа, АИ-95 – 17 суткаа, ДТ – 35 суткаа. Неделя аразына чыынды 20%-ке хозыл парған. Ағбандағы нефть базазында АИ-92 бензин 65%-ке толдырылған (неделя аразына +40%), АИ-95 бензин – 35,4% (алыспаан), ДТ – 92%, чолда килче 1,85 муң тонна. Харатастағы нефть базазында: АИ-92 – 95%, АИ-95 – 80%, ДТ – 46%. Анзы хосхар айынаң ала пасталған биржадағы сидіксіністер пӧгілген сылтаанда паза чӧптезіглер соонаң ол топливо республикаа читірілген. Чуртағҷылар даа, пірігіcтер дее сағам сидіксініcтер чох бактарын толдырчалар. Алынҷа хайығда аймахтардағы АЗС-тар. Кӧзідімге, Орджоникидзе аймаандағы чалғыс заправка алында холға 10 литр бензин позытхан полза, ам 20 литр сатча. Bдӧк Копьёвтаң 100 километр оортахта орныхчатхан АЗС тоғызы нааҷылалған.
Пааларны УФАС хайығда тутча, пу наада алынҷа АЗС ээлеріне пааларны ӧскірерінҷе чӧптескен ӱчӱн киректер азылған.
Хакасия пазы Валентин Коновалов топливо суриинҷа алынҷа чыылығ иртірген паза Роман Ковтунға тоғысты узарадарға чахаан, ол санда хазна синінде Россия правительствозының кнезінің орынҷызы Александр Новактың чахығлары толдырылчатханы паза РЖД пастыра регионзар топливоны тартары хоостыра.
Хакасияның ӱгредіг паза наука министрі Анатолий Бутенко республикада ӱгредіг учреждениелерінің 1 ӱртӱнге тимненізінҷе сан пиріснең чоох тутхан. Тиксі республикада 183 тиксі ӱгредіг учреждениезі, 175 олған сады паза 15 ортын профессия ӱгредии учреждениезі тоғынча. Eгредіг чылына 177 школа тимде, алтызында тиксі тыхтағ тоғыстары парча. Прай 15 колледж-техникум наа ӱгредіг чылына тимде. Тӧрт олған садында тиксі тыхтағ тоғыстары парча, пасхазы тимненіc cыныхтаан маңнаныстығ иртібіcкен. 2026 чылда ӱгредіг учреждениелерін терроризмнең хорғыс чох поларына киліcтіре тыхтирына «Хакасияда ӱгредігнің тилізі» программаҷа муниципальнай пӱдіcтерге 200 миллион салковай ызылған. Аннаң пасха, тиксі тыхтағ программазынҷа 2025-2026 чылларда Харатастағы отрасльлар технологияларының техникумы общежитиезінде тиксі тыхтағ тоғыстары толдырылған, ол ізіктерін 1 ӱртӱнде азар.
2026-2027 ӱгредіг чылында 4296 ӱгренҷіні школазар тартарға киректелер, ол ирткен чылдағызынаң 3%-ке асхынах. Оларны тарт чӧрерге 130 азыра автобус тимде, пӱӱл муниципальнай пӱдіcтерге хоза 10 азыра автобус пирілер. Топливо чыындызы пір айға тимде.
Школаларның библиотекаларына 77 муң наа учебник тиксі 55 миллион салковайға читірілген. Министрнің таниинаң, наа ӱгредіг чылында ӱгренҷілер саны ирткен чылдағызынаң 3,1%-ке асхынах полар паза 72036 палаа тиңнелер. Че иң не пілдірте 1-ғы класс ӱгренҷілері хызырыл парған – 17%-ке. Наа ӱгредіг чылында школаларда тиксі 10243 тоғынҷы істенер, ол санда 5688 ӱгретчі. Тоғынҷылар саны ідӧк хызырылча – алындағы ӱгредіг чылынаң 2,3%-ке асхынах полар. Олох туста 35 час толдырғалах ӱгретчілер саны 18%-ті ас парған.
Пасталығ класстарның 28231 ӱгренҷізі тикке азыранар, аннаң пасха 8000 азыра ӱгренҷінің азыранҷаң льгота пар. СВО араласчылары сӧбірелерінең 1938 пала ідӧк тикке азыранар.
24-25 орғахта ӱгредіг киреендегі специалисттернің конференциязы иртер. Eгретчілерні чыылығлар, секциялар сағыпча, ол санда федеральнай эксперттернең хада.
Валентин Олеговичтің искіриинең, пӱӱл коммунальнай инфраструктураны тыхтирына республика бюджедінең 123 миллион салковай позыдылған, федеральнай программаларҷа 146 миллион салковай тартылған. Хакасияның ЖКХ паза энергетика министрі Максим Виноградовтың искіриинең, 2026-2027 чылларның чылығ пирҷең тузына тимненіc кӧрілген тусча парча. 155 котельнайдаң 119-зы тимде, чылығ паза суғ читірҷең сетьтер 78%-ке тимде. Хакасияның финанстар министерствозы кӧрілген тоғыстарға ахча тузында позытчатхан сылтаанда тоғыстар тудығ чох толдырылчалар. Сӧӧ тартынчатхан город-ааллар аразында – Асхыс аал. Мында тоғыстар сыбыра сыныхтағда тудылча. Хакасия пазы андағ орыннарда подряд пірігістерін маңзырадарға чахаан.
Хакасияның Табығ комиссиязының кнезі Александр Чуманин правительство кізілеріне 2026 чылның Пірге табығ кӱніне тимненіс хайди парчатханнаңар искірген. Газетабыста ол тоғыстардаңар сыбыра пазылча. Валентин Коновалов табығҷылар ӧткін аралазарынҷа тоғыс апарарға, оларға хорғыс чох поларын тӧcтирге кирек теен паза орынҷызы Богдан Павленкоға муниципальнай пӱдіcтер пастарынаң хада пу сурығҷа алынҷа чыылығ тимнирге чахаан.
Хакасия пазы даа, правительство кізілері дее Хызыл чазы аал чӧбі пазы Залина Кузнецованың устағ-пастағ тоғызынаңар паза Ағбан пилтірі посёлок пазы Нина Леонченконың чииттер политиказының тиліc оңдайларынаңар искіріглеріне чӧпcінгеннер паза тоғыстарын мыннаң мындар айныдып одырарға алғааннар.
Чыылығны тоозып, Хакасия пазы Валентин Коновалов республиканың министерство-ведомстволарын Піліс кӱніне удур чахсы кибірдеңер ундутпасха хығырған – кічіг паза ыраххы ааллар олғаннарының кирексініcтерін толдырарға паза наа ӱгредіг чылына сыйыхтар тимнеп пирерге.
Сом кӧзідігдең алылған
Автор :
Наталья Сюптерекова
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
