Иң артыхтарын сыйыхтааннар
13.08.2026
Хабарлар
Хакасия пазы Валентин Коновалов cпортта пӧзік чидіглерге читкен улуснаң хада
Спорт. Физкультурник кӱніне чарыдылған пайрам ирткен
Пістің республикада Физкультурник кӱнін тӧреміл алғым таныхтапчалар. Пӱӱл ол Хакасияның 35 чылына чарыдылған. Хайди пу тус республиканың спортына ирткен? Тӱзiмніг! Анзын салтарлар киречілепче. 1991 чылдаң орындағы спортсменнердең Олимп ойыннарында 4 кізі кӱзін сынаан: кӱресчі Леонид Чучунов (2000 чыл), бобслеист Пётр Макарчук (2002 паза 2006 чыллар), марафонец Дмитрий Бурмакин (2004 чыл) паза кӱресчі Любовь Волосова (2012 чыл). Пётр Анатольевич тилекейнің иң улуғ мариинда арғыстарынаң хада ікі хати 8-ҷі орынға сыххан. Таштып аймаанда пӧзік чидігліг cпортсар пастағы хаалағлар иткен Волосова, тізең, Лондонда хола призер полыбысхан. Аның пастағы тренері – Олег Сагатаев.
Пістің республиканың аннаңох кӧп олимпиец поларҷых. 2024 чылда Наталья Малышева олимп лицензиязын утып алған. Хакасиядағылар аның ӱчӱн «ағырарға» тимненчеткеннер, че Россия кӱресчілеріне Парижсер чол чабысханнар. Наташа – пик хуйахтығ спортсмен. Ол пос салынмаан. Хакас абахай 2025 паза 2026 чылларда Европа чемпионаттарынаң хола медальлығ айланған, пӱӱл Россия мариинда алтынҷы хати чиңіс тутты.
35 чыл аразына Хакасияда пасха спорт кӧрімнері наа тыныс алғаннар. Кӧзідімге, Фёдор Жибинов Хакасияда гиря кӧдірерінҷе пастағы чоннар аразындағы класстығ спорт узы полча. Пӱӱл 16 частығ Станислав Арчимаев арғыстарынаң хада, аар атлетикаҷа тилекей первенствозында кӱзін сынап, алтын медаль холға кирген. Турнир Колумбияда ирткен. Хазии уйан улус чидіглернең тӧреміл ӧріндірче. Стол теннизінең айғасчатханнар улуғ марығларда полған на сай медальлар утчалар. Пір сӧснең, поғдархаҷаң ниме пар. Тиктең нимес спорт Хакасияда ӧӧн сфераларның санына кірче.
Ирткен неделяда Физкультурник кӱнін таныхтир чӧрімні муниципалитеттер асханнар. Асхыс паза Пии аймахтарында спартакиадалар ирткеннер, Таштып аймаанда – национальнай спорт кӧрімнерінҷе фестиваль. Металлургтар городында чон «Саяногорсктағы хурчағ» чӱгӱріске сыххан. Итсе, прайзын Ағбан ас парыбысхан. Хакасияның ӧӧн городы, 8 орғахта 95 чылын таныхтап, спорт кініне айлан парған тирге чарир. Пу кӱннерде спорт пайрамын ӱлӱкӱннирі узарадылған. 13 орғахта спортха улуғ хозым иткен улусты чеестееннер.
Иң пурун чыылған чонзар алғыстас сӧстерiнең Хакасия пазы Валентин Коновалов айланған. Валентин Олегович теен:
– Хакасияда спорт улуғласта. Пӧзік устығ спортсменнерні чон чахсы таныпча. Халғанҷы чылларда республикада хазых чуртасха тартылчатханнарның cаны пілдірте хозыл парған. Піс наа спорт объекттерін пӱдірерге кӱстенчебіс. Амғы туста ыраххы аалларда даа спорт ачыхтары пар. Оол-хыстарға наа чидіглерге чидерге, рекордтар турғызарға алғапчам.
Ідӧк чылығ cӧстер читірген Хакасияның спорт министрі Пётр Макарчук. Хайди таныхтаан Пётр Анатольевич, спортта пӧзік пӧгіннер турғызарға кирек. Тренерлер олимп чемпионнарын, чоннар аразындағы класстығ, саблығ cпорт устарын тимнезелер, андада тӧреен чирібістің ады ырахха сабланар. Министрнің сӧстерін кізілер ізіг айа сабызынаң удурлааннар.
Пайрам тузында 35 кізі сыйыхтаттырған. «Трудовая доблесть Хакасии» медальлар Россияның саблығ тренерлері Геннадий Боргояковха (грек-рим кӱрезі) паза Михаил Сазоновха (кикбоксинг) читірілгеннер. «Хакасияның физическай культуразының паза спортының саблығ тоғынҷызы» аарластығ атха турысханнар спорт школазының директоры Сергей Мироненко, тренерлер Дмитрий Нагибневнең Михаил Бузунов. Хакасияның Аарластығ пічиинең 8 кізі таныхтатхан, оларның санында Юрий Аёшин (охчаадаң атары). 20 оол-хыс аймах спорт кӧрімнерінҷе Россияның спорт узы атты киречілепчеткен танығны алған. Ідӧк спорт ветераннарын чеестееннер. Хакасияның спорт министерствозы улуғларға сыйыхтар тимнеп салтыр. Оларны «Саяны» команданың пастағы тренері Виталий Лазицкийге, хоккеист Валерий Аршановха, грек-рим кӱрезінҷе тренер Александр Кильчичаковха паза пасхазына читіргеннер. Залдағы чон Хакасиядағы спортта тирең іс артысхан улусха, азахха турып, айа сапхан. Сыйыхтасты ырлар паза теелбектер чазааннар.
Сом Дмитрий Сунчугашевти
Автор :
Майя Кильчичакова
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
