Иң артых проект чайааннарға – ахчалығ сыйых паза аарлас
12.08.2026
Хабарлар
Хакасия пазы Валентин Коновалов Г.А.Вяткиннiң адынаң республика правительствозының архитектура паза пӱдiрiг киреендегi ахчалығ сыйиина турысхан ӧмелернең хада
Сыйыхтас. 10 орғахта Хакасия пазы Валентин Коновалов Г.А.Вяткиннiң адынаң республика правительствозының ахчалығ сыйиина турысхан ӧмелернi алғыстаан
Хакасия правительствозы 1994 чылдаң сығара пу ахчалығ сыйыхха архитектура паза пӱдiрiг киреендегi иң артых проекттер мариин иртiрче. Пӱӱнгi кӱнде марығ ӱс номинацияҷа иртче: «Иң артых архитектура пӱдiрии», «Иң артых город пӱдiрии проектi» паза «Пӱдiрiгде пасхазына тӧӧй нимес тӱзiмнiг чарадығны сағын тапханы паза тузаланысха киргенi паза (алай) пӱдiрiг ниме-ноозын сығарарынҷа наа технологияларны тузаланысха киргенi ӱчӱн». Ахчалығ сыйых iкi чыл пазынаң читiрiлче, че полған на сай марығ салтарлары тӧӧй полбинча, пiрее номинацияда чиңiсчi табылбин халча. Полған на чиңiсчее ахчалығ сыйых синi – 200 муң салковай.
Пӱӱл, тiзең, пӱдiрiгҷiлер кӱстiг проекттернең араласхан осхастар – прай ӱс номинацияда чиңiсчiлер адалған. Ідӧк пу чылда марығ Пӱдiрiгҷi кӱнi 70 чыллығ пайрамын таныхтапчатханына чарыдылған. Марығ чиңiсчiлерiнзер алғыстас сӧcтерiнең айланып, чоох тутхан Хакасия пазы Валентин Коновалов:
– Пiстiң илбек чир-суғҷыбыс Геннадий Африканович Вяткиннiң адынаң ахчалығ сыйиина турысханы – ол сiрернiң профессиядағы чидiглерiңнi, наа оңдайларыңны паза чайаачы кӧрicтерiңнi таныхтааны. Сiрернiң тоғызыңар – ол республика тилiзiне салымнығ хозымы. Сiрернiң сылтаанда Хакасия ӧңненче, улам истiг, амғы оңдайлығ паза чуртирға килiстiре полып одырча. Сiрерге тоғызыңар, профессияа хынызыңар паза киртiнiзiңер ӱчӱн алғыс! Республикабыс паза тиксi хазнабыс ӱчӱн сiрерге наа паза хынығ проекттер паза оларны маңнаныстығ чуртасха кирерге алғапчабыс!
Хакасия пазы чиңiсчi ӧмелернiң полған на араласчыларына ахчалығ сыйыхха турысханнаңар танығларны читiрген. Іди «Иң артых архитектура пӱдiрии» номинацияда Ағбан городтағы Хакасияның радиотелевидение таратчатхан кiннiң (РТРС) устағ-пастаа паза техника туразы чиңiп алған. Проекттiң авторлары: Хакасияның пӱдiрiг министрiнiң орынҷызы полған Владимир Вяткин, «Гражданпроект» наука-техника кiнi» ООО-ның ӧӧн директоры полған Леонид Неклюдов, РТРС-тың ӧӧн директорының орынҷызының чӧпчiзi полған Николай Гребенщиков, «Альтер» ООО-ның ӧӧн директоры Дмитрий Анисимов паза РТРС-тың Хакасиядағы пӧлиинiң устағҷызы Виктор Зукол.
«Иң артых город пӱдiрии проектi» номинацияда Хубачар аалдағы «Ойна» тастар сады» проект иң артых полыбысхан. Алтай аймааның устағ-пастаа специалисттерiнiң ӧмезiне ахчалығ сыйых читiрiлген, оларның санында: «Алтай аймааның проект-смета тоғыстарының устанызы» муниципальнай казённай учреждениенiң устағҷызы Анна Шишацкаяа, устағҷы орынҷызы Светлана Цойға, ӧӧн инженерi Ольга Лысенкоға, Алтай аймаа пазының туризмҷе полысчызы Михаил Исаевке, инвестицияларҷа полысчызы Татьяна Сагалаковаа паза Алтай аймаа пазының пастағы орынҷызының полысчызы Антон Шишацкийге.
«Пӱдiрiгде пасхазына тӧӧй нимес тӱзiмнiг чарадығны сағын тапханы паза тузаланысха киргенi паза (алай) пӱдiрiг ниме-ноозын сығарарынҷа наа технологияларны тузаланысха киргенi ӱчӱн» номинацияда Ағбандағы ТЭЦ-тың топливо-транспорт цеғының 2№ бокс туразын тиксi тыхтирында молатфибробетонның амғы тусха килiстiре ниме-нооны тузаланарынҷа технология ӱчӱн идiнҷек Инна Батаевада тоғынчатхан ӧӧн инженер Владимир Батаев паза Ағбан городтағы ӱгредiг учреждениелерiнiң ӧнетiн дисциплиналарның ӱгретчiзi Анна Клепикова ахчалығ сыйыхха турысханнар.
Сыйыхтас соонаң тоғыстарын пӧзiк паалаан ӱчӱн алғыс сӧстерiн читiргеннер Виктор Зукол паза Николай Гребенщиков. Пӱӱл РТРС 25 чыл пайрамын таныхтапчаттыр. Хакасия пазы Валентин Коноваловха ол пайрамнаң палғалыстығ сыйыхтар читiрiлген, ол санда пайрамға чарыдылған кинде. Андар Хакасияда телевидение паза радио сетьтерiнiң тилiзiне чарыдылған пӧлiк кирiлтiр. Николай Гребенщиков, тiзең, РТРС-тың Хакасиядағы пӧлиинiң тархынынаңар чарыда чоохтаан. Ол тархынын ВГТРК пӧлии чiли пастаан полтыр, 25 чыл мының алнында, тiзең, алынҷа пiрiгic полып, позының тархынын пастаан. Анзы iдӧк Хакасияда РТРС-ха алынҷа устағ-пастааның паза техника туразын пӱдiрерге оңдай пирген, 2015 чылда ол iзiктерiн асхан. Чоохтирға кирек, тура тасты сынында пасхаҷыл тимнелген. Хаҷан-да республикада телевидение паза радио сетьiн таратчаң кiннi тӧстирiнҷе тоғысты Геннадий Африканович пастаан полза, аның тоғызын узарадарында оолғы Владимир ӧткiн араласханы, уламох саблығ пӱдiрiгҷiнiң адынаң республика правительствозының ахчалығ сыйиина турысхан ӧмелернiң араласчылары санына кiргенi iдӧк танығлығ полча.
Сом r-19.ru сайттаң
Автор :
Наталья Сюптерекова
| Пн | Вт | Ср | Чт | Пт | Сб | Вс |
| 28 | 29 | 30 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
