Прай пӱдiрiглер тузында тимге сығар
13.08.2026
Хабарлар
Тоғыс хыызында парча
Тоғыс чорығы. Пу наада Хакасия пазы Валентин Коновалов тоғыс сурығлары хоостыра Боград аймаандағы Тадар Тис аалда пол килген. Амғы туста Боград аймаанда танығлығ ӱс социальнай объекттiң пӱдiрии парча. Олар прайзы хазна программалары полызиинаң пӱдiрiлчелер
Республика пазы Тадар Тис аалда апарылчатхан пӱдiрiглернi сыбыра хайығда тутча. Iди Валентин Олегович 11 орғахта тоғыс чорығынаң андар чит пар килген. Кибiрли пастап аал тастындағы суғ арығлаҷаң комплекстi кӧрген. Аны «Аалларның тиксi тилiзi» хазна программазы хоостыра пӱдiрчелер. Суғ арығлаҷаң комплекстi 2025 чылның кӧрiк айында пӱдiрiп пастааннар. Амғы туста аның пӱдiрии тоозыларына чағдапча. Тура толдыразынаң идiл парған. Подрядчик оборудование турғызыбысхан. Сағам ибiркiзiн иптир тоғыстар апарылча, сиденнер турғызылча, ағастар одыртарға пастабысханнар. Аал тастындағы суғ арығлаҷаң комплекс пӱӱл кiчiг хырлас айында, тимге сығып, тоғынарға пастир тiп пӧгiн турча. Идiл парған тоғыстар хоостыра кӧрзе, суғны арығлап, ағысчаң ӧӧн система тузында тоғынып пастир.
Анаң Хакасия пазы кӧп кӧстеглiг наа спортзал пӱдiрiлчеткен орынзар чол тутхан. Наа спортзалның пӱдiрии iдӧк «Аалларның тиксi тилiзi» хазна программазынҷа пӱтче. Амғы туста подрядчик iстiндегi тоғыстарны толдырча, тураның потолоктары тимге сыхчалар. Iдӧк кӧп кӧстеглiг спортзалның ибiркiзiнде тоғыстар апарылчалар. Тоғынҷылар брусчатка салып пастабысханнар. Пӧгiннер хоостыра объект iдӧк пӱӱл кiчiг хырлас айында тимге сых парарға кирек.
Iдӧк республика пазы Валентин Коновалов Боград аймааның Т.И.Ануфриеваның адынаң имнег туразына 30 орғанға кӧрiлген модульлығ стационар пӱдiриинде пол парыбысхан. Стационар Федерация Чӧбiнiң хабазиинаң «Узах паза ӧткiн чуртас» национальнай проекттiң «Пастағы имнег полызиин пирҷең имнег учреждениелерiн нааҷылиры» программазы хоостыра пӱдiрiлче. Таныхтирға кирек, объекттiң пастағы подряд организациязынаң сидiксiнiстер полып, хазна контрактын азынада тохтадарға килiскен. Аның cылтаанда пӱдiрiг чарым чылға соона халчатхан. Пасха организациянаң чӧптезiг идiлген дее полза, сағам пӱдiрiг тоғыстары прай тузында идiлчелер. Аннаңар объект тузында тимге сығар тiп пӧгiн турча. Амғы туста стационар полар тура чылығлалған, монолит поллар урҷаң тоғыс толдырыл парған. Подрядчик тура iстiндегi инженер системаларын турғызыбысхан. Ам пӧлiктерні стенелер турғызып чарча.
– Стационарның пӱдiриинде подрядчик тоғыстарны график хоостыра апарча, хай пiрее тоғыстарны азынада толдырча. Сағам ибiркi чирлернi иптирiне хоза марығ чарлабысхабыс. Пӱдiрiг организациязы тоғысты пастабысхан. Тоғыстарны ӧткiн толдырчалар. Аннаңар объект тузында тимге сығар тiп iзенчем. Пӱӱн Боград аймаанда апарылчатхан ӱс социальнай пӱдiрiг объектiнде пол килгем. Прай ӱс площадкада тоғыстар план хоостыра апарылчалар, че пос салынарға ам даа ирте. Уғаа танығлығ, соона халбас ӱчӱн, пу чапчаң парчатхан тоғысты пiр дее хызырбин толдырарға. Прай ӱс объект тимге тузында сых парарға паза толдырылғаны хоостыра чахсы синде поларға кирек, – теен Валентин Коновалов.
Таныхтирға кирек, стационар Федерация Чӧбiнiң паза аның кнезi Валентина Матвиенконың хабазиинаң пӱдiрiлче. Устағ-пастағ пӱдiрiгнi сыбыра хайығда тутча. Объекттің тур парчатхан паазы 182 миллион салковайға сых парча. Оларның 179 миллион – федеральнай ахча, пасхазы – республикани.
Сом r-19.ru cайттаң
Автор :
Наталья Тюкпеева
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
