Аар сайбағлар саны хызырылча, че мобильнай палғалысча – ӧсче
19.08.2026
Хабарлар
Комиссия чыылии. Хакасия пазы Валентин Коновалов Сайбағлардаң тоғыр профилактика тоғызын апарчатхан ведомстволар аразындағы комиссияның теестегi чыылиин иртірген
Чыылығда региондағы сайбағлар сині, искіріг технологиялары сферазындағы сайбағлардаң тоғыр профилактика тоғызы хайди апарылчатханы, республикада «Хорғыс чох город» аппарат-программа комплексін пӱдірерінҷе мероприятиелерні чуртасха кирері паза даа пасха сурығлар ӱзӱрілгеннер.
Пу чылның пастағы чардығында Хакасияда 3711 сайбағ саны алылған. Анзы пылтырғы олох тустаң 16 % асхынах. Аар паза уғаа аар сайбағлар саны хызырылған. Iди тонағлар, мал оғырлааны, квартиралардаң оғырластар иділгені хызырыл парғаннар. Iдӧк IТ-сайбағлар саны 33 % хызырылғаны таныхталған, че андағ даа полза, пу сурығ сағыссыратча.
– Мобильнай палғалыснаң тузаланып иділген сайбағлар саны илееде ӧсчеткені кӧрілче. Андағ прай 654 сайбағ таныхталған. Jзіс 79,6 % тиңнелген. Кізілернің саннығ сайбағлардаң арачыланар оңдайлары ӧсчетсе дее, сайбағҷылар кізілерні алаахтырар паза ахчаны курьерлер холдаң холға пирчеткен оңдайларнаң тузаланчалар. Пу чылның пастағы чардығында иділген ӱрег сині 140 миллион 244 муң салковайға тиңнелген. Иділген ӱрег сині 29,4 % хызырылған, – таныхтапчалар Хакасияның МВД тоғынҷылары.
Киберсайбағлар полдыртпас пӧгіннең Хакасияда улуғ профилактика тоғызы апарылча. Аны хоостыра істенiс ӧмелерінең, ӱгренҷілернең паза студенттернең тоғазығлар иртірілче. Анда кӱҷӱрлестернің амғы наа схемалары ӱзӱрілче: кізінің ӱнін алыстырчатханы, iдӧк номерлер алыстырылчатханы, саннығ сомнар паза даа пасха оңдайлар.
Амды хайығ салҷаң пасха кӧстег – экстремизмге тоғырланары паза аннаң тоғыр профилактика тоғызын апарары. Хакасияҷа МВД саннарынаң, пу чылның пастағы чардығында республикада 17 кизе-тоғыр интернет-ресурстың тоғызы тохтадылған, мыннаң мындар сайбағлар идерге чарабастаңар кізілерге 769 сизіндіріг пирілген, 3 уголовнай кирек азылған.
Амғы туста ӧнетін чаа операциязы апарылчатханын санға алып, транспорт объекттерінде хорғыс полдыртпас тоғыс апарарына алынҷа хайығ салылча. Пӱӱл оларның тоғызына законнаң хыйыстыра ара кіріскені таныхталбаан.
Тиріглернің законнаң хыйыстыра айланызын тохтадар тоғыс узарадылча. 2026 чылның пастағы чардығында Хакасияда, тирігнең тузаланып, 10 сайбағ иділген. Тирігнің законнаң хыйыстыра айланызынаң палғалыстығ 92 кирек санға алылған. Кізілердең 18 тиріг, 1135 ух-тар, чара чачыратчаң 4 кг ниме-ноо алылған.
Чоохтирға кирек, санға алылбаан алай таап алған тирігні пос кӧңнінең пирібіскен ӱчӱн, кізілер уголовнай паза административнай нандырығ тударынаң позыдылчалар, iдӧк олар ахчалығ сыйых таа ал поларлар. Пос кӧңнінең тирігні пирібізерге итсе, Росгвардияның Хакасияҷа устааның лицензиялар, чарадығлар пирчеткен подразделениезінзер айланарға кирек.
Iдӧк кӱн суриинда халча наркотиктернең палғалыстығ сайбағларға тоғырланар тоғыс апарары. Пӱӱлгі чарым чылда наркотиктернең палғалыстығ 356 cайбағ санға алылған, аның ӱчӱн 152 кізi нандырыға тартылған. Законнаң хыйыстыра айланыстаң 17 кг наркотик алылған, ол санда 7,5 кг – синтетика. Ағаа хоза 12 наркопритонның тоғызы тохтадылған. Наркотиктер садарына паза аннаңар пропаганда апарарына тузаланылған 12 интернет-ресурс чабылған. Наркотиктер ағылчатхан 15 канал ілезіне сығарылған паза чох иділген.
Пу чылның ікінҷі чардығында сайбағлардаң тоғыр кӱрезіг апарары узарадылар. Хоза илееде тоғыс апарылар, ведомстволар аразындағы хада-пірге тоғыс айныдылар, ол санда республикада «Хорғыс чох город» аппарат-программа комплексін пӱдірерінең палғалыстығ мероприятиелерні чуртасха кирер сурығларны пӧгер план тудылча.
Сом авторни
Автор :
Виктория Айснер, Хакасияның юстиция паза регионны хорғыс чох идер киректерінҷе министерствозының пресс-службазы
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде
