Соох тус хатығ сурар
12.08.2026
Хабарлар
Чыылығ тузында министр Максим Виноградов (оң саринда) чоох тутча
Хысхаа тимненiс. Хакасияның устаа ЖКХ паза энергетика тоғынҷылары хысхы айларын сайбағлар чох тобыр парыбызарына хайди тимненчеткеннерiн сыбыра сыныхтағда тутча, ол сурығларға улуғ хайығ айландырча
Пу наада Хакасияның правительство туразында республиканың ЖКХ паза энергетика тоғынҷылары 2026 – 2027 чылларның хысхы айларын сайбағлар чох ирт парыбызарына тимненiс хайди парчатхан сурыға чарыдылған теестегi чыылығ иртiргеннер. Аннаң Хакасия пазының орынчызы Дмитрий Бученик устаан.
Чыылығ тузында ӧӧн чоох тутхан Хакасияның ЖКХ паза энергетика министрi Максим Виноградов. Аның сӧстерiнең, пӱӱлгi 1 орғахха орта республикадағы 155 котельнайдаң 95-зi тоғысха тимде. Алай ба анзы 61,3%-ке тиңнелче. Чылығ пирчеткен сетьтер 68,9 %-ке хысхызына тимделер. Алай ба 635 километр сетьтернiң 437,5 километр сетьтерi тоғысха тимнел парғаннар. Суғ пирчеткен сетьтернiң 67,8%-i тимге сых пардылар. Анзы 1529 километр сетьтернiң 973,1 километрi тимдезiн кӧзiтче.
Хакасияның ЖКХ паза энергетика министрi Максим Виноградов чыылығда араласчатханнарның хайиин Россияның энергетика министерствозы 2024 чылда алған чарадиина айландырған. Анда орыннардағы муниципальнай пӱдiстерiне ӧнетiн комиссия тӧстеп аларға чахылча, хайзылары хысхаа тимненiс хайди парчатханын сыбыра сыныхтағда тударға кирек. Комиссиялар тӧстир тоғыс 15 орғахха орта толдырыл парарға кирек.
Чыылығ тузында iдӧк алынҷа хайығ айландырылған улуғ котельнайларның тоғызына, хайзылары городтардағы кӧп хадыллығ тураларға алай нинҷе-де аалға чылығ пирче. Мында кӧзiдiмге Сорығ городтағы 4 номер улуғ хазанны алыстырары алылған, аннаңар чоох парған. Паза хара тасты Сорығдағы котельнайға пирчеткен элеваторда тыхтағ тоғыстары киректелчеткенi искiрiлген.
Тӧӧ пазы поселоктағы котельнайда суғ чылытчаң полызығлығ оборудованиелернi тыхтир тоғыстарны тоозардаңар сизiндiрiг идiлген. Жемчужнай поселокта, тiзең, котельнайны тыхтиры паза тоғысха кирерi сӧӧ тартылчатханы таныхталған. Андағох кирек полтыр Приисковайдағы котельнайда. Асхыс аалда, тiзең, федеральнай проект хоостыра чылығ пирҷең сетьтернi нааҷылир тоғыстарны табырах апарарға киректелчеткенi iлезiне сыххан.
Чыылығ тоозылчатханда, Хакасия пазының орынҷызы Дмитрий Бученик республикадағы муниципальнай пӱдiстер пастарына хысхаа тимненiс тоғыстарын сыбыра хайығда тударға, теестегi чыылығда мында таныхталған читпестер хайди тӱзедiлчеткеннеңер искiр пирерге чахығ пирген, олар хайығда тудыларлар теен.
Iдӧк чыылығда араласхан Хакасияның контракт хоостыра ниме-ноо алҷаң хазна комитедiнiң кнезi Владимир Петров. Ол орыннардағы муниципальнай пӱдiстернiң пастарын, хада-пiрге тудынып, хара тасты сала ниик паанаң ал турардаңар паза тузында ағыл пирер оңдайдаңар ундутпасха сизiндiрген. Анзы прайзына туза ағылар.
Хысхаа тимненiс Хакасияның ЖКХ паза энергетика министерствозының соона салдырбас пӧгiнi полча.
Cом авторни
Автор :
Хакасияның ЖКХ паза энергетика министерствозының пресс-службазы
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
