Регионның экономиказын тилідер сурығлар ӱзӱрілген
13.08.2026
Хабарлар
Россия президентінің Сибирьдегі федеральнай округтағы полномочиеліг кізізі Анатолий Серышев паза Хакасия пазы Валентин Коновалов тоғазығда чоох алысчалар
Тоғазығ. Россия президентінің Сибирьдегі федеральнай округтағы полномочиеліг кізізі Анатолий Серышев, Хакасиязар тоғысчы чорығынаң киліп, Хакасия пазы Валентин Коноваловнаң тоғасхан паза Хакасияҷа наа ӧӧн федеральнай инспектор Дмитрий Лямкиннең таныстырған
Наа ӧӧн федеральнай инспектор
Республика правительствозының чыылығлар иртірҷең улуғ залында чон сыыспинчатхан. Анзы пілдістіг полған, прайзы Хакасияҷа наа ӧӧн федеральнай инспекторнаң танызарға килген. Россия президентінің СФО-дағы полпреді Анатолий Серышев республиказар наа турғызылған Хакасияҷа ӧӧн федеральнай инспектор Дмитрий Лямкинні ағылчаттыр. Аның алнында ӧӧн федеральнай инспектор полған Андрей Соковиков Иркутск облазының правительство кнезінің пастағы орынҷызына турғызылған. Аннаңар мындағы пӧзік устағ орны амға теере пос полған.
Пу чыылыға Хакасияның прай даа устағҷылары килгеннер. Iди анда полғаннар Ӧӧркі Чӧп кнезі Сергей Сокол, аның пастағы орынҷызы Пётр Воронин, Хакасия пазының орынҷылары паза правительство кізiлері, сенатор Александр Жуков, кӱс структураларының паза право хайраллаҷаң органнарның, республикаҷа федеральнай органнарның устағҷылары, iдӧк город-аймахтарның пастары.
Новосибирсктең килчеткен аалҷыларның авиарейсi сала орайлатчатхан. Ағбан городтың орамаларында ГАИ автомобильлері паза тоғынҷылары хадағда турғаннар. Аалҷылар правительство туразынзар килгенде, чыылған чон алнында хысха чоох тутхан Анатолий Серышев.
Хайди ол таныхтаан, Хакасияның экономиказы олаңай нимес тусты иртче, Сибирьдегі регионнарда экономиканы тилідерге хабасчалар ӧӧн федеральнай инспекторлар институттары. Сірернің республикада ӧӧн федеральнай инспектор сидікciністерні тобырарға, Россия президентінің пӧгіннерін, чахығларын толдырарға, ӧнетін чаа операциязы араласчыларына паза ветераннарына прай саринаң хабазарға паза даа пасха сурығларны пӧгерге полызар. Аның пілізі улуғ, опыды пар, экономикадағы киректерні ол тирең пілче.
– Наа ӧӧн федеральнай инспектор мының алнында республикада полған, мындағы киректернең танысхан, – теен Анатолий Серышев. – Аның ікі пӧзік ӱгредии пар, Новосибирскте прокуратура органнарында тоғынған, законодательствоны чахсы пілче. Сірерні ӧӧн федеральнай инспектор Дмитрий Михайлович Лямкиннең таныстырчам, ағаа сӧс.
Хакасияҷа ӧӧн федеральнай инспектор Дмитрий Михайлович Лямкин
Хайди искірген Дмитрий Лямкин, ол – сибиряк, сӧс пирче: Хакасия чонының чуртазын чахсыландырарға прай кӱзін салар. Россия президенті турғысхан прай пӧгіннер толдырылар, кізілернің Конституциянаң кӧрілген праволары арачылалар, сірернің хабазииңарнаң тузаланып, республиканы паза прай Россияны тилідер тоғыс апарылар. Позы Новосибирскте 1981 чылда тӧреен, ікі пӧзік ӱгредии пар, 2004 чылда Томсктағы хазна университедін чалтырама тоосхан, 2011 чылда – Новосибирскте экономика паза устағ хазна университедін.
2004 – 2022 чылларда прокуратура органнарында аймах устағ тоғыстарында служба ирткен. 2023 чылдаң сығара Россия президентінің Сибирьдегі федеральнай округтағы полномочиеліг кізізінің аппарадында тоғынған. Сӧбіреліг, ӱс пала ӧскірче. Пӱӱл 10 орғахтаң Хакас Республикаҷа ӧӧн федеральнай инспектор тоғызына турғызылған.
Хакасия пазы Валентин Коновалов полпред турғысхан кандидатураа чӧпсінізін читірген. Аның чооғынаң, Анатолий Серышевтің полызиинаң республика кӧп сурығларны пӧкче, республиканың чуртас-экономиказын тилідерге амды наа ӧӧн федеральнай инспекторнаң хада-пірге тоғыс узарадылар. Валентин Олегович прай киректер чахсы поларына ізенізін читірген паза Дмитрий Лямкинге маңнаныстығ тоғыс алғаан.
Пірдең пірге тоғазығда
Таныстырар мероприятие тоозылғанда, Анатолий Серышев паза Валентин Коновалов пірдең пірге алынҷа тоғазығ иртіргеннер. Олар региондағы амғы киректерні, чуртас-экономика паза халых-политика, бюджет сурығларын, iдӧк Россия президентінің указтары паза чахығлары, национальнай проекттер паза федеральнай программалар хайди толдырылчатханын, республиканы мыннаң мындар тилідер ӧӧн кӧстеглерні ӱзӱргеннер.
– Хакасияның экономиказын алынҷа кӧстеглерҷе тилідер тоғыс узарадылча. Піс чирнің ис-пайынаң тузаланарынаң пасха отрасльларны тыытчабыс. Пістің хоных тоғызының алынҷа сфераларында кӧзідіглер ӧсче, садығ сферазы паза пӱдіріг отрасльы чахсы тиліпчелер. Республикада пӧзік технологиялығ производстволарға инвестиция площадкалары тӧстелчелер. Iди «Хакасияның технология ойымы» алынҷа экономика зоназы, индустрия паза агропромышленность парктары тоғынып пастапчалар. Улуғ хайығ салчабыс туризмні тилідеріне, – искірген Хакасия пазы.
Республикаа топливоны читкіҷе ағылар сурығ алынҷа кӧрілген. Пу проектті тӱзедерге регионның ӱлгӱлері федеральнай кіннең хада-пірге тоғыс апарчалар. Хайди Валентин Коновалов искірген, Хакасия правительствозында пу сурығҷа штаб тоғынча, ол региондағы топливо киреен хараа-кӱнӧрте сыныхтағда тутча. Республиканың правительствозы сығысчатхан сурығларны табырах пӧгер тоғыс апарча, Нефть заводтарынаң хоза чӧптезiг иділген соонда, топливо кирее чахсы саринзар айландырылча. АЗС-тарда автомобилисттер теестері хызырылчатханы кӧрінче, автозаправкаларда бензинні пір холға пирер лимиттер суурылчалар, УФАС топливаа пааларны сыныхтағда тутча.
Хакасия пазы топливо суриин пӧгерінде хабазығ пирген ӱчӱн Анатолий Серышевке алғызын читірген.
Iдӧк тоғазығда СВО араласчыларына паза ветераннарына, оларның сӧбірелеріне прай саринаң хабазар сурығларны сыбыра хайығда тудары кӧрілген. Ағаа хоза Валентин Коновалов паза Анатолий Серышев Хакасияның чурт-коммунальнай комплексін соохтарға тимнир, сетьтерні паза котельнайларны ЖКХ системазын нааҷылир программа хоостыра тыхтир сурығны ӱзӱргеннер.
Хакасия пазы президенттің полпредіне республикаа хайығ салчатхан ӱчӱн, республиканың кирексіністерін федеральнай синде пӧгерге хабасчатхан ӱчӱн алғызын читірген.
– Піс сірернің республикаа хабазииңарны паза хайииңарны пӧзік паалапчабыс, регионны тилідеріне паза пістің чуртағҷыларны чахсы чуртадарына кӧстелчеткен пӧгіннерні чарадарында полызығ ӱчӱн алғыстапчабыс, – теен Хакасия пазы.
Сомнар Дмитрий Сунчугашевти
Автор :
Николай Султреков
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
